ރަމަޟާން މަހުގެ ފަހު 10 ބަންދުވިޔަސް ، ރައްޔިތުން ބޭނުންވާ ހިދުމަތްތައް ލިބޭނެ

މިއަހަރުގެ ރަމަޟާން މަހުން ފެށިގެން، ކޮންމެ އަހަރެއްގެވެސް ބަރަކާތްތެރި ރަމަޟާން މަހުގެ ފަހު 10 ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސައި އެކަމާ ގުޅޭ ރަސްމީ ދެންނެވުން ރައީސް އޮފީހުން މިއަދު އާންމު ކުރައްވައިފިއެވެ.

މިކަން ހާމަކުރައްވާ މިއަދު ރައީސް އޮފީހުން އާއްމުކުރެއްވި ދެންނެވުމުގައި ވަނީ އިސްލާމީ އުސޫލުތައް ގާއިމުކުރުމާއި، ދީނީ ކަންކަމަށް ރައްޔިތުން ލޯބި ޖެއްސުމާއި، ދީނީ ކަންކަމަށް އިސްކަންދިނުމަށް ފުރުޞަތު ދިނުމުގެ ގޮތުން، ރަމަޟާންމަހުގެ ފަހުދިހައިގެ ދުވަސްތަކަކީ، ސަރުކާރު ބަންދު ދުވަސްތަކެއް ކަމަށް ހަމަޖައްސަވަން ނިންމަވާފައިވާ ކަމަށެވެ.

ރައީސް އޮފީހުން ނެރުއްވި ދެންނެވުމުގައި ވިދާޅުވީ ރަމަޟާންމަހުގެ ފަހު ދިހައެއްގައި ސަރުކާރު ބަންދުކުރެއްވިނަމަވެސް ރައްޔިތުންނަށް ކޮންމެހެން ދޭންޖެހޭ ޚިދުމަތްތައް، ކަނޑައަޅާ އުސޫލެއްގެ މަތިން ރައްޔިތުންނަށް ފޯރުކޮށްދެވުމަށް ސަރުކާރުގެ މުއައްސަސާތަކާއި ކުންފުނިތަކާއި އިދާރާތަކުން އަންގަވާފައިވާކަމަށެވެ.

މައުލޫމާތު ލިބިފައިވާ ގޮތުގައި މިކަމާ ގުޅޭގޮތުން ރައީސް އޮފީހުން މިހާރުވަނީ ރައްޔިތުންނަށް ކޮންމެހެން ބޭނުންވާ އަސާސީ އެކި ހިދުމަތްތައް ދެއްވަމުން ގެންދަވާ ސަރުކާރުގެ މުއައްސަސާތަކާއި އަދި ކުންފުނިތަކާ ބައްދަލުކުރައްވައި، ރަމަޟާން މަހުގެ ފަހު ދިހައިގެ ދުވަސްތަކުގައި ޚިދުމަތްތައް ދެއްވުމުގައި ހަމަޖައްސަވަންޖެހޭ އިންތިޒާމުތައް ހަމަޖެއްސެވުމާ ގުޅޭގޮތުން މަޝްވަރާ ކުރައްވާފައެވެ.

ރަމަޟާން މަހުގެ ފަހު ދިހައެއް ބަންދުކުރެއްވުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ރިޔާސީ ވައުދަކަށްވާއިރު، ކޮންމެ އަހަރެއްގެ ވެސް ރަމަޟާން މަސް އަދި ވަކިން ހާއްސަކޮށް ރަމަޟާން މަހުގެ ފަހު ދިހައެއް ވެގެން ދަނީ ގިނަބަޔަކު އަޅުކަމާއިގެން މަސްޢޫލުވެ އުޅޭ ދުވަސްވަރަކަށެވެ.

ދިވެހިންނަކީ ސައްތައިން ސައްތަ އިސްލާމުންކަމަށް ވީހިދު ރަމަޟާންމަހުގެ ފަހު 10 ބަންދުވެގެން ދިއުމަކީ ދިވެހިންގެ ހިތްތަކަށް ހިތްހަމަޖެހުމާއި އުފާވެރިކަން ލިބިގެންދާނެކަމެއްކަން ކަށަވަރެވެ.