ކޮމިޝަނަރ އޮފް ޓެކްސޭޝަން ޔަޒީދުގެ އާއިލާގެ 10 މީހަކަށް ފްލެޓް ލިބުނު!
ކުރީގެ ރައީސް އަބްދުﷲ ޔާމީންގެ ސަރުކާރުގައި ބޯހިޔާވަހިކަމުގެ ސިޔާސަތުގެ ދަށުން ދޫކުރި ފްލެޓްތައް ލިބުނު މީހުންގެ ތެރޭގައި ކޮމިޝަނާ ޖެނެރަލް އޮފް ޓެކްސޭޝަން ޔަޒީދު މުހައްމަދުގެ އާއިލާގެ 10 މީހަކު ހިމެނޭކަން ހާމަވެއްޖެއެވެ.
ކުރީ ސަރުކާރުން ފްލެޓް ދިން މީހުންގެ ލިސްޓް އާއްމުކޮށްފައިވާއިރު މަޖިލިސް މެންބަރުންނާއި ބައެއް ނުފޫޒުގަދަ ސިޔާސީ މީހުންގެ އާއިލާގެ މީހުން ގިނަ އަދަދަކަށް ހިމެނެއެވެ.
މައުލޫމާތު ލިބިފައިވާ ގޮތުގައި، ޔަޒީދުގެ އާއިލާގެ މީހުންގެ ތެރެއިން ފްލެޓް ލިބިފައިވާ މީހުންގެ ތެރޭގައި އޭނާގެ އެއްބަނޑު އެއްބަފާ ކޮއްކޮ، އޭސީސީގެ މެންބަރެއް ކަމުގައިވާ ޔަޒްމީދު މުހައްމަދު ހިމެނެ އެވެ. އަދި ހަމައެހެންމެ ޔަޒްމީދުގެ އަނބިކަނބަލުންނަށް ވެސް ފްލެޓް ލިބިފައިވާކަން ފާހަގަކޮށްލެވެއެވެ.
ދެން ހިމެނެނީ ޔަޒީދުގެ އެއްބަނޑުއެއްބަފާ ދެ ދައްތަ އިން ކަމަށްވާ ޔަޒީދާ މުހައްމަދާއި ޝަޒިއްޔާ މުހައްމަދެވެ. އަދި ޔަޒީދުގެ އެއްބަނޑު އެއްބަފާ ދެ ކޮއްކޮ ޔަޒްނާ މުހައްމަދަށާއި މަޒީދު މުހައްމަދަށް ވެސް ވަނީ ފްލެޓު ލިބިފަ އެވެ.
މީގެ އިތުރުން ޔަޒީދުގެ އެއްބަނޑު އެއްބަފާ ކޮއްކޮއިންނާއި ދައްތައިންގެ އިތުރުން އާއިލާގެ އިތުރު ބަޔަކަށް ވެސް ފްލެޓު ލިބިފައިވާކަން ފާހަގަކޮށްލެވެއެވެ.
ރައީސް ޔާމީނުގެ ސަރުކާރުގައި ފްލެޓް ދިން މީހުންގެ ތެރޭގައި ސިޔާސީ ނުފޫޒު ބޭނުންކޮށްގެން ނުހައްގުން ފްލެޓް ހޯދި ގިނަ ބަޔަކު ތިބި ކަމަށް އާއްމުންގެ ގިނަ ބަޔަކު ތުހުމަތު ކުރިއެވެ. ރައީސް އިބްރާހިމް މުހައްމަދު ސޯލިހްގެ ސަރުކާރުން އެ ލިސްޓް އާއްމުކުރުމާއި އެކު އެ ތުހުމަތުގެ ހަގީގަތް މިވަނީ ހާމަވަގެން ގޮސްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
