މާލެ ސަރަހައްދުގައި 13،000 ހައުސިން ޔުނިޓް ތަރައްޤީކުރަން އެފްޑީސީން ނިންމައިފި

މާލެ ސަރަހައްދުގައި 13،000 ހައުސިން ޔުނިޓް ތަރައްޤީކުރުމުގެ މަޝްރޫއެއް ކުރިއަށްގެންދަން ފަހި ދިރިއުޅުން ކޯޕަރޭޝަން (އެފްޑީސީން) އިން ނިންމައިފިއެވެ.

ދައުލަތުގެ މީޑިއާ، ޕީއެސްއެމްގެ ޕްރޮގްރާމެއްގައި ވާހަކަފުޅު ދައްކަވަމުން އެފްޑީސީގެ މެނޭޖިން ޑިރެކްޓަރ ހަމްދާން ޝަކީލް ވިދާޅުވީ،  މާލެ ސަރަޙައްދުގައި ސޯޝަލް ހައުސިންގެ އިތުރު މަޝްރޫޢުތަކެއް ކުރިއަށް ގެންދިޔުމަށް އެކުންފުނިން ނިންމާފައިވާކަމަށާއި، މިކަމަށްޓަކައި  މިއަހަރުގެ ކުރީ ކޮޅު ސްރީލަންކާގެ ކުންފުންޏަކާއެކު 3000 ހައުސިން ޔުނިޓް ތަރައްޤީކުރުމުގެ ފްރޭމްވޯކް އެއްބަސްވުމެއްގައި ސޮއިކޮށްފައިވާކަމަށެވެ.

އެ މަޝްރޫއުއަށް ބޭނުންވާ ފައިނޭންސް ހޯދުމުގެ މަސައްކަތް ކުރިއަށްދާކަން ފާހަގަކުރައްވާ ހަމްދާން ވިދާޅުވީ، ބޭރުގެ 2 ކުންފުންޏަކާ އެކު ޖުމުލަ 10000 ހައުސިން ޔުނިޓް ތަރައްޤީކުރުމުގެ ފްރޭމް ވޯކް އެއްބަސްވުމެއްގައިވެސް ސޮއިކޮށްފައިވާކަމަށާއި، މި މަޝްރޫޢުތައް ކުރިއަށް ގެންދިޔުމަށް ހަމަޖެހިފައިވަނީ ބޭރުން ލޯނު ނަގައިގެންކަމަަށެވެ.

މީގެ އިތުރުން، 2 މަސްދުވަހުގެ ތެރޭގައި އެ މަޝްރޫޢުތައް ކުރިއަށް ގެންދިޔުމުގެ ހުއްދަ ހޯދުމަށް ސަރުކާރަށް ހުށައަޅާނެކަމަށާއި، ކުރިއަށްއޮތް 4 މަސްދުވަހުގެ ތެރޭގައި މަޝްރޫޢުތައް އިފްތިތާހްކުރާނެކަމަށް ހަމްދާން ވިދާޅުވިއެވެ.

"މި މަޝްރޫޢުތައް ކުރިއަށް ގެންދިޔުމަށް ހަމަޖެހިފައިވަނީ ބޭރުން ލޯނު ނަގައިގެންކަމަށް. އަދި 2 މަސްދުވަހުގެ ތެރޭގައި އެ މަޝްރޫޢުތައް ކުރިއަށް ގެންދިޔުމުގެ ހުއްދަ ހޯދުމަށް ސަރުކާރަށް ހުށައަޅާނެ. ކުރިއަށްއޮތް 4 މަސްދުވަހުގެ ތެރޭގައި މަޝްރޫޢުތައް އިފްތިތާހްކުރާނެ. ސޯޝަލް ހައުސިން ބޭނުންވާ ކޮންމެ ރަށެއްގައި އެފަދަ މަޝްރޫޢުތައް ކުރިއަށް ގެންދިޔުމަށް އަޅުގަނޑުމެން މިތިބީ ތައްޔާރަށް."

ހަމްދާން ވިދާޅުވިއެވެ.

ސަރުކާރުގެ 5 އަހަރުގެ ދައުރު ނިމޭއިރު، ދިވެހި ރާއްޖެއަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލު ހޯދުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ވައުދުފުޅެއްކަން ފާހަގަކޮށްލަން ޖެހެއެވެ.