މުދައްރިސުން އެ ކުރާ މަސައްކަތަކީ، ނަބީބޭކަލުން ކުރެއްވި މަސައްކަތްޕުޅު: ހުކުރު ޚުތުބާ

މުދައްރިސުންނަކީ ދުނިޔެއާއި އާޚިރަތުގެ ހެޔޮ މަގަށް އަލިކޮށްދޭ ދަންމަރުތަކެއް ކަމަށާ، އެ ބޭފުޅުން އެ ކުރައްވާ މަސައްކަތަކީ ނަބީބޭކަލުން ކުރެއްވި މަސައްކަތްޕުޅު ކަމުގައި މިއަދުގެ ހުކުރު ޚުތުބާގައި ބުނެފިއެވެ.

އައު ދިރާސީ އަހަރު ފެށުމާ ގުޅިގެން ދެވުނު މި ޚުތުބާގައި ތަޢުލީމާއި ތަރުބިޔަތުގެ މުހިންމުކަމާއި، މުދައްރިސުންގެ މަތިވެރި ދައުރުގެ މައްޗަށް އަލިއަޅުވާލާފައިވެއެވެ.

އެގޮތުން ޚުތުބާގައި ބުނީ، މާތް ނަބިއްޔާ مُـحَمَّدٌ ﷺ ތަޢުލީމު ފެތުރުއްވުމަށް ވަރަށް ބޮޑު އިސްކަމެއް ދެއްވި ކަމަށެވެ. އަދި މުސްލިމުންގެ ހިތްތަކުގައި ކީރިތި ރަސޫލާ ﷺ އިންދަވައިދެއްވި ޢިލްމުގެ އޮށްތަކުން ފެޅި ގަސްތައް ބިޔަވެ، ޒަމާނާއި، ޙާލަތާ ފައިހަމަވާ ބަޔަކު ބިނާކުރި، އުފެއްދުންތެރި އުއްމަތަކަށް އިސްލާމީ އުއްމަތް ވި ކަމަށެވެ.

ޔޫނާނީ ބަހުންނާއި ފާރިސީ ބަހުން ހުރި ޢިލްމުތައް، ޢަރަބި ބަހަށް ތަރުޖަމާކުރުމާއި، ޢިލްމާއި ފަންނުގައި، އައު އެތައް އީޖާދެއް ކޮށް، ފޮތްތައް ލިޔެ ޝާއިޢުކުރި ވަރުގަދަ ޙަޟާރަތެއް މި އުންމަތް ބިނާކުރިއެވެ. މި އީޖާދުތަކުގެ ސަބަބުން ދުނިޔޭގެ ލައިބްރަރީތައް މުއްސަނދިވިއެވެ. ސިކުނޑިތައް ހުޅުވުނެވެ. އިސްލާމީ ތަޢުލީމު ޢާންމުވުމުގެ ސަބަބުން ދުނިޔޭގެ ކަންކޮޅުތަކުގައި ސުލްޙަމަސަލަސްކަން ޤާއިމުވިއެވެ.

ޚުތުބާ

މިއާއެކު ޚުތުބާގައި ވަނީ މި ފެށުނު ދިރާސީ އަހަރު، އިސްލާމް ދީނާއި ދުންޔަވީ ރޮނގުތަކުން އިތުރު ކުރިއެރުންތަކެއް ލިބޭތޯ ގަދައަޅައި މަސައްކަތްކުރާން ދަރިވަރުންނަށް ނަޞޭޙަތްތެރިވެފައެވެ.

ތިޔަ ކުދީންގެ މައިންބަފައިންނަށް އިޙްތިރާމުކޮށްގެންނެވެ. ލޮބުވެތި މުދައްރިސުންނަށް ޙައްޤުވާ ޤަދަރާއި އިޙްތިރާމު އަދާކޮށްގެންނެވެ. އެ މީހުންނަކީ ދުނިޔެއާއި އާޚިރަތުގެ ހެޔޮ މަގަށް އަލިކޮށްދޭ ދަންމަރުތަކެކެވެ. ތިޔަ ކުދީންގެ މުދައްރިސުން އެ ކުރައްވާ މަސައްކަތަކީ، ނަބީބޭކަލުން ކުރެއްވި މަސައްކަތްޕުޅެވެ. އެ ބޭކަލުން ފޮނުއްވުނީ މީސްތަކުންނަށް ހެޔޮ ކަންތަކަށް އަމުރުކުރައްވައި، ނުބައި ކަންތަކާ ދުރުހެލިވުމަށް އިރުޝާދު ދެއްވާ ބޭކަލުންގެ ގޮތުގައެވެ. ސުވަރުގޭގެ އުފާވެރިކަމުގެ ޚަބަރާއި، ނަރަކައިގެ ބިރުވެރިކަމުގެ އިންޛާރު ދެއްވާ ބޭކަލުންގެ ގޮތުގައެވެ.

ޚުތުބާ

މީގެ އިތުރުން ޚުތުބާގައި ވަނީ، އެދުރުންނަކީ ކިޔަވައިދެއްވާ ކުދިން، ނަމޫނާއަކަށް ބަލާނޭ ބައެއްކަން ފާހަގަކޮށް، އެ ކުދީންނަށް ރަނގަޅު ކަމުގައި ފެންނާނީ، އެދުރުން އެކުދީންނަށް ރަނގަޅުކަމުގައި ދެއްކި ކަމެއް ކަމުގައި ބުނެފައެވެ.

އަދި ދަރިވަރުންނަށް އިސްލާމްދީނާއި ޤައުމު ދެކެ ލޯބިވާ، ޤައުމުގެ މިނިވަންކަމާއި ސިޔާދަތު ދަމަހައްޓަން ދަންނަ ބަޔަކަށް ހެދުމަށް މުދައްރިސުންނަށް ގޮވާލާފައި ވެއެވެ. އަދި ދަރިވަރުންނަށް ވެސް އިސްލާމްދީނާއި ދިވެހި ޤައުމު ދެކެ ލޯބިވާ ދަރީންނަށް ވުމަށް އިލްތިމާސްކޮށްފައެވެ.

ޚުތުބާގައި ވަނީ ތަރައްޤީގެ އަސާސަކީ ތަޢުލީމާއި ތަރުބިޔަތު ކަމަށް ބަޔާންކޮށް، މި ދާއިރާއަށް އިސްކަންދިނުމުގެ މުހިންމުކަން ފާހަގަކޮށްފައެވެ.