ޖުޑިޝަރީ ކޮމިޓީގެ މުޤައްރިރަކަށް ހުސްނީ، ނައިބަކަށް ޑރ. އާނާރާ

ޖުޑިޝަރީ ކޮމިޓީގެ މުޤައްރިރަކަށް ޙުސްނީ މުބާރަކް އަދި ނައިބު މުޤައްރިރަކަށް ޑރ. އާނާރާ ނައީމް އިންތިޚާބުވެއްޖެއެވެ.

އެ ކޮމިޓީގެ މުޤައްރިރަކަށް ޙުސްނީގެ ނަން ހުށަހެޅުއްވީ، މިއަދު ކުރިއަށް ދިޔަ ޖުޑިޝަރީ ކޮމިޓީގެ ފުރަތަމަ ކޮމިޓީ ބައްދަލުވުމުގައި ހުޅުދޫ ދާއިރާގެ މެމްބަރު މުހައްމަދު ޝާހިދެވެ. އަދި މި ހުށަހެޅުމަށް ތާޢީދު ކުރެއްވީ، ފުވައްމުލަކު މެދު ދާއިރާގެ މެމްބަރު އަލީ ފަޒާދެވެ.

ޖުޑިޝަރީ ކޮމެޓީގެ މުޤައްރިރަކަށް ހުސްނީ އިންތިޚާބުވީ 11 މެންބަރުންގެ ވޯޓުންނެވެ.

ކޮމިޓީގެ ނައިބު މުޤައްރިރު ކަމަށް ހުރާ ދާއިރާގެ މެންބަރު ޑރ. އަނާރާ ނަޢީމްގެ ނަން ހުށަހެޅުއްވީ ހުޅުދޫ ދާއިރާގެ މެންބަރު  މުޙައްމަދު ޝާހިދެވެ. މި ހުށަހެޅުމަށް ތާޢީދު ކުރެއްވީ، ހޮޅުދޫ ދާއިރާގެ މެންބަރު އަބްދުއްސައްތާރު މުޙައްމަދެވެ. އެ ކޮމިޓީގެ ނައިބު މުޤައްރިރުކަމަށް، ކެންދޫ ދާއިރާގެ މެންބަރު މަޢުރޫފް ޛާކިރު ވަނީ ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލްގެ ނަން ހުށަހަޅުއްވާފައެވެ. ނަމަވެސް ނާޒިލްގެ ނަމަށް ތާއީދު ނުލިބުމުގެ ސަބަބުން ކޮމިޓީގައި ވޯޓަށް އަހާފައިވަނީ ޑރ. އަނާރާގެ ނަމަށް އެކަންޏެވެ.

ކޮމިޓީ ބައްދަލުވުމުގައި ވާހަކަ ދައްކަވަމުން، މިދިޔަ 19 ވަނަ މަޖިލީހުގައި ނުނިމި ހުރި ކަންތައްތަކާއި ޖުޑިޝަރީއާ ގުޅުންހުރި ގިނަ ކަންތައްތަކެއް ހުރި ކަމަށް ޤަބޫލުފުޅު ކުރެއްވޭ ކަމަށް ހުސްނީ މުބާރަކް ވިދާޅުވިއެވެ. އަދި ވާހަކަ ދައްކަވަމުން ޑރ. އާނާރާ ވިދާޅުވީ ޖުޑިޝަރީ ކޮމިޓީ އަކީ ވަރަށް މުހިންމު ކޮމިޓީއެއް ކަމަށެވެ. ޤައުމެއްގެ ނިސްބަތުން ބަލާއިރު އަދުލު އިންސާފު ޤާއިމުވުމަކީ މުހިންމުކަމެއް ކަމަށާއި ކޮމިޓީގައި ވަރަށް މުހިންމު ދައުރެއް އަދާ ކުރެވޭނެ ކަމަށްވެސް ޑރ.އަނާރާ ވިދާޅުވިއެވެ.