ރަށްރަށުގެ މަގުތަކުގައި އުޅޭ ބުޅާތަކަށް ގޯނާ ނުކުރުމަށް އިލްތިމާސްކޮށްފި

ރަށްރަށުގެ މަގުތަކުގައި އުޅޭ ބުޅަލަށް ގޯނާ ނުކުރުމަށް ދަނޑުވެރިކަމާއި ދިރޭ ތަކެއްޗާއި ބެހޭ ވުޒާރާއިން އިލްތިމާސްކޮށްފިއެވެ.

މަގުމަތީގައި ވީއްލިގެން އުޅޭ ބުޅާތަކަށް ހާނިއްކަކުރުމާއި ގުޅިގެން އެ ވުޒާރާއިން ނެރުނު ނޫސްބަޔާނެއްގައި ބުނީ، މިހާރަކަށް އައިސް ރާއްޖޭގެ ބައެއް ރަށްރަށުގެ މަގުމަތީގައި ވީއްލިގެން އުޅޭ ބުޅާތަކަށް ބައެއް ފަރާތްތަކުން ގޯނާކޮށް، ހާނީއްކަ ކުރުމުގެ އިތުރުން އެސޮރުމެން މަރާކަމުގެ ޝަކުވާތައް ލިބެމުންދާކަމަށެވެ.

މިއީ ޖަނަވާރުތަކުގެ ދުޅަހެޔޮކަމުގެ މިންގަނޑާއި ޚިލާފުކަމަކަށް ވާތީ މިކަން ނުކުރުމަށް އިލްތިމާސްކުރަމުން އެ ވުޒާރާއިން ބުނީ، ޖަނަވާރުގެ ދުޅަހެޔޮކަމުގެ މަފްހޫމްގައި ބައިނަލްއަޤުވާމީ ފެންވަރުގައި ބަލައިގެންފައިވާ، ޖަނަވާރަށް ލިބިގެންވާ 5 މިނިވަންކަމެއް ވާކަމަށެވެ. އެއީ:

1) ހައިހޫނުކަމާއި، ކަރުހިއްކުމާއި، ކާޑުބަލިން މިންޖުވުމުގެ މިނިވަންކަން

2) ބިރުގަތުމާއި، ހާސްވުމާއި، ކަންބޮޑުވުމުން މިންޖުވުމުގެ މިނިވަންކަން

3) ޖިސްމާނީ ގޮތުން އަރާމުނުލިބުމުން މިންޖުވުމުގެ މިނިވަންކަން

4) ވޭނާއި، ހާނީއްކައާއި، ބަލި ބަލީން މިންޖުވުމުގެ މިނިވަންކަން

5) އާދަވެގެން ޖަނަވާރު އުޅޭ އުޅުމަށް އެޅޭ ހުރަސްތަކުން މިންޖުވުމުގެ މިނިވަންކަން

ދިރޭތަކެއްޗާއި ބެހޭ ވުޒާރާއިން ބުނީ، ދިވެހި ރާއްޖެއިން ބައިވެރިވެފައިވާ، ދުނިޔޭގެ ޖަނަވާރުގެ ސިއްހަތާއި ބެހޭ ޖަމިއްޔާގެ އެނިމަލް ހެލްތު ކޮޑުގައި ޖަނަވާރުގެ ދުޅަހެޔޮކަމަށް ހާއްސަ އަހައްމިޔަތުކަމެއް ދީފައިވާކަމަށާއި، މީގެ ތެރޭގައި ދަނޑުވެރިކަމަށާއި، މުނިފޫހިފިލުވުމަށާއި، އިލްމީ ދިރާސާ ކުރުމަށާއި، މިނޫންވެސް ބޭނުންތަކަށް ޖަނަވާރު ގެންގުޅުމުގައި އެސޮރުމެންގެ ދުޅަހެޔޮކަން ކަށަވަރުކުރުން ހިމެނޭކަމަށެވެ.

އޮޅުކޮށްގެން ގެންގުޅޭ ޖަނަވާރަކީ ވަކި ބާވަތެއްގެ ކާނާއެއް ކާންދީ، އެއްޗެއްގެ ސުލޫކު ވަކިގޮތަކަށް ބައްޓަންކޮށް އަޅާލުމާއި ލޯބިދީގެން ގެންގުޅޭ އެއްޗެެއްކަން ފާހަގަކޮށް އެ ވުޒާރާއިން ބުނީ، އެފަދަ ތަކެތި މަގުމައްޗަށް ދޫކޮށްލުމުން އެސޮރުމެންނަށް ލިބެމުންދިޔަ އަޅާލުމާއި ލޯބިން މަހުރޫމްވެ، ކަންބޮޑުވުމާއި ހިތްދަތިކަން ތަހައްމަލު ކުރުމުގެ އިތުރުން އާދަވެގެން ކަމުންދިޔަ ކާނާ ނުލިބުމާއި އަމާންވެށި ގެއްލުމުގެ ސަބަބުން އިންސާނުންނާއި ދޯޅަވެ ގާތުގައި އުޅުން ކަމަށެވެ.

މިފަދަ ޖަނަވާރުންނަކީ ބުއްދިއެއް ނުވާ އެއްޗަކަށްވާތީ އެސޮރުމެންގެ ފަރާތުން އިންސާނުންނަށް އުނދަަގޫތައް ކުރިމަތިވުމަކީ އެކަށީގެންވާކަމެއްކަމަށާއި، ނަމަވެސް އެއީ އެ ތަކެއްޗަށް ގޯނާކުރަން ލިބޭ ސަބަބެއް ނޫންކަމަށާއި، އެފަދަ ކަމެއްކުރުމަކީ އިންސާނިއްޔަތާވެސް ޚިލާފު ޢަމަލެއްކަން އެ ވުޒާރާއިން ވަނީ ހަނދާންކޮށްދީފައެވެ.

މީގެ އިތުރުންވެސް މާތްވެގެންވާ އިސްލާމް ދީނުގައިވެސް ދިރޭތަކެއްޗަށް ރަޙުމުކޮށް، އަޅާލައި، އޯގާތެރިވުމަށް ވަނީ ބާރުއަޅުއްވާފައިވުމުން ރާއްޖޭގައި އުޅޭ އެއްވެސް ޖަނަވާރަކަށް އަނިޔާވެރިވުން ފަދަ ނޭދެވޭ ކަންކަމުން ދުރުވެ އެތަކެއްޗަށް އަޅާލައި، އޯގާތެރިވުމަށް އެ ވުޒާރާއިން ވަނީ އިލްތިމާސްކޮށްފައެވެ.