ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލަން މަޖިލީހަށް ހުށަހަޅާނަން: ރައީސް މުޢިއްޒު

ދައުލަތުގެ ޚަރަދުތައް ކުޑަ ކުރުމަށް، ރިޔާސީ އިންތިޚާބާއި، ރައްޔިތުންގެ މަޖިލީހުގެ އިންތިޚާބު އެކުއެކީގައި ބާއްވަން، ގާނޫނަށް އިސްލާހު ގެންނަވަން މަޖިލީހަށް ހުށަހަޅުއްވާނެ ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.

މިރޭ ޕީއެންސީގެ ހަރުގޭގައި އޮތް ޖަގަހަ ޖަލްސާގައި ވާހަކަ ދައްކަވަމުން ރައީސް މުޢިއްޒު ވިދާޅުވީ، ރާއްޖޭގެ ސިޔާސީ ނިޒާމް ބައްޓަންވެފައުވާ ގޮތުން، ގިނަ އިންތިޚާބުތަކެއް ބާއްވަންޖެހޭ ކަމަށެވެ. އަދި ރައްޔިތުންގެ ބައިވެރިވުން ސަރުކާރު ހިންގުމުގަައި ހިމެނުމަށް އިންތިޚާބު ތަކަކީ މުހިންމު އެއްޗެއް ނަމަވެސް، އެކަން ކުރެވެންޖެހޭނީ ޚަރަދު ދެކޮޅުޖެހޭ ގޮތަށް ޒިންމާދާރުކަންމަތީގައި ކަމަށެވެ.

ނިމިދިޔަ މަޖިލީހުގެ އިމްތިޚާބު ނިމިގެން ދިޔައިރުގައި، 120 މިލިއަނަށްވުރެ ގިނަ ރުފިޔާ، ރައްޔިތުންގެ ފައިސާ ވަނޫ ޚަރަދުވެފައި. ރިޔަސީ އިންތިޚާބު ނިމުނު އިރު، އެ އިންތިޚާބަށް 180 މިލިއަނަށްވުރެ ގިނަ ރުފިޔާ އެބަހުރި ޚަރަދުވެފައި.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް މުޢިއްޒު ވިދާޅުވީ، ރިޔާސީ އިންތިޚާބާއި، މަޖިލިސް އިންތިޚާބަކީ ވަރަށް ކައިރި ކައިރީ އޮންނަ ދެ އިންތިޚާބު ކަމަށާ، އެހެންކަމުން، އެ ދެ އިންތިޚާބު އެއްކޮށް ބާއްވައިފި ނަމަވެސް ރައްޔިތުންނަށްވެސް އެތައް ފަސޭހައެއް ލިބި، ރައްޔިތުންގެ ފައިސާ ތަކެއްވެސް ސަލާމަތް ކުރެވޭނެ ކަމަށެވެ.

މި ދެ އިންތިޚާބު (ރިޔާސީ އަދި މަޖިލިސް އިންތިޚާބު) އަކީ ކައިރި ކައިރީ، 6 މަސް ދުވަހުގެ ގެޕެއް އޮންނަ އިންތިޚާބެއް. އަޅުގަނޑު ދެކާެ ގޮތުގައި ރައްޔިތުންނަށް އެންމެ ފައިދާ ވާނީ ރިޔާސީ އިންތިޚާބާއި މަޖިލިސް އިމްތިޚާބު އެކުއެކީގައި ބޭއްވުމުން. އޭރުން އަޅުގަނޑުމެންނަށް އެބަ ސަލާމަތްކުރެވޭ މަދުވެގެން 120 މިލިއަން ރުފިޔާ. އެ ފައިސާއިން ނިކަމެތި އެތައް އާއިލާއެއްގެ ކަންކަން ނިންމައިދެވޭނެ. ކުޑަ ރަށެއްގެ މީހުން ދާއިމަށް ބޮޑު ރަށަކަށް ބަދަލުކުރުމަށް ބެއްޔަށަ އެ ފައިސާއިން އެކަން ހަމަޖެހޭނެ. ދެ އިންތިޚާބު އެކުއެކީ ބޭއްވުމުން ރައްޔިތުންނަށްވެސް ވަރަށް ފަސޭހަވާނެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް ވިދާޅުވި ގޮތުގައި އެ ބަދަލު ގެނައުމަށް ޤާނޫނު އަސާސީއަށް ބަދަލު ގެންނަންޖެހޭ ކަމަށެވެ. އަދި ގާނޫނު އަސާސީއަށް އެ އިސްލާހު ގެނެވޭނީ ރައްޔިތުންގެ ފެންނަ ނުފެންނަ ވޯޓެއްވެސް ނަގައިގެން ކަމަށެވެ.

ރައްޔިތުން މިގޮތަށް ނިންމަވައި ދެއްވާފިއްޔާ ގާނޫނުއަސާސީއަށް މި އިސްލާހު ގެނެސް، 2028 ގައި މި ދެ އިންތިޚާބު އެކުއެކީގައި ބޭއްވުމަކީ އަޅުގަނޑު ދެކޭ ގޮތުގައި އެންމެ ރަނގަޅު ގޮތް.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

މިރޭގެ ޖަލްސާގައި ވާހަކަ ދައްކަވަމުން ރައީސް ވަނީ، ރައްޔިތުންގެ މަޖިލީހުގެ މެމްބަރުންގެ އަދަދު 77 އަށް މަދުކޮށް، ކައުންސިލް ތަކުގެވެސް ސައިޒު ކުޑަކުރެއްވުމަށް މަޖިލީހަށް ހަށުހަޅުއްވާނެ ކަން އިއުލާން ކުރައްވާފައެވެ.