ހަ ގައިދީންނަށް އަނިޔާވި، ކޮމާންޑަރު ސަސްޕެންޑްކޮށްފިން: އިމްރާން
މާފުށީ ޖަލުގައި ހިނގައިދިޔަ ހަމަނުޖެހުމުގައި ހަ ގައިދީއަކަށް އަނިޔާވިކަމަށް ހޯމް މިނިސްޓަރ އައްޝައިޚް އިމްރާން އަބްދުﷲ ވިދާޅުވެއްޖެއެވެ.
މާފުށީ ޖަލަށް ޒިޔާރަތްކުރެއްވުމަށްފަހު ނޫސްވެރިންނާއި ބައްދަލުކުރައްވާ ވާހަކަފުޅު ދައްކަވަމުން އިމްރާން ވިދާޅުވީ މިދިޔަ ބުރާސްފަތިދުވަހު ޖަލުގައި ހިނގި ހަމަނުޖެހުމުގައި ހަ ގައިދީއަކަށް އަނިޔާވި ކަމަށެވެ.
މި ހަމަނުޖެހުން އުފެދުނީ ޖަލުގެ އޮފިސަރަކަށް ގައިދީއަކު ހަމަލާދިނުމުން ކަމަށް އިމްރާން ފާހަގަކުރެއްވިއެވެ.
މިކަމާއި ގުޅިގެން ކަރެކްޝަނަލް ސާވިސްގެ އިމަޖެންސީ ސަޕޯޓް ގްރޫޕް (އީއެސްޖީ)ގެ ކޮމާންޑަރަކު ސަސްޕެންޑްކުރިކަމަށްވެސް މިނިސްޓަރ ވަނީ ހާމަކުރައްވާފައެވެ.
ބައެއް މީޑިޔާތަކުން ރިޕޯޓްކުރާ ގޮތުގައި އެއް ގޮޅިއެއްގައި އޮތް އެއްޗެއް އަނެއް ގޮޅިއަށް ގެނެސްދޭން ދެކޮޅު ހެދުމުން ހިނގައިދިޔަ މި ހަމަނުޖެހުމަށްފަހު، ޖަލުގެ އޮފިސަރުން ވަނީ ބައެއް ގައިދީންނަށް އަނިޔާކޮށްފައެވެ. އެގޮތުން ގައިދީންގެ ބޯބާލައި، ކުރިމަތީ ފަރާތާއި ފުރަގަސް ފަރާތަށް އަމާޒުކޮށް ޕެޕަރސްޕްރޭ ޖަަހައި ހެދިކަމަށްވެސް ވަނީ ބުނެފައެވެ.
މި އަނިޔާގެ ތުހުމަތުތަކާއި ގުޅިގެން ކަރެކްޝަންސްއިން އަދި އެއްޗެއް ނުބުނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
