އައްޑޫ އިންތިހާބުގެ ތަރުހީބު ވަރަށް ކުޑަ، ދުވަސް ދެބައި ވީއިރު ވޯޓުލީ އެންމެ 27 އިންސައްތަ
އައްޑޫ މީދު އާއި ހުޅުދޫ އަދި ފޭދޫގައި ވަކިވަކި ރަށު ކައުންސިލްތައް އުފެއްދުމާ މެދު އެ ތިން ރަށުގެ ރައްޔިތުންގެ ފެންނަ ނުފެންނަ ގޮތް ބެލުމުގެ ވޯޓުގައި، ދުވަސް ދެބައިވީއިރު ވޯޓު ލާފައިވަނީ އެންމެ 27.8 އިންސައްތަ މީހުން ކަމަށް އިލެކްޝަންސް ކޮމިޝަން (އީސީ)ގެ ތަފާސް ހިސާބުތަކުން ދައްކަައިފިއެވެ.
ޖުމްލަ 9،576 މީހަކަށް ވޯޓު ލުމުގެ ޙައްގު ލިބިފައިވާ މި ވޯޓުގައި، އީސީގެ ހިސާބުތަކުން ދައްކާ ގޮތުން މެންދުރު ދޭއް ޖެހުމާއި ހަމައަށް 2،662 މީހުންނެވެ. އެއީ ފިރިހެން 1282 މީހުންނާއި އަންހެން 1380 މީހުންނެވެ.
އީސީގެ ހިސާބުތަކުން ދައްކާ ގޮތުން، މި އިންތިހާބުގައި ވޯޓުލާން ނުކުންނަ މީހުންގެ އަދަދު ވަރަށް ބޮޑަށް މަދެވެ. އެގޮތުން އެ އިންތިހާބުގެ ވޯޓުލުމުގެ ވަގުތު ހަވީރު 04:00 އަށް ހަމަވާއިރު، އަދި ވޯޓު ނުލާ 6،914 މީހަކު ތިބި ކަމަށް އެ ހިސާބުތަކުން ދައްކައެވެ.
މި އިންތިހާބުގައި ފޭދޫން 4,355 މީހަކަށް ވޯޓު ލެވޭއިރު، ހުޅުދޫން 2،874 މީހަކަށް އަދި މީދޫން 2,347 މީހަކަށް ވޯޓު ލުމުގެ ހައްގު ލިިބެއެވެ.
މި އިންތިހާބަށް މާލެ އާއި މީދު އާއި ހުޅުދޫ އަދި ފޭދޫގައި 18 ވޯޓު ފޮށި ބަހައްޓައިފައިވެއެވެ. އެއީ ހުޅުދޫގައި ތިން ފޮށި، މީދޫގައި ތިން ފޮށި، ފޭދޫގައި ފަސް ފޮށި އަދި މާލޭގައި ދިރިއުޅޭ އެ ތިން ރަށުގެ މީހުންނަށް ކަލާފާނު ސްކޫލުގައި ބަހައްޓައިފައިވާ ހަތް ވޯޓު ފޮއްޓެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
