ރައީސަށް ލަފާ ދޭ ޒުވާނުންގެ ބޯޑުން ހަތަރު މެންބަރަކު އިސްތިއުފާ ދީފި

ދިވެހި ޒުވާނުންގެ ގައުމީ ލަފާދޭ ކޮމިޓީގެ މެންބަރުންތަކެއް އިސްތިއުފާ ދީފި އެވެ.

އެ ބޯޑުން މެންބަރުންތަކެއް އިސްތިއުފާ ދީފައިވަނީ އޭޕްރިލް 18 ވަނަ ދުވަހު ހ. މިޓާޒް ގޭގެ ފުރާޅު މައްޗަށް އަންހެނަކު ވެއްޓުނު މައްސަލައާ ގުޅިގެން ފުލުހުން ހިންގާ ތަހުގީގާމެދު ޒުވާނުންގެ މެދުގައި އޮތް ކަންބޮޑުވުންތަކާއި ގުޅިގެންނެވެ.

ސަރުކާރުގެ މެނިފެސްޓޯއާއި މުހިންމު ސިޔާސަތުތައް ތަންފީޒުކުރުމުގައި ޒުވާނުންގެ ހިޔާލާއި މަޝްވަރާ ހޯދައި، މިކަންކަމުގައި ކުރިއަށްދާންވީ ގޮތްތަކާއި ގުޅޭގޮތުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒަށް ލަފާ އެރުވުމާއި ތަފާތު އެކި ދާއިރާތަކުން ޒުވާނުންނަށް ކުރިއެރުމަށް ހުރި ހުރަސްތަކާއި ގޮންޖެހުންތައް ދެނެގަނެ، އެކަންކަމާއި މެދު ފުޅާ ދާއިރާއެއްގައި މަޝްވަރާކޮށް، ގައުމީ ފެންވަރުގައި އަދި ސަރަހައްދީ ފެންވަރުގައި ހައްލު ހޯދުމަށް މަސައްކަތް ކުރެވޭނެ ގޮތްތަކާއި ގުޅޭގޮތުން ލަފާ ދިނުމުގެ މަގްސަދުގައި އުފައްދާފައިވާ ކޮމެޓީން އިސްތިއުފާ ދީފައިވަނީ ހަތަރު މެންބަރެކެވެ.

އެއީ ހުވައިނާ މުހައްމަދު ނިހާދު އާއި އައިމިނަތު ރަބާބު އާއި ނިމާލް ހަމީދުގެ އިތުރުން ފާތިމަތު ރާއިއާ ޝަރީފެވެ.

އެ ބޯޑްގެ ރައީސަކަށް ހުންނެވި ދާއޫދު އަޙްމަދު ވަނީ މަގާމުން ވަކި ކުރައްވާފަ އެވެ. ދާއޫދަކީ, މިޓާޒް ގޭގެ ފުރާޅު މައްޗަށް ވެއްޓުނު އަންހެން މީހާއާއެކު އެ ގޭގައި އުޅުނު ފިރިހެން މީހާގެ ބޭބެ އެވެ.

މި މައްސަލާގައި ފުލުހުންގެ ފަރާތުން ސުވާލު އުފެދޭ ގިނަ ކަންތައްތަކެއް ވަނީ ފާހަގަ ކުރެވިފަ އެވެ. ނަމަވެސް ފުލުހުން މިހާރު ގެންދަނީ މައްސަލައާ ގުޅޭ މުހިންމު މައުލޫމާާތުތައް ހާމަކޮށް މިނިވަން އިންސާފުވެރި ތަހުގީގަކަށް މަގު ފަހި ކުރަމުންނެވެ.