ޗައިނާއާ ދެކޮޅަށް ފިލިޕީންސްއިން ދެވަނަ މައްސަލަ ހުށަހަޅަނީ!
ލިޔުންތެރިޔާ
އަބްދުﷲ ހުސައިން
ޗައިނާއާއި ދެކޮޅަށް އިންސާފު ހޯދުމުގެ ދެވަނަ މައްސަލައެއް ހުށަހަޅަން ފިލިޕީންސްއިން ތައްޔާރުވެއްޖެއެވެ.
ޗައިނާގެ އަމަލުތަކުގެ ސަބަބުން ދެކުނު ޗައިނާ ކަނޑާއި، ފިލިޕީންސްގެ ޚާއްސަ އިގްތިސާދީ ސަރަހައްދުގެ ކަނޑަށް ލިބުނު ތިމާވެށީގެ ގެއްލުންތަކުގެ ބަދަލު ހޯދުމަށް ބައިނަލްއަގްވާމީ ކޯޓަކަށް މިއަހަރު ދާނެކަމަށް ފިލިޕީންސްގެ ޖަސްޓިސް ސެކްރެޓަރީ ކްރިސްޕިން ރެމުލާ ވަނީ އިއުލާންކުރައްވާފައެވެ. ފިލިޕީންސްއިން މިހާރު ބަލަމުންދަނީ އެމައްސަލަ ވައްދާނީ ބައިނަލްއަގްވާމީ ކޮން ކޯޓަކަށްތޯއެވެ. ޕާމަނެންޓް ކޯޓް އޮފް އާބިޓްރޭޝަން ނުވަތަ އިންޓަނޭޝަނަލް ކޯޓް އޮފް ޖަސްޓިސްއަށް މައްސަލަ ހުށަހެޅުމުގެ ފުރުސަތު އެބައޮތެވެ.
މީގެ ކުރިން، ދެކުނު ޗައިނާ ކަނޑުގެ މައްޗަށް ޗައިނާއިން ކުރާ ދައުވާގެ މައްސަލަ ފިލިޕީންސްއިން ވަނީ ޕާމަނެންޓް ކޯޓް އޮފް އާބިޓްރޭޝަނަށް ހުށަހަޅައިގެން، 2016 ވަނަ އަހަރު ކާމިޔާބުކޮށްފައެވެ. އެހެންކަމުން މިއީ ފިލިޕީންސްއިން ޗައިނާއާ ދެކޮޅަށް ދެކުނު ޗައިނާ ކަނޑުގެ މައްސަލައިގައި ބައިނަލްއަގްވާމީ ކޯޓަށްދާ ދެވަނަ މައްސަލައެވެ. 2016 ވަނަ އަހަރު އާބިޓްރޭޝަނުން ނިންމީ ދެކުނު ޗައިނާ ކަނޑުގެ މިލްކުވެރިކަމާމެދު ޗައިނާއިން ކުރާ ދައުވާއަކީ އަސްލެއްނެތް ދައުވާއެއްކަމަށެވެ.
ފިލިޕީންސްއިން ބުނާ ގޮތުގައި ދެކުނު ޗައިނާ ކަނޑުގައި ޗައިނާއިން ފަޅުތަކާއި ފަރުތައް ހިއްކައިގެން ހަދާފައިވާ ރަށްތަކުގެ ސަބަބުން މުޅި އެސަރަހައްދުގެ ތިމާވެށްޓާއި ކަނޑުގެ ދިރުން ވަނީ ހަލާކުވެފައެވެ. ސެންޓަރ ފޮރ ސްޓްރެޓީޖިކް އެންޑް އިންޓަނޭޝަނަލް ސްޓަޑީޒް އިން 2023 ވަނަ އަހަރު ނެރުނު ރިޕޯޓެއްގައި އަންދާޒާކުރި ގޮތުގައި ޗައިނާއިން ބިން ހިއްކުމުގެ ސަބަބުން 1900 ހެކްޓަރާއި ގާތްކުރާ މިންވަރަކަށް ފަރުތައް ވަނީ ހަލާކުވެފައެވެ. ފިލިޕީންސްއިން ބުނީ މިއީ މަދަނީ މައްސަލައެއްކަމަށާއި، އެގައުމުން އެދޭނީ ޗައިނާގެ އަމަލުތަކުގެ ސަބަބުން ލިބުނު ގެއްލުމުގެ ބަދަލު ނަގައިދިނުމަށް ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
