އެއާ އެންބިއުލާންސް ގެ ފޮޓޯ ރައީސް ޑރ.މުހައްމަދު މުއިއްޒު އާއްމުކުރައްވައިފި
ރައީސް ޑރ.މުހައްމަދު މުއިއްޒުގެ މުހިއްމު ވައުދުފުޅެއްގެ ގޮތުގައި ހިމެނޭ އެއާރ އެމްބިއުލާންސް ޚިދުމަތް މާދަމާ ފެށުމަށް ހަމަޖެހިފައިވާއިރު އެ ޚިދުމަތުގައި ބޭނުންކުރާނެ މަތިންދާބޯޓްގެ ފޮޓޯއެއް ރައީސް ޑރ. މުހައްމަދު މުއިއްޒު މިރޭ އާއްމުކުރައްވައިފިއެވެ.
މާދަމާ އެއާ އެމްބިއުލާންސްގެ ޚިދުމަތް ފެށުމަށް ހަމަޖެހިފައިވާއިރު ، އެއާ އެމްބިޔުލާންސްގެ އެހީގައި ރާއްޖޭގެ އަތޮޅުތަކުން މާލެއަށް ބަލިމީހުން އުފުލުގެ އިތުރުން ، ރާއްޖެއިން ބޭރަށްވެސް ބަލިމީހުން އުފުލަމުން ދާނެއެވެ.
މާދަމާ އެއާ އެމްބިއުލާންސްގެ ޚިދުމަތްފެށިގެން ދާއިރު ރާއްޖެއިން ބޭރަށް އެއާ އެމްބިއުލާންސް ދަތުރުކުރުމަށް ހަމަޖެހިފައިވަނީ ރާއްޖެ އާއި އެންމެ އަވަށްޓެރި ދެ ޤައުމުކަމަށްވާ ސްރީލަންކާ އަށާއި އިންޑިއާ އަށެވެ. ނަމަވެސް އެއާ އެމްބިއުލާންސްގެ ޚިދުމަތް މިހާރަށްވުރެ ފުޅާކޮށް ތައިލެންޑާ ހަމައަށް ބަލިމީހުން އުފުލޭނެ އިންތިޒާމު ހަމަޖައްސަވަން ރައީސް ޑރ.މުހައްމަދު މުއިއްޒު ވަނީ ވައުދުވެ ވަޑައިގެންފައެވެ.
ލޭންޑް ކްރާފްޓަކާއި ސީ ކްރާފްޓެއް އެއާ އެމްބިއުލާންސްގެ ގޮތުގައި ބޭނުންކުރަން ހަމަޖެހިފައިވާއިރު، ހެލްތު މިނިސްޓަރު ޑރ.ޢަބްދުﷲ ޚަލީލު މިއަދު އޮތް ނޫސްވެރިންގެ ބައްދަލުވުމެއްގައި ވިދާޅުވީ ސީ ކްރާފްޓު ބޭނުންކުރާނީ އެއާޕޯޓު ނެތް ނުވަތަ އެއާޕޯޓަކާ ދުރުގައި ހުރި ރަށްތަކުން ބަލިމީހުން އުފުލަންޖެހޭ ހާލަތްތަކުގައި ބޭނުންކުރުމަށް ކަމަށެވެ.
މީގެ ކުރިން ރާއްޖޭގައި އެއާ އެމްބިއުލާންސްގެ ޚިދުމަތް ދެމުން އައިސްފައި ވަނީ ރާއްޖޭގައި ޤައިމުވެފައި ތިބި އިންޑިއާގެ އަސްކަރީ ސިފައިންގެ އެހީތެރިކަމާއިއެކު އެމީހުންގެ އުނޅަދުފަހަރު ތަކުގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
