ސިޔާސީ ގޮތުން ބަދަލެއް ނުހިފާނަން، ފިޔަވަޅު އަޅާއިރު މޫނެއް ކަނދުރާއަކަށް ނުބަލާނަން: ރައީސް މުޢިއްޒު
ރައްޔިތުން ބޭނުންވިގޮތަށް މިގައުމުން ބަދަލު ހިފުމުގެ ރޫހު ނައްތާލެވިފައިވާ ކަމަށާއި، ސިޔާސީ ގޮތުން ބަދަލު ނުހިއްޕަވާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެއެވެ.
ރޭގައި ކުރިއަށްދިޔަ ޕީއެންސީ ޖަގަހަ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީ، ސިޔާސީ ގޮތުން ކިތަންމެ ދޮގެއް ހެދިޔަސް ހައްޔަރު ކުރާނެ މީހެއް ނުހުންނާނެ ކަމަށާއި، މި ސަރުކާރު ވެރިކަމަށް އައިސް ފާއިތުވެގެން ދިޔަ 7 މަހުގެ ތެރޭގައި ސިޔާސީ ވިސްނުމެއްގައި އެއްވެސް މީހަކު ހައްޔަރު ކޮށްފައިނުވާއިރު، ކުރިއަށް އޮތް ތަނުގައި ވެސް އެމަންަރު ނުފެންނާނެ ކަމަށެވެ.
"ސިޔާސީ ގޮތުން ކިތަންމެ ދޮގެއް ހެދިޔަސް ހައްޔަރު ކުރާނެ މީހެއް ނުހުންނާނެ. ސިޔާސީ ބަދަލުހިފުމެއް ނުހިފާނަން. ބަދަލު ހިފުމުގެ ރޫހު ނައްތާލަން ދިވެހި ރައްޔިތުން ބޭނުންވީ. އެކަން މިވަނީ މި ގައުމު މިހާރު ނައްތާލާފައި. ނުފެންނާނެ ބަދަލު ހިފުމުގެ ރޫހެއް މިގައުމަކުން. އަޅުގަނޑުމެންނާއެކީ ރައްޔިތުން ތިބިހާ ދުވަހަކުން މިގައުމުން ބަދަލު ހިފުމުގެ ރޫހެއް ނުފެންނާނެ. ނުފެންނާނެ މިދަންނަވަނީ، ނުފެންނާނޭ."
ރައީސް ޑރ.މުޢިއްޒު ވިދާޅުވިއެވެ.
ސިޔާސީ ގޮތުން ބަދަލު ނުހިފި ނަމަވެސް، އަދުލު އިންސާފު ގާއިމު ކުރެވޭނެ ކަން ފާހަގަކުރައްވަމުން ރައީސް ޑރ.މުޢިއްޒު ވިދާޅުވީ ރާއްޖޭގައި ކޮރަޕްޝަނާއި ވައްކަމާއި ނާޖާއިޒު ގޮތެއްގައި ގަވައިދާ ހިލާފަށް ކަންކަން ކުރުމަށް ފުރުސަތު ނޯންނާނެ ކަމަށެވެ.
ރައީސް ޑރ.މުޢިއްޒު ވިދާޅުވީ، އެކަންކަން އޮންނަ އުސޫލުގެ ތެރެއިން ބެލުމަކީ ބަދަލު ހިފުން ނޫން ކަމަށާއި، އެއީ އަދުލު އިންސާފު ގާއިމު ކުރުން ކަމަށެވެ. އެ އުސޫލުގެ ތެރެއިން ކުރީގެ ސަރުކާރުންނާއި ކުންފުނިތަކާއި އެނޫންވެސް އެހެނިހެން ފަރާތްތަކުން ހިންގާފައި ހުރި ކަންތައްތައް ނިޒާމުގެ ތެރެއިން ބަލައި، އަޅަން ޖެހޭ ފިޔަވަޅެއް އޮތިއްޔާ 'މޫނެއް ކަނދުރާއެއް' ބެލުމެއް ނެތި ފިޔަވަޅު އަޅުއްވާނެ ކަމުގެ ޔަގީންކަން ރައީސް ޑރ.މުޢިއްޒު ވަނީ ދެއްވާފައެވެ.
"އަދުލު އިންސާފު ގާއިމު ކުރެވޭނެ. ކޮރަޕްޝަނަކަށް ފުރުސަތެއް ނޯންނާނެ. ވައްކަމަކަށް ފުރުސަތެއް ނޯންނާނެ. އެކަންކުރާ މީހަކު ހެއްކާއެކީގައި އަޅުގަނޑު ކުރިމައްޗަށް މިހާރު ގެނަޔަސް އިސްވެ ފިޔަވަޅު އަޅާނަން އަޅުގަނޑު އެމީހާއި ދެކޮޅަށް."
ރައީސް ޑރ.މުޢިއްޒު ވިދާޅުވިއެވެ.
މީގެ އިތުރުންވެސް ރައީސް ޑރ.މުޢިއްޒު ވިދާޅުވީ، ކޮންމެ ކަހަލަ މާހައުލެއްގައި އެމަނިކުފާނަށް ނިސްބަތްކޮށް ފާޑުކިޔަސް މައްސަލައެއްނެތް ކަމަށާއި، އެއީ އެމަނިކުފާނަށް އާ ކަމެއް ނޫން ކަމަށެވެ. ހައްދަވާނީ ތެދުކަމަށާއި، ދެއްވާނީ ތެދު ޖަވާބުކަން ފާހަގަކުރައްވަމުން ރައީސް ޑރ.މުޢިއްޒު ވިދާޅުވީ އެކަމަށް ފާޑު ކިޔަން ބޭނުންވި ވަރަކަށް ފާޑު ކިޔޭނެ ކަމަށެވެ. ނަމަވެސް ފާޑު ކިޔުމުގައި ވެސް ތެދުބަހުން ވާހަކަދެއްކުމަށް ރައީސް ޑރ.މުޢިއްޒު ހިތްވަރު ދެއްވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
