ބޭސް ރައްކާކުރާ ގުދަން ތަކުގައި ފިނިހޫނުމިން ބެލޭނެ ނިޒާމެ ގާއިމް ކުރުމުގެ މަސައްކަތް ދަނީ ކުރެވެމުން: ޚަލީލް

ރާއްޖެއިން ބޭރުން އެތެރެކޮށްގެން ބޭސް ބަހަށްޓަމުންދާ ގުދަން ތަކުގެ ފިނިހޫނުމިން ބެލޭނެ ނިޒާމެއް ގާއިމް ކުރުމުގެ މަސައްކަތް ކުރައްވަމުންދާ ކަމަށް ސިއްހަތާއިބެހޭ ވަޒީރު ޑރ އަބްދުالله ޚަލީލު ވިދާޅުވެއްޖެއެވެ.

ރައްޔޮތުންގެ މަޖިލީހުގެ މިއަދުގެ ޖަލްސާއަށް ވަޒީރު ހާޒިރު ކޮށް ސުވާލު ކުރުމަށް ހުޅުވާލި ފުރުސަތުގައި މެންބަރަކު ވަނީ ރާއްޖެއިން ބޭރުން ޔޫކޭ އިން ކޮލިޓީ ބޭސް ގެންނާނެ ކަމަށް ރައީސް ޑރ މުހައްމަދު މުޢިއްޒު އިއުލާން ކުރައްވާފައިވާއިރު އެ މަސައްކަތް ކުރިއަށް ގޮސްފައިވާ ހިސާބަކާއި ގުޅޭގޮތުން ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން މިނިސްޓަރ ވިދާޅުވީ ކޮލިޓީ ބޭސް އެތެރެކުރުމަށް ބޭރުގެ އެކި އެކި ފަރާތްތަކާއި ވާހަކަ ދައްކައިގެން، ބޭހުގެ ފުރަތަމަ ޝިޕްމަންޓް އަށް މިހާރު އޯޑަރ ދެވިފައިވާ ކަމަށެވެ. އަދި އެ ބޭސް ގުދަން ކުރުމަށްޓަކައި އެސްޓީއޯ އިން ވާނޖެހޭ ތައްޔާރީތައްވެސް މިހާރު ވަމުން އަންނަ ކަމަށް ވިދާޅުވުއެވެ.

އިރާދަކުރެއްވިއްޔާ އަޅުގަނޑުމެން މި ބަލަނީ މި ސިޔާސަތުގެ ދަށުން ރާއްޖޭގައި ބޭސް ރައްކާކުރާ ގުދަން ތަކުގައި ޓެމްޕަރޭޗަރ އެނގޭނެ މެކޭނިޒަމްއެއްވެސް ހުރުން. ބޭހަކީ ވަކި ޓެމްޕަރޭޗަރ އެއްގައި ހިފަހަށްޓައިގެން ނޫނީ އޭގެ އެފިކަސީއަށް، ނޫނީ އެއިން އިންސާނާގެ ހަށިގަނޑަށް ކުރާ އަސަރަށް ބަދަލު ތަކެއްް އަންނަ އެއްޗެއް. ވަކި ޓެމްޕަރޭޗަރ އެއްގައި ނެތިއްޔާ އޭގެ މައްސަލަ ތަކެއް އެބަ ކުރިމަތިވޭ. އެހެންވީމާ ޓެމްޕަރޭޗަ މޮނީޓަރ ކުރެވޭނެ މެކޭނިޒަމްއެއްވެސް އަޅުގަނޑުމެން އިރާދަ ކުރެއްވިއްޔާ ކައިރި މުސްތަގުބަލެއްގައި ގާއިމް ކުރެވުގެން ދާނެ

ސިއްހަތާއިބެހޭ ވަޒީރު ޑރ އަބްދުالله ޚަލީލު

ވަޒީރު ވިދާޅުވީ އަލަށް ގެންނަން އޯޑަރ ކޮށްފައިވާ ބޭހުގެ ޝިޕްމަންޓް އަންނަން ވާއިރަށް އެސްޓީއޯގެ ގުދަންތަކުގައި ފިނިހޫނުމިން ބެލޭނެ ނިޒާމް ގާއިމް ކުރުމަށް މަސައްކަތް ކުރައްވަމުންދާ ކަމަށެވެ.

ކަނޑައެޅިފައިވާ މިންގަޑުތަކަށް ފެތޭގޮތަށް ބޭސް ރައްކާކުރާ ގުދަންތައް ގާއިމުކުރުމަށާއި، ޒަމާނީ ޓެކްނޮލޮޖީގެ އެހީގައި މި ގުދަންތައް ސެންޓްރަލީ މޮނިޓަރ ކުރާނެ ނިޒާމެއް ގާއިމުކުރުމަށް ދާދިފަހުން ވަޒީރުންގެ މަޖިލީހުން ލގެ ލަފާއާއެކު ރައީސް މުޢިއްޒު ވަނީ ނިންމާފައެވެ.

މީގެ އިތުރުން ބޭހެއް އުފެއްދުމަށް ބޭނުންކޮށްފައިވާ އެކިއެކި މާއްދާތަކުގެ މިންވަރު (ކުއަންޓިޓީ) ދެނެގަތުމަށް ކުރަންޖެހޭ ތަހުލީލުތައް ހަރުދަނާކުރުމަށް ކުރަންޖެހޭ ކަންކަން ކުރުމަށާއި ބޭހުގެ ފެންވަރު ކަށަވަރުކޮށް އެއްހަމައެއްގައި ހިފެހެއްޓުމަށްޓަކައި ގާބިލުކަން އިތުރުކޮށް، އިންސާނީ ވަސީލަތް އިތުރުކޮށް ތަރައްޤީކުރުމަށްވެސް ވަޒީރުންގެ މަޖީލިހުގެ ލަފާފުޅާއެކު ރައީސުލްޖުމްހޫރިއްޔާ ނިންމަވާފައިވެއެވެ.