މިހިނގާ އަހަރުގެ ބަޖެޓުން ކުރި ހަރަދުތައް 15.6 އިންސައްތަ ދަށްކޮށްފި

މިއަހަރަށް ހަރަދުތައް ކުރުމަށް ރައްޔިތުންގެ މަޖިލީހުން ފާސްކުރި ބަޖެޓުން ކުރި ހަރަދުތައް، މިދިޔަ އަހަރުގެ މި މުއްދަތާ އަޅާބަލާއިރު 15.6 އިންސައްތަ ދަށަށް ގޮސްފައިވާކަމަށް މާލީ ވުޒާރާއިން ބުނެފިއެވެ.

ފިނޭންސް މިނިސްޓްރީން ނެރެފައިވާ ދައުލަތުގެ ހަރަދުބަރަދު ރިޕޯޓްގައި ބުނެފައިވަނީ، ހުސްވި އޮގަސްޓްމަހުގެ 28 ގެ ނިޔަލަށް ދައުލަތުން ކޮށްފައިވާ ހަރަދުތައް އެދެވޭ މިންވަރަކަށް ދަށަށް ގޮސްފައިވާކަމަށެވެ. ފާއިތުވި ހަފްތާގެ ނިޔަލަށް ދައުލަތުގެ ބަޖެޓުން 24.8 ބިލިއަން ރުފިޔާ ހަރަދުކޮށްފައިވާއިރު، މިދިޔަ އަހަރުގެ މި މުއްދަތުގެ ތެރޭގައި ކުރި ހަރަދު ހުރީ، 29.3 ބިލިއަން ރުފިޔާގައެވެ.

އަހަރުގެ މިހާތަނަށް ރިކަރަންޓް ހަރަދުތައް ހުރީ 21.4 ބިލިއަން ރުފިޔާގައެވެ. އަދި ކެޕިޓަލް ހަރަދުތައް ހުރީ 3.1 ބިލިއަން ރުފިޔާގައެވެ. މިދިޔަ އަހަރުގެ މި މުއްދަތުގައި ރިކަރަންޓް ހޭދަ 22 ބިލިއަން ރުފިޔާގައި ހުރިއިރު، ކެޕިޓަލް ހޭދަ ހުރީ 7 ބިލިއަން ރުފިޔާގައެވެ.

ރިކަރަންޓް ޚަރަދުގެ 56 އިންސައްތަ ދައުލަތުގެ އޮފީސްތަކުގެ އިދާރީ ހިންގުމާ ގުޅޭ ކަންކަމަށް ހޭދަކޮށްފައިވާއިރު، މިއީ ނިމިގެންދިޔަ އަހަރުގެ މި މުއްދަތާ އަޅައިބަލާއިރު 5.5 އިންސައްތަ ދަށް ޢަދަދެކެވެ. އެގޮތުން އޮފީސް ހިންގުމުގެ ބޭނުމަށް ހޯދާ ތަކެތީގެ ޚަރަދު 14.1 އިންސައްތައިން ދަށްވެފައިވާއިރު، މަރާމާތުކުރުމާއި މެއިންޓެނަންސްގެ ޚަރަދު ވަނީ 16.6 އިންސައްތައިން ދަށްވެފައެވެ. ހަމައެހެންމެ، ދައުލަތުގެ ބަޖެޓުން ދަތުރުފަތުރުކުރުމަށް ކުރެވޭ ހޭދަ މިވަނީ، ނިމިގެންދިޔަ އަހަރާ އަޅައިބަލާއިރު 6 އިންސައްތައިން ދަށްވެފައެވެ. މިއާއި އެކު ދައުލަތުން ފޯރުކޮށްދޭ އެކި އެހީ އަދި ސަބްސިޑީތައް ފޯރުކޮށްދިނުމަށް ކުރެވުނު ހޭދަ ނިމިގެންދިޔަ އަހަރާ އަޅައިބަލާއިރު 7.5 އިންސައްތަ ދަށްވެފައިވާކަމަށް މާލީ ވުޒާރާގެ ރިޕޯޓުން ދައްކައެވެ.

ނިމިދިޔަ ހަފްތާގެ ނިޔަލަށް ކެޕިޓަލް ޚަރަދުގެ ގޮތުގައި ދައުލަތުގެ ބަޖެޓުން 3.1 ބިލިއަން ރުފިޔާ ހޭދަކުރިއިރު، މަގުހެދުމާއި ބްރިޖް އަދި އެއަރޕޯޓް ތަރައްގީކުރުމަށް ހިނގާފައިވާ ޚަރަދު ހިމަނައިގެން، އިންފްރާސްޓްރަކްޗަރ އެސެޓްތަކަށް 2.7 ބިލިއަން ރުފިޔާ މިއަހަރުގެ ތެރޭގައި ވަނީ ހޭދަކޮށްފައެވެ.

ސަރުކާރުން ހަރަދުތައް ކުޑަކުރުމަށް އަމާޡުހިފާފައިވާއިރު، ބައިނަލްއަޤްވާމީ މާލީ އިދާރާތަކުންވެސް ލަފާދީފައިވަނީ ހަރަދުތައް ކުޑަކޮށްގެން ސަރުކާރުގެ ހިންގުމުގެ ކަންތައްތައް ކުރިއަށްގެންދާށެވެ.