ދެކުނު ޗައިނާ ކަނޑުގެ މައްސަލައިގައި ޗައިނާގެ ފިއްތުންތައް ގިނަ ވެއްޖެ: ފިލިޕީންސް
ލިޔުންތެރިޔާ
އަބްދުﷲ ހުސައިން
ދެކުނު ޗައިނާ ކަނޑުން ފިލިޕީންސްއަށް ހައްގުވާ ބައިގެ މިލްކުވެރިކަމާމެދު ދައުވާކުރުން ހުއްޓާލުމަށް ޗައިނާއިން ކުރާ ފިއްތުންތައް އިތުރުވެފައިވާކަމަށް ފިލިޕީންސްއިން ބުނެފިއެވެ.
ފިލިޕީންސްގެ ސެކެޓްރީ އޮފް ނޭޝަނަލް ޑިފެންސް ޖިލްބާޓޯ ތިއޮޑޯރޯ މިހެން ވިދާޅުވީ އޮސްޓްރޭލިއާގެ ވެރިރަށް ކެމްބެރާގައި އެގައުމުގެ ދިފާޢީ ވަޒީރާއެކު ބޭއްވި ބައްދަލުވުމަކަށްފަހު، މީޑިއާތަކާ ވާހަކަ ދައްކަވަމުންނެވެ. މިއީ މިދިޔަ އަހަރުގެ އޮގަސްޓް މަހުގެ ފަހުން މި ދެގައުމުގެ ދިފާޢީ ވަޒީރުން ބައްދަލުކުރެއްވި ފަސް ވަނަ ފަހަރެވެ. މިއީ ޗައިނާއިން ދެކުނު ޗައިނާ ކަނޑައަށް އަތް ގަދަކޮށް، ހުޅަނގުގެ ބާރުތަކަށް ޕެސިފިކް ސަރަހައްދުގައި ބިރަކަށް ޗައިނާ ވެދާނެކަމަށް ބެލެވޭ ދަނޑިވަޅެއްގައި ފިލިޕީންސްއާއި އޮސްޓްރޭލިއާގެ ދިފާޢީ ގުޅުން އިތުރަށް ބަދަހިވަމުންދާކަމުގެ ހެއްކެކެވެ.
ނޫސްވެރިންނާއި ވާހަކަ ދައްކަވަމުން ތިއޮޑޯރޯ ވިދާޅުވީ ދެކުނު ޗައިނާ ކަނޑުގެ ފިލިޕީންސްގެ މިލްކުވެރި ސަރަހައްދަކީ ފިލިޕީންސްގެ އަމިއްލަ ސަރަހައްދުކަމަށާއި، އެތަނުގެ ބޭނުންކޮށް އެތަނުގެ ނަފާ ފިލިޕީންސް ރައްޔިތުންނަށް ހޯދައިދިނުމަށް މަސައްކަތްކުރުމަކީ އެގައުމުގެ ސަރުކާރުގެ ވާޖިބެއްކަމަށެވެ. އަދި އެކަން ނުކޮށް، އެސަރަހައްދު ދޫކޮށްލަން ޗައިނާއިން ބާރު އެޅިޔަސް އެކަން ނުވާނެކަމަށް އޭނާ ވިދާޅުވިއެވެ.
ދެކުނު ޗައިނާ ކަނޑުގައި ފަހަކަށް އައިސް ޗައިނާއާއި ފިލިޕީންސްއާއި ދެމެދު ކުރިމަތިލުންތައް ހިނގުން ވަނީ އިތުރުވެފައެވެ. އަދި ބޮޑު ހައިޖާނަކަށް މިކަން ވެދާނެކަމުގެ ބިރު ވަނީ ހީވެފައެވެ.
ފިލިޕީންސްގެ ދިފާޢީ ވަޒީރުގެ ބަސްފުޅާ ގުޅިގެން ޗައިނާގެ ޚާރިޖިއްޔާއިން ބުނީ ދެކުނު ޗައިނާ ކަނޑުގައި ފިލިޕީންސްއާއި ޗައިނާ ކުރިމަތިލާ ކޮންމެ ފަހަރަކު އިސްވެ ގޯސް ހަދަނީ ފިލިޕީންސް ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
