ގޭގައި ކާބޯތަކެތި އުފައްދާ މީހުން ދަފްތަރުވުމަށް ބީސީސީން ނެރުނު އުސޫލް ބާތިލްކޮށްފި

އާމްދަނީ ހޯދުމަށް ގޭގައި ކާބޯތަކެތި އުފައްދާ ފަރާތްތައް ދަފްތަރުވުމަށް ބިޒްނަސް ސެންޓަރ ކޯޕަރޭޝަން (ބީސީސީ) އިން ނެރުނު އުސޫލް އުވާލައިފިއެވެ.

މިކަމާ ގުޅޭގޮތުން ބީސީސީން މިއަދު ގެޒެޓްގައި އިއުލާނެއްގައި ބުނެފައިވަނީ، މޯލްޑިވްސް ފުޑް އެންޑް ޑްރަގް އޮތޯރިޓީއިން "އަމިއްލަ ދިރިއުޅުމަށްޓަކައި ކާބޯތަކެތި އުފައްދާ ވިއްކުމުގެ މަސައްކަތުގައި އަމަލު ކުރަންވީގޮތުގެ މިންގަނޑާއި ގުޅިގެން ބީސީސީން އެކުލަވާލާފައިވާ ދަފްތަރުގެ އުސޫލް ބާތިލްވެފައިވާކަމަށެވެ.

އާމްދަނީ ހޯދުމަށް ގޭގައި ކާބޯތަކެތި އުފައްދާ ފަރާތްތަކުން ދަފްތަރުވުމުގެ އުސޫލެއް ބީސީސީން ގާއިމްކޮށް އޭގައި ރަޖިސްޓްރީވުމަށް ހުޅުވާލީ މިއަހަރުގެ ފެބްރުއަރީމަހުގެ ތެރޭގައެވެ. ބީސީސީން އޭރު ބުނީ މިފަދަ ދަފްތަރެއް އެކުލަވާލުމުގެ މައިގަނޑު މަގްސަދަކީ ގޭގައި ތިބެގެން ކާބޯތަކެތި އުފައްދާ މީހުނަށް އާމްދަނީއެއް ހޯދައިދިނުުމުގެ މަގްސަދުގައި ކަމަށެވެ.

އޭރު އެ އުސޫލުގެ ދަށުން ދަފްތަރރުގައި ރަޖިސްޓްރީވެވެނީ، އަމިއްލަ މަސައްކަތްކުރާ ދިވެހިންގެ ތެރެއިން އިކޮނޮމިކް ޑިވެލޮޕްމެންޓުގައި ވިޔަފާރިއެއް ގޮތުގައި ރަޖިސްޓަރީ ކުރުން ލާޒިމުނުވާ ފަރާތްތަކަށެވެ. މިގޮތުން މި ފުރުސަތު ހުޅުވާލާފައިވަނީ އެންމެ ކުދި ވިޔަފާރިތަކަށެވެ. އެއީ ވަޒީފާގައި މީހުން ނުގެންގުޅޭ 18 އަހަރުން މަތީ މީހުންނަށެވެ.

ވިޔަފާރީގެ އުސޫލުން ގޭގައި ކާބޯތަކެތި ތައްޔާރުމުގެ އައު މިންގަނޑެއް އެމްއެފްޑީއޭއިން ކަނޑައަޅާފައިވާއިރު، އަލަށް އަމަލުކުރަން ފެށި އުސޫލުގައިވާގޮތުން ކާބޯތަކެތި ތައްޔާރުކުރެވޭނީ ހަމައެކަނި އެ ގޭގައި އުޅޭ މީހުންނަށް އެކަންޏެވެ. ވިޔަފާރީގެ އުސޫލުން ގޭގައި ކާބޯތަކެތި ތައްޔާރުކުރާނަމަ މިހާރު އެކަމުގެ މައުލޫމާތު "ދިރިތި" ޕޯޓަލް މެދުވެރިކޮށް ހުށަހަޅަން ޖެހެއެވެ.

ވިޔަފާރީގެ ބޭނުމަށް ގޭގައި ކާބޯތަކެތި ވިއްކާ ފަރާތްތައް ދަފްތަރުކުރުމުގެ "އުސޫލު" އެމްއެފްޑީއޭގެ ޕޯޓަލް އަދި ހެލްތު މިނިސްޓްރީގެ ވެބްސައިޓުގައި ވަނީ އާންމުކޮށްފައެވެ.