މިހާތަނަށް ބެލިބެލުމުން ޖަމީލަށް ޖިސްމާނީ ގޮތުން އެއްވެސް އަނިޔާއެއް ދީފައިވާކަން އެނގޭކަށް ނެތް: ފުލުހުން

މާފުށީ ޖަލުގައި ޝަރީޢަތް ނިމެންދެން ބަންދުކޮށްފައި ހުއްޓާ ނިޔާވި މުޙައްމަދު ޖަމީލަށް ޖިސްމާނީ ގޮތުން އެއްވެސް އަނިޔާއެއް ދީފައިވާކަން މިހާތަނަށް ބެލި ބެލުމުން އެނގެން ނެތް ކަމަށް ފުލުހުން ބުނެފިއެވެ.

ޖަމީލްގެ މަރާއި ގުޅިގެން މިއަދު ފުލުހުން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ޗީފް އިންސްޕެކްޓަރު ވިދާޅުވީ، އޭނާ މާފުށީ ހޮސްޕިޓަލަށް ގެންދިއުމުން ފޮރެންސިކް އަދި ތަހުގީގު ފުލުހުން ގޮސް މައުލޫމާތު ސާފުކުރި ކަމަށާއި، ހަށިގަނޑުގައި ނިޝާންތަކެއް ހުރިނަމަވެސް، އޭނާއަށް ޖިސްމާނީ ގޮތުން މީހަކު އަނިޔާއެއް ދީފައިވާކަމަށް ނުބެލެވޭކަމަށެވެ.

ހަމައެއާއިއެކު، ފުލުހުން ބުނީ، ޖަމީލް ހުރި ގޮޅިއަށް ދިޔައިރު،  އޭނާ ސަޖިދައަށް ގޮސް އޮތުމުގައި އެއްވެސް ޙަރަކާތެއް ނެތި އޮއްވައި ފެނުނު ކަމަށާއި، އޭނާގެ އަނގައާއި ނޭފަތުން ފޮނު ޒާތުގެ އެއްޗެއް ބޭރުވެފައި ހުރިކަަން ފާހަގަވި ކަމަށެވެ. މި މައްސަލައިގައި މިހާތަނަށް ބެލި ބެލުމުގައި ވެސް އެއްވެސް މީހަކު ޖަމީލަށް ގޯނާއެއް ކުރިކަމުގެ މައުލޫމާތެއް ލިބިފައި ނުވާ ކަމަށް ވެސް ފުލުހުން ބުނެއެވެ.

ޖަމީލް ހުރި ގޮޅީގެ ކެމެރާ ފޫޓޭޖް ފުލުހުން މި ބައްދަލުވުމުގައި ދެއްކިއިރު، އެކަމާއި ގުޅޭގޮތުން ފުުލުހުން ބުނީ އެ ފުޓޭޖުންވެސް  އެ ގޮޅިއަށް އެރޭ 09:30 އިން ހެނދުނު 11:34 ގައި ޖަލު ބަލަހައްޓާ އޮފިސަރަކު ވަދެފައިވާ ތަން ނުފެންނަ ކަމަށެވެ.

" މުހައްމަދު ޖަމީލްގެ ހަށިގަނޑު ބެލިބެލުމުން އަޅުގަނޑުމެންނަށް ހަށިގަނޑުގައި ފާހަގަކުރެވޭ ބައެއް ކަހަލަ ނިޝާންތަކެއް ހުރި ނަމަވެސް، އެހިނދާއި ހަމައަށް ނުވަތަ މިއަދާއި ހަމައަށް ވެސް އަޅުގަނޑުމެން މި ކުރި ތަހުގީގުން މުހައްމަދު ޖަމީލްގެ ހަށިގަނޑަށް ލިބިފައިވަނީ އެއްވެސް ފަރާތަކުން ޖިސްމާނީ ގޮތުން ދީފައިވާ އަނިޔާތަކެއް ކަމަށް ގަބޫލެއް ނުކުރެވޭ."

ޗީފް އިންސްޕެކްޓަރު ވިދާޅުވިއެވެ.

ހަމައެއާއިއެކު، ޖަމީލްގެ ހަށިގަނޑުގެ ސީޓީ ސްކޭނެއްވެސް ހަދާފައިވާކަން ފާހަގަކޮށް ފުލުހުން ބުނީ  އޭގެ ނަތީޖާ އަދި ލިބިފައި ނުވާ ކަމަށެވެ.

ނުރައްކާތެރި އަދި ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ މައްސަލައެއްގައި ބަންދުކޮށްފައި ހުރި ޖަމީލު ގޮޅިން ބޭރަށް ނުނިކުމެ، ހަރަކާތް ނުކޮތް ގިނައިރު އޮތްކަން ފާހަގަ ކުރެވިގެން މާފުށީ ޖަލުގެ މެޑިކަލް ސެންޓަރަށް ގެންގޮސް ސީޕީއާރް ދީފައިވާ ކަމަށް ކަރެކްޝަނުން ވަނީ ބުނެފައެވެ.

ނަމަވެސް، ހާލަތަށް އެއްވެސް ބަދަލެއް ނައުމާ ގުޅިގެން، 12:13 ހާއިރު މާފުށީ ސިއްޙީ މަރުކަޒަށް ގެންގޮސް އޭނާއަށް ފަރުވާ ދޭން ފެށި ކަމަށާ، 12:45 ގައި ޑޮކްޓަރު ވަނީ މުޙައްމަދު ޖަމީލްގެ ހިތް ހުއްޓިގެން ނިޔާވިކަމަށް ކަނޑައަޅާފައިވާ ކަމަށް ކަރެކްޝަންސް އިން މައުލޫމާތު ދީފައިވެއެވެ.

ޕޯސްޓްމޯޓަމް ހެދުމަށް އާއިލާގެ ހުއްދަ ނުލިބުމުން، ޖަމީލްގެ ހަށިގަނޑު ވަނީ މިއަދު ފަތިހު ވަޅުލާފައެވެ.