އެޖެންޑާ 19އަކީ ދޮންމީހުން އުޅޭ ހެން އުޅުވުން- އުމަރު

އެެޖެންޑާ ނަވާރައަކީ ދޮން މީހުން އުޅޭހެން އުޅުން ކަމަށް ކުރީގެ ހޯމް މިިނިސްޓަރ އުމަރު ނަސީރު ވިދާޅުވެއްޖެއެވެ.

އެޖެންޑާ ނަވާރަ އާއި ގުޅޭގޮތުން އޭނާގެ ޚިޔާލު ފާޅުކުރައްވަމުން އުމަރު ނަސީރު ވިދާޅުވެފައިވަނީ ކުރީގެ ރައީސް ނަޝީދުގެ އެޖެންޑާ ނަވާރައަކީ ކޯއްޗެއްކަން މިހާރު ސާފުވެއްޖެކަމަށެވެ. އުމަރު ވިދާޅުވީ އެޖެންޑާ ނަވާރައަކީ ދޮންމީހުން އުޅޭގޮތަށް އުޅުން ކަމަށެވެ.

"ރާވެސް ބޮވޭނެޔޭ، ޒިނޭވެސް ކުރެވޭނޭ، ޖުވާވެސް ކުޅެވޭނޭ، އެމީހުން އުޅޭނެ ދީނަކަށްވެސް އުޅެވޭނޭ، އެއީ އެޖެންޑާ 19 އަކީ" އުމަރު ވިދާޅުވެފައިވެއެވެ.

އެމްޑީޕީގެ ސަރުކާރެއް އޮވެ، އެޕާޓީއަށް މަޖިލީހުގެ މެޖޯރިޓީ ލިބިއްޖެނަމަ ރާއްޖޭގައި އެހުރިހާ ކަމެއް ކުރެވޭނެ މަގު ފަހިކުރާނެ ކަމަށް އުމަރު ވިދާޅުވިއެވެ.

އުމަރު ވިދާޅުވީ ނަޝީދު ވިދާޅުވަމުން ގެންދަވަނީ ހަމައެކަނި އެމަނިކުފާނުގެ އެކަނި ވާހަކައެއް ނޫން ކަމަށާއި، އެއީ މުޅި އެމްޑީޕީގެ ވެސް ސިޔާސަތުކަމަށެވެ.

ނަޝީދު ގެ ވެރިކަމުގައި ރާއްޖޭގެ މީހުން ދިރިއުޅޭ ރަށްތަކުގައި ރާ ވިއްކުމަށް ތިން ފަހަރެއްގެ މަތިން މަސައްކަތް ކުރި ކަން ފާހަގަކުރައްވާ އުމަރު ވިދާޅުވީ އޭރު އެކަން ކުރެވޭނެ ގޮތަަށް ގަވާއިދު ބަދަލުކޮށް ދެ ފަހަރަކު ދިވެހި ސަރުކާރުގެ ގެޒެޓްގައި ވެސް ޝާއިއު ކުރިކަަމަށެވެ.

އަދި ރާއްޖޭގެ ރަށްތަކުގައި ރާ ވިއްކަން ފަށައިފިނަމަ އެކަން ނުބެލެހެއްޓި، ދިވެހިންގެ ތެރެއިން ގިނަބަޔަކީ ރާ ބޯ ބަޔަކަށް ވެގެންދާނެ ކަމަށެވެ. އަދި އޭގެ ސަަބަބުން ގައުމުގައި އިސްލާމީ ވަންތަކަން ފުނޑުފުނޑުވެގެންދާނެ ކަމަށް އޭނާ ވަނީ ވިދާޅުވެފައެވެ.

އުމަރު ނަސީރު އެޖެންޑާ ނަވާރައަށް ފާޑުވިދާޅުވެ ވާހަކަދައްކަވާފައިވާއިރު، އޭނާ އަންނަނީ ސަރުކާރުގެ ބައެއް ސިޔާސަތުތަކަށް ފާޅުގައި ފާޑު ވިދާޅުވަމުންނެވެ.