މަޑިވަރު އެއާޕޯޓް މިއަހަރު ހުޅުވަނީ

ޅ. މަޑިވަރުގައި އަޅާ އެއާޕޯޓްގެ މަސައްކަތް މި އަހަރު ހުޅުވަން ތައްޔާރުވަމުންދާ ކަމަށް ޓްރާންސްޕޯޓް މިނިސްޓްރީން ބުނެފިއެވެ.

ޓްރާންސްޕޯޓް މިނިސްޓްރީން އިއްޔެ ބޭއްވި ނޫސްވެރިންގެ ބައްދަލުވުމުގައި އެމިނިސްޓްރީގެ ސްޓޭޓް މިނިސްޓަރު އަހްމަދު ޒުބައިރު ވިދާޅުވީ، އެއާޕޯޓްގެ މަސައްކަތުގެ ބޮޑުބައި ނިމި، މިހާރު ކުރަމުންދަނީ ރަންވޭގެ މަސައްކަތް ކަމަށެވެ. އަދި މިއަހަރު އެއާޕޯޓް ހުޅުވައި ހިދުމަތް ދެވޭވަރުވާނެ ކަމަށް ޒުބައިރު ވިދާޅުވިއެވެ.

މަޑިވަރުގައި އެއާޕޯޓު އެޅުމުގެ މަސައްކަތް އެންމެ ފުރަތަމަ ފެށީ ރައީސް މައުމޫންގެ ވެރިކަމުގައެވެ. އޭގެ ފަހުން ކޮންމެ ސަރުކާރަކުންވެސް ކޮންމެވެސް ވަރަކަށް މަސައްކަތް ކޮށްފައި ވެއެވެ.

އެގޮތުން ކުރީގެ ރައީސް އަބްދުﷲ ޔާމީންގެ ސަރުކާރުގައި 2018 ވަނަ އަހަރުގެ މެއި މަހުގެ 29 ގައި، އެމަސައްކަތް ހަވާލުކޮށްފައިވަނީ ޗަމްޕާ މުހައްމަދު މޫސާގެ ބޮޑު ހިއްސާއެއް އޮންނަ ކުރެއްދޫ ހޯލްޑިންގްސް ކުންފުންޏާއެވެ. މަޑިވަރު އެއާޕޯޓް އެޅުމުގެ މަސައްކަތް ކުރަނީ ވެލާނާ އިންޓަނޭޝަނަލް އެއާޕޯޓްގެ މަސައްކަތް ކުރަމުންދާ ޗައިނާގެ ބެއިޖިން އާބަން ކޮންސްޓްރަކްޝަން ގުރޫޕް (ބީޔޫސީޖީ) އިންނެވެ.

8 މިލިއަން ޑޮލަރުގެ އެމަޝްރޫއުގެ ދަށުން 1.2 ކިލޯ މީޓަރުގެ ރަންވޭއަކާއި، ސިޓީ ހޮޓަލެއް އަޅަން ހަމަޖެހިފައިވެއެވެ.