މަސްވެރިންނަށް ދޭން ހުރި ފައިސާއިން 442 މިލިއަން ރުފިޔާ ދީފިން؛ ދެންހުރި ފައިސާވެސް ދޭނަން: ރައީސް

މަސްވެރިންނަށް ދޭންޖެހޭ ފައިސާގެ ތެރެއިން 442 މިލިއަން ރުފިޔާ މިހާތަނަށް ދީފައުވާ ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.

ހުވަދުއަތޮޅަށް ކުރައްވަމުންދާ ދަތުރުފުޅުގައި ގދ. ތިނަދޫ ސިޓީއަށް ވަޑައިގެން އެރަށު ރައްޔިތުންނާ ރޭ ބައްދަލުކުރައްވައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، އެމަނިކުފާނު ސަރުކާރާއި ހަވާލުވެވަޑައިގެންނެވި އިރު، ރާއްޖޭގެ އިގްތިސާދު އޮތީ އަނދަވަޅަކަަށް ވެއްޓިފައި ކަމަށެވެ.

އެގޮތުން، ރާއްޖޭގެ ދަރަނި 120,000 މިލިއަނަށް އަރާފައިވާ ކަމަށާ، އޭގެ އިތުރަށް ރާއްޖޭގެ އެތެރޭގެ އެކި އެކި ފަރާތްތަކާއި، އާއްމު ފަރުދުންނަށް ދައްކަންޖެހޭ 9 ބިލިއަން ރުފިޔާގެ ދަރަނި އޮތް ކަމަށެވެ.

އެހުރިހާ ދަރަންޏެއްވެސް، ފައިސާ ޗާޕުނުކޮށް ދައްކަމުންދާ ކަން އެމަނިކުފާނު ފާހަގަކުރެއްވިއެވެ. އަދި ފައިސާ ޗާޕުކުރުމަކީ ކޮންމެ ސަރުކާރަކަށްވެސް ފަސޭހަ ވާނެ ކަމެއް ކަމަށާ، ނިމިދިޔަ ސަރުކާރުން އެކަން ކުރެއްވި ކަމަށް ރައީސް ވިދާޅުވި އެވެ.

އެގޮތުން ނިމިދިޔަ ސަރުކާރުން 800 މިލިއަން ރުފިޔާ ޗާޕުކުރުމުންނާއި، އާމްދަނީ ލިބޭނެ ގޮތްތައް ނުހޯދައި ޚަރަދުތައް އިތުރުކުރުމުންނާއި، ޖަމާކުރެވިފައި ހުރި ޑޮލަރު މާރުކުރުމުންނާއި އަދި މިފަދަ އެތައް ސަބަބުތަކަކާ ހުރެ ދިވެހިރާއްޖޭގެ އިޤްތިޞާދު އަނދަވަޅަކަށް ވެއްޓެން މެދުވެރިވިކަން ރައީސުލްޖުމްހޫރިއްޔާ ފާހަގަ ކުރެއްވިއެވެ.

އެފަދަ ސަބަބު ތަކާއި ހުރެ މަސްވެރި ކަމުގެދާއިރާވެސް ފުން އަނދަވަޅަކަށް ވެއްޓިފައި އޮތް ކަމަށާ، މަސްވެރިންނަށް ނުދީ އެތައް މިލިއަން ރުފިޔާއެއް ހުރި ކަން އެމާނިކުފާނު ވަނީ ފާހަގަކުރައްވާފަ އެވެ.

އަޅުގަނޑުމެންނާއި ހަވާލުވިއިރުގައި މަސްވެރިންނަށް ނުދީ ހުރި އެތައް ސަތޭކަ މިލިއަން ރުފިޔާ. އެފައިސާ ދީފިން. ޖުމުލަ 442 މިލިއަން ރުފިޔާ މަސްވެރިންނަށް ދޭންހުރި ފައިސާއިން ދެވިއްޖެ. މަސް ބާނާ ވަރަކުން ފައިސާ ދައްކަންޖެހޭނެ ކަން އެނގޭ. އަދިވެސް ދޭން އެބައޮތް 298 މިލިއަން ރުފިޔާ. އޭގެ ތެރެއިންވެސް ފައިސާ ދެވެން އޮތް މިންވަރަކުން ދެމުން މިދަނީ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް މުޢިއްޒު ވިދާޅުވީ، އެ ފައިސާ ދިނުމުގެ މަސައްކަތް ކުރަމުންދަނީ ރާއްޖެ ވެއްޓިފައި އޮތް އިގްތިސާދީ އަނދަވަޅުން ނެރުމުގެ މަސައްކަތް ކުރައްވަމުން ފައިސް ޗާޕުވެސް ނުކޮށް ކަމަށެވެ.