ދިވެހިންގެ މަސްކުންފުނި މިފްކޯގެ ދަރަނި، 1 ބިލިއަން ރުފިޔާއަށްވުރެ މަތީގައި

ދިވެހިންގެ މަސްކުންފުނި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)ގެ ދަރަނި, މިދިޔަ އަހަރު ނިމުނުއިރު، އެއް ބިލިއަން ރުފިޔާ އަށް ވުރެ އިތުރުވެފައިވާކަމަށް އޮޑިޓަރ ޖެނެރަލް ވިދާޅުވެއްޖެއެވެ.

އޮޑިޓަރ ޖެނެރަލް ނެރުއްވާފައިވާ މިފްކޯގެ 2024 ވަނަ އަހަރުގެ މާލީ އޮޑިޓް ރިޕޯޓްގައި ބުނެފައިވަނީ، މިދިޔަ އަހަރު އެކުންފުނީގެ ދަރަނި 1.03 ބިލިއަން ރުފިޔާއަށް އަރާފައިވާކަމަށާއި، ކުންފުނި މިހާރު އޮތީ މާލީގޮތުން ނުރައްކާތެރި ހާލަތެއްގައިކަމަށެވެ. މިފްކޯގެ އޮޑިޓް ހިސާބުތަކުން ދައްކާގޮތުގައި އެކުންފުންޏަށް އަހަރެއްގެ ތެރޭގައި އެކަށީގެންވާ އާމްދަނީއެއް ލިބުނުނަމަވެސް، ހިންގުމުގެ ހަރަދާއި ވިޔަފާރީގެ މުއާމަލާތްތައް ހުންނަގޮތުން ވިޔަފާރިން ލިބެންޖެހޭ ފައިދާއެއް ނުލިބެއެވެ.

އެގޮތުން 2024 ވަނަ އަހަރު މިފްކޯއަށް އާމްދަނީގެ ގޮތުގައި 1 ބިލިއަން ރުފިޔާގެ އާމްދަނީއެއް ލިބުނުނަމަވެސް މުދާ ވިއްކުމަށް ކުރި ހަރަދާއި އިދާރީ ހަރަދުތަކާއި އެނޫންވެސް ހަރަދުތައް ބޮޑުވުމުން އެއަހަރު އެކުންފުންޏަށް ވަނީ 165 މިލިއަން ރުފިޔާގެ ގެއްލުމެއް ލިބިފައެވެ.

މިދިޔަ އަހަރު އާމްދަނީގެ ގޮތުގައި ގަނޑުކުރިމަސް ބޭރުކޮށްގެން 693.3 މިލިއަން ރުފިޔާ ލިބުނުއިރު، ފަސްމީރު ބްރޭންޑްގެ އުފެއްދުންތައް ވިއްކައިގެން 357.5 މިލިއަން ރުފިޔާ ލިބުނެވެ. މީގެ ތެރެއިން މަސްދަޅު ވިއްކައިގެން 105.8 މިލިއަން ރުފިޔާ ލިބުނުއިރު، އައިސް ވިއްކައިގެން 7.7 މިލިއަން ރުފިޔާ ލިބުނެވެ. އަދި މަހުގެ އެކި ބާވަތްތަކުގެ އުފެއްދުންތައް ވިއްކައިގެން 26.8 މިލިއަން ރުފިޔާ ވަނީ ލިބިފައެވެ.

މިފްކޯއަށް މިދިޔަ އަހަރު މުދާ ވިއްކުމަށް 945 މިލިއަނަށްވުރެ ގިނަ ރުފިޔާ ހޭދަވެފައިވާއިރު، އިދާރީ ހަރަދުގެ ގޮތުގައި 245 މިލިއަނަށްވުރެ ގިނަ ރުފިޔާ ވަނީ ހޭދަވެފައެވެ. ސަރުކާރުން މިދިޔަ އަހަރުވެސް މިފްކޯއަށް ސަބްސިޑީގެ ގޮތުގައި 389 މިލިއަން ރުފިޔާ ވަނީ ދީފައެވެ.

މިދިޔަ އަހަރު ނިމުނުއިރު މިފްކޯއިން އެހެން ފަރާތްތަކަށް ދޭންޖެހޭ ފައިސާގެ އަދަދު 1 ބިލިއަން ރުފިޔާއަށްވުރެ މަތީގައި ހުރިއިރު، އެންމެބޮޑު އަދަދެއް ދޭންޖެހެނީ އެފްއެސްއެމްއަށެވެ. މިފްކޯއިން އެފްއެސްއެމަޝް 492 މިލިއަނަށްވުރެ ގިނަ ރުފިޔާ ދޭންޖެހޭއިރު، ފިނޭންސަށް 113 މިލިއަނަށްވުރެ ގިނަ ރުފިޔާ ދޭންޖެހޭކަމަށް ހިސާބުތަކުން ދައްކައެވެ. މިފްކޯއަށް ވީ ގެއްލުންތަކާއި، އަދި އެކުންފުނިން އެހެންފަރާތްތަކަށް ދައްކަންޖެހޭ އަދަދުތަކާއެކު މިފްކޯގެ ޖުމްލަ ދަރަނި މިހާރު ހުރީ 1.8 ބިލިއަން ރުފިޔާގައެވެ.

މިފްކޯއަކީ 1977 ވުޖޫދަށް އައި ކުންފުންޏެކެވެ. މިފްކޯގައި 1،692 އަށްވުރެ ގިނަ މުއައްޒަފުން މަސައްކަތްކުރާއިރު، 4 ކާރުހާނާގެ އިތުރުން މަސްކިރާ 14 އުޅަނދާއި 20 އައިސްޕްލާންޓް ހުރެއެވެ.