''ޢައުރަ ނިވައިކުރުމުގެ ކަންކަމަކީ ދީނުގެ ދުޝްމަނުންނަށް ހަޖަމްކުރަން ދަތި ކަންތައްތަކެއް''

‏އައުރަ ނިވާކުރުމަށް މަގުފަހިވާނެ ކަންކަމަކީ ދީނުގެ ދުޝްމަނުންނަށް ހަޖަމްކުރަން ދަތި އުނދަގޫ ކަމެއް ކަމަށް އިސްލާމިކް ޔުނިވަރސިޓީގެ ވައިސް ޗާންސެލަރ ޑރ. ޢަލީ ޒާހިރު ބިން ޤާސިމް ވިދާޅުވެއްޖެއެވެ.

ޑރ ޢަލީ ޒާހިރު މިއަދު މީސްމީޑިއާގައި ކުރެއްވި ޕޯސްޓެއްގައި ވިދާޅުވީ، ޢައުރަ ނިވައި ކުރުމަށް ދީނުގައި ބާރު އަޅާފައިވާއިރު އެކަމަށް މަގުފަހިވާގޮތަށް އެއްވެސް ކަމެއް މެދުވެރިވެއްޖެނަމަ ޙަޤީޤީ މުސްލިމުން އެކަމަށް އުފާކުރާނެ ކަމަށެވެ.

‏”އެހެނެއްކަމަކު ދީނުގެ ދުޝްމަނުންނަށް އެކަންވާނީ ހަޖަމްކުރަން ދަތި އުނދަގޫ ކަމަކަށެވެ.“ ޝެއިޚް ޢަލީ ޒާހިރު ވިދާޅުވިއެވެ.

ޝެއިޚް މިފަދައިން ވިދާޅުވެފައިމިވަނީ ދާދިފަހުން ސިވިލްސާވިސް މުވައްޒަފުންގެ ހެދުން އެޅުމުގެ ގަވާއިދަށް ގެނެވުނު އިސްލާހުގައި އަންހެން މުވައްޒަފުންގެ ހެދުން އެޅުމުގެ މިންގަނޑާއި ބޮލުގެ އިސްތަށިގަނޑު ހުންނަންޖެހޭ ގޮތަށް ގެނެވުނު ބަދަލާއިގުޅިގެން އިދިކޮޅު އެމްޑީޕީއާއި އެޕާޓީގެ އިސްވެރިން ސަރުކާރަށް ފާޑުވިދާޅުވަމުންދާ ދަނޑިވަޅެއްގައެވެ.

އެގޮތުން ސަރުކާރުގެ އޮފީސްތަކުގައި މަސައްކަތްކުރާ މުއައްޒަފުން ހެދުން އެޅުމުގައި އަލަށް އެކުލަވާލި މިންގަނޑުތަކަށް ބަލާއިރު، އަންހެން މުވައްޒަފުން ރަސްމީ މަސައްކަތަށް ނުކުންނައިރު އަޅާހެދުން ހުންނަންޖެހޭނީ ބުޑު ނިވާވާ ގޮތަށް ފަލަމަސްގަނޑާ ހަމައަށެވެ. އަދި ކަރުވަޅުވެސް ހުންނަންވާނީ ނިވާ ކޮށްފައެވެ. މީގެ އިތުރުން އިސްތަށިގަނޑުގައި ފާޅުކަންބޮޑު ކުލަ ޖެއްސުންވެސް ވަނީ މަނާކޮށްފައެވެ.

އެކަމާއި ގުޅިގެން ނުރުހުންފާޅުލުރައްވައި ކުރީގެ ރައީސް މުހައްމަދު ނަޝީދު މިއަދު އެކްސްގައި ކުރެއްވި ޕޯސްޓެއްގައި ވަނީ މުސްލިމް ޖިންސުންލަތީފުންގެ ޒީނަތްތެރިކަމާއި ނަޒާހަތްތެރިކަން ހިފެހެއްޓުމުގެ ނަމުގައި އެބައިމީހުންގެ އެންމެ ޒާތީ ކަންތައްތަކާ ދައުލަތް ހިންގަންތިބި ފަރާތްތަކުން ގޮތްކިޔަމުން ގެންދާކަން ފާހަގަކުރައްވައި، ޖިންސުންލަތީފުންގެ ޒާތީ ކަންކަމުގެ ތެރެއަށް ދައުލަތުން ވަދެ، ގޮތް ކިޔައިދޭން ނުޖެހޭ ކަމަށް ވިދާޅުވެފައެވެ.

މީގެ އިތުރުން ކުރީގެ އިކޮނަމިކް މިނިސްޓަރު އަދި އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލްވެސް ވަނީ އެއީ މުވައްޒަފުންގެ ޒާތީ މިނިވަންކަން ފޭރިގަތުން ކަމަަށް ވިދާޅުވެފައެވެ.

ހަމައެހެންމެ އެމްޑީޕީންވެސް އެކަމާ ގުޅޭ ނޫސްބަޔާނެއް ނެރެ، އެއީ އަންހެން މުވައްޒަފުންގެ ފަރުދީމިނިވަންކަމަށް ހުރަސްއެޅުމަށާއި، ޒާތީ މިނިވަންކަން ހަނިކުރުމުގެ ގޮތުން ކޮށްފައިވާ ކަމެއް ކަމަށް ސިފަކޮށްފައިވެއެވެ.