ރާއްޖޭގައި ކުރާ އިންވެސްޓުމެންޓުތައް އިތުރުކުރަން އެސްއީޒެޑް ގާނޫނަށް އިސްލާހެއް

ރާއްޖޭގައި ކުރާ އިންވެސްޓުމެންޓުތައް އިތުރުކުރުމަށް ސްޕެޝަލް އިކޮނޮމިކް ޒޯން (އެސްއީޒެޑް) ގާނޫނަށް އިސްލާހެއް މިއަދު ރައްޔިތުންގެ މަޖިލީހަށް ހުށަހަޅައިފިއެވެ.

ސަރުކާރުގެ ފަރާތުން މި އިސްލާހު ހުށަހެޅުއްވީ ބާރަށު ދާއިރާގެ މެންބަރު އިބްރާހިމް ޝުޖާއުއެވެ.

މި ބިލް ހުށަހެޅުއްވުމުގެ މައިގަނޑު މަގްސަދަކީ ރާއްޖޭގެ ސިނާއީ، އިޖްތިމާއީ، އިގްތިސާދީ މާލީ އަދި އުމްރާނީ ތަރައްގީއަށް ބޭރުގެ އިންވެސްޓުމެންޓުތައް އިތުރުކޮށް، އެ އިންވެސްޓުމެންޓުތަކުން ރާއްޖެއަށް ލިބޭ ބޭރު ފައިސާ އިތުރުކުރުން ކަމަށް ޝުޖާއު ވިދާޅުވިއެވެ. އަދި މި ބިލަކީ ރާއްޖޭގެ އާމްދަނީގެ މަގުތައް ހުޅުވާލާނެ، ރާއްޖެއަށް ފައިދާކުރާނެ ބިލެއް ކަމުގައި އޭނާ ފާހަގަކުރެއްވިއެވެ.

"މިފަދަ ބިލެއް މުހިންމުވާ ސަބަބުތަކަކީ ދެމެހެއްޓެނިވި ގޮތެއްގައި ސްޕެޝަލް އިކޮނޮމިކް ޒޯން ތަރައްގީކުރުމަކީ ދިވެހިރާއްޖޭގެ ތަރައްގީގެ އެކި ދާއިރާތަކަށް ހެޔޮ ބަދަލުތަކެއް ގެނެސްދޭނެ އިސްލާހުތަކަށްވާތީ،" ޝުޖާއު ވިދާޅުވިއެވެ.

އަދި މީގެ ސަބަބުން ސިނާއީ ދާއިރާއަށް އާ އުފެއްދުންތައް ތަޢާރަފްވެ، ތަފާތު ބާވަތްތަކުގެ މަސައްކަތްތަކުގެ ފުރުސަތު އުފެދޭނެ ކަމަށާއި، އިގްތިސާދީ ގޮތުން ފަތުރުވެރިކަމަށް އެކަނި ބަރޯސާވުން ކުޑަކުރެވޭނެ ކަމަށް ވެސް އޭނާ ފާހަގަކުރެއްވިއެވެ.

މި އިސްލާހުގެ ދަށުން އެސްއީޒެޑް ގާނޫނުގެ ގިނަ މާއްދާތަކަކަށް ބަދަލުތަކެއް ގެނެވޭނެއެވެ. މީގެ ތެރޭގައި ނުވަ ވަނަ މާއްދާ އަދި 17 ވަނަ މާއްދާގެ ފަހަތަށް މާއްދާއެއް އިތުރުކުރުމާއި، 20 ވަނަ މާއްދާގެ ފަހަތަށް އަކުރެއް އިތުރުކުރުމާއި، 22 ވަނަ މާއްދާގެ ފަހަތަށް މާއްދާއެއް އިތުރުކުރުން ހިމެނެއެވެ. އަދި މީގެ އިތުރުން "ވިޔަފާރި ފައިދާއިން ނަގާ ޓެކްސް" މި އިބާރާތް "ވިޔަފާރި އާމްދަނީއިން ނަގާ ޓެކްސް" އަށް ބަދަލުކުރުން ވެސް ހިމެނެއެވެ.

މި ގާނޫނަށް ގެނެވޭ އިސްލާހުތަކާ ގުޅިގެން ހަދަންޖެހޭ ގަވާއިދުތައް، ގާނޫނަށް އަމަލުކުރަން ފަށާ ތާރީހުން ފެށިގެން ހަ މަސްދުވަހުގެ ތެރޭގައި ގެޒެޓްކޮށް ޝާއިޢުކުރަންޖެހޭނެ ކަމަށް މި އިސްލާހުގައި ބަޔާންކޮށްފައިވެއެވެ.