މިއަދު އޮންނަ ކަނޑު ރޯދި އުފާ ފެސްޓިވަލްގައި ހިލޭ ޖެޓްސްކީ ދުއްވުމުގެ ފުރުސަތު
ލިޔުންތެރިޔާ
ޚަދީޖާ އަރުފާ
ބައިނަލްއަގުވާމީ ކަނޑުގެ ދުވަސް ފާހަގަކުރުމަށް މަސްވެރިކަމާއި ބެހޭ ވުޒާރާއިން މިއަދު ކުރިއަށް ގެންދާ “ކަނޑު ރޯދި އުފާ” ފެސްޓިވަލްގައި ހިލޭ ޖެޓް ސްކީ ދުއްވުމުގެ ފުރުސަތު ލިބިގެންދާނެ ކަމަށް އެ ވުޒާރާއިން ބުނެފިއެވެ.
ޖޫން އަށް ވަނަ ދުވަހު (މިއަދު) ފާހަގަކުރާ ބައިނަލްއަގްވާމީ ކަނޑުތަކުގެ ދުވަހާ ގުޅިގެން މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ކުރިއަށް ގެންދާ ހަރަކާތްތަކުގެ ތެރެއިން "އެންމެން މޫދަށް" ގެނަމުގައި ރާއްޖޭގެ ރަށްރަށުގައި އެކި ހަރަކާތްތައް ވަނީ ރާވާފައެވެ.
އެގޮތުން، މިއަދު ހެނދުނު 9:00 އިން ހަވީރު 18:00 އަށް ހުޅުމާލޭ ފޭސް 1 ގެ ބީޗު ސަރަހަށްދުގައި ކުރިއަށްދާ ކަނޑު ރޯދި އުފާ ފެސްޓިވަލްގައި އެކިއެކި މޫދު ހަރަކާތްތައް ކުރިއަށް ގެންދިޔުމަށް މިނިސްޓްރީން ވަނީ ރާވާފައެވެ.
މި ހަރަކާތްތަކުގެ ތެރެއިން، މޫދު އެކި ކުޅިވަރުތަކުގައި ހިލޭ ބައިވެރި ވުމުގެ ފުރުސަތު ލިބިގެންދާނެ ކަމަށް މިނިސްޓްރީން ވަނީ ބުނެފައެވެ.
މީގެ އިތުރުން، ކަނޑު ރޯދި އުފާ ފެސްޓިވަލްގައި ހިމެނޭ އޯޝަން ވޮރިއަރސް ސްޓޯލް އިން ޑައިވިން ތަޖުރިބާ ކުރުމުގެ ފުރުސަތު ވެސް ބައިބެރިންނަށް ލިބިގެންދާނެ ކަމަށް މިނިސްޓްރީން ބުނެފައިވެއެވެ. އަދި އެނޫންވެސް ގިނަ ހަރަކާތްތައް މިއަދުގެ ފެސްޓިވަލްގައި ކުރިއަށްދާނެ ކަމަށް ބުނެފައިވެއެވެ.
ބައިނަލްއަގުވާމީ ކަނޑުގެ ދުވަސް ފާހަގަކުރުމަށް މިނިސްޓްރީން އިއްޔެ ވަނީ މަސް ރޭހެއްވެސް ބާއްވާފައެވެ. މީގެ އިތުރުން، ސުވާލު މުބާރާތަކާއި، ކުރެހުމުގެ މުބާރާތެއްވެސް މި ދުވަހާއި ގުޅިގެން އަންނަނީ ކުރިއަށް ގެންދަމުންނެވެ. ކޮންމެ މުބާރާތަކުންވެސް ވަނަވަނައަށް އަންނަ ފަރާތްތަކަށް ފައިސާގެ އިނާމް ވަނީ ހުށަހަޅާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
