ކުޅަދާނަ ޑައިރެކްޓަރު އަދި އެކްޓަރު އަހުމަދު ނިމާލް ނިޔާވެއްޖެ

ސްޓްރޯކެއް ޖެހި ސީރިއަސް ހާލަތެއްގައި އޮތް ކުޅަދާނަ ޑައިރެކްޓަރު އަދި އެކްޓަރު އަހުމަދު ނިމާލް ނިޔާވެއްޖެއެވެ.

ނިމާލް ނިޔާވީ މިއަދު ހެނދުނުގެ ވަގުތެއްގައެވެ. ނިޔާވީ އައިޖީއެމްއެޗްގައި ފަރުވާ ހޯދަމުން ގެންދަނިކޮށެވެ.

ނިމާލަށް ސްޓްރޯކެއް ޖެހުނީ މިދިޔަ ޑިސެމްބަރު މަހުގެ 31 ވަނަ ދުވަހުގެ ރެ އެވެ. ސައިކަލުގައި ދަނިކޮށް އުނދަގޫތަކެއް ވާތީ މަޑުކޮށްލިތަނާ ވެއްޓުނީ އެވެ. ނިމާލް, އޭޑީކޭއަށް ގެންދިޔައީ ފުލުހުންނެވެ. އޭޑީކޭގައި ފަރުވާ ދިން ނަމަވެސް އިތުރު ފަރުވާއަށް އައިޖީއެމްއެޗަށް ބަދަލުކުރީ ޖެހިގެން އައި ދުވަހު އެވެ.

ނިމާލަކީ ދިވެހި ސިނަމާއިން ފެނުނު އެންމެ މޮޅު އެއް އެކްޓަރެވެ. ނިމާލް ފިލްމީ ދާއިރާއަށް ނިކުތީ ނުވަދިހައިގެ އަހަރުތަކުގެ ކުރީކޮޅުގައެވެ. އޭނާ އެންމެބޮޑަށް މަޝްހޫރުވެގެން ގޮސްފައިވަނީ ޓީވީއެމްއިން ގެނެސްދިން ސަޅިބައިސާއިންނެވެ. ނިމާލްގެ އެންމެ ފާހަގަކޮށްލެވޭ ފިލްމަކީ "ސިޓީ" އެވެ. ދިވެހިންގެ ތެރޭގައި ވަރަށްބޮޑު މަޤްބޫލުކަމެއް ލިބިގެންދިޔަ އެ ފިލްމް ލިޔެ ޑައިރެކްޓް ކޮށްފައި ވަނީވެސް ނިމާލެވެ.

އޭގެ އިތުރުންވެސް ނިމާލް ވަނީ ފިލްމީ ދާއިރާގައި އެކްޓަރެއްގެ އިތުރުން ޑައިރެކްޓަރެއްގެ ގޮތުގައިވެސް ކާމިޔާބު އެތައް މަސައްކަތްތަކެއް ކޮށްފައެވެ. ނިމާލްގެ މަސައްކަތްތަކުގެ އަގުވަޒަން ކުރުމުގެ ގޮތުން ސަރުކާރުން ވަނީ އޭނާއަށް ހިތްވަރުދިނުމުގެ އިނާމްވެސް ދީފައެވެ.

ނިމާލްގެ ކަށުނަމާދު ކުރުމަށް ނިންމާފައިވަނީ މިއަދުގެ އަސްރު ނަމާދަށްފަހު، އާސަހަރާ މިސްކިތުގައެވެ.