ކެނެޑާ ބޮޑުވަޒީރު ކާނީގެ ޗައިނާ ދަތުރުފުޅާއެކު ދެ ގައުމުގެ ގުޅުން ރަނގަޅުވަމުން އަންނަ ކަމަށް ވިދާޅުވެއްޖެ

ކެނެޑާގެ ބޮޑުވަޒީރު މާކް ކާނީ ޗައިނާއަށް ކުރައްވަމުން ގެންދަވާ ތާރީޚީ ދަތުރުފުޅުގައި، ދެ ގައުމުގެ ދެމެދުގައި އޮތް ގުޅުން ބަދަހިވަމުންދާކަމަށާ، ދެ ގައުމަކީ އެކި ދާއިރާތަކުން އިސްތިރާތީޖީ ބައިވެރިންނަށް ވުމުގެ މަގު ފަހިވެފައިވާ ކަމަށް އެމަނިކުފާނު މިއަދު ވިދާޅުވެއްޖެއެވެ.

ކާނީގެ މިދަތުރުފުޅަކީ 2017 ވަނަ އަހަރަށްފަހު ކެނެޑާގެ ބޮޑުވަޒީރަކު ޗައިނާއަށް ކުރައްވާ ފުރަތަމަ ދަތުރުފުޅެވެ.

ބެއިޖިންގްގައި ޗައިނާގެ އިސް ގާނޫނު ހަދާ މަޖިލީހުގެ ރައީސް ޖާއޯ ލެޖީއާ ބައްދަލުކުރައްވައި ކާނީ ވަނީ، ކުރީގެ ބޮޑުވަޒީރު ޖަސްޓިން ޓްރޫޑޯގެ ދައުރުގައި ގޯސްވެފައިވާ ދެ ގައުމުގެ ގުޅުން އަލުން ރަނގަޅު ކުރުމަށް ފާއިތުވި މަސްތަކުގައި ކުރެވުނު މަސައްކަތްތައް ފާހަގަކުރައްވާފައެވެ.

ކާނީގެ އޮފީހުގެ ތަރުޖަމާނަކު ހާމަކުރެއްވި ގޮތުގައި، ރައީސް ޝީ ޖިންޕިންގްގެ ލީޑަޝިޕާ މެދު ބޮޑުވަޒީރު ހިތްހަމަޖެހުން ފާޅުކުރެއްވިއެވެ. އަދި ދެ ގައުމުގެ ގުޅުން ރަނގަޅުވުމުގެ ސަބަބުން ހަކަތައާއި، ސަލާމަތީ ކަންކަމާއި، ދެ ގައުމުގެ ރައްޔިތުންގެ މެދުގައި އޮންނަ ގުޅުންތައް އިސްތިރާތީޖީ ފެންވަރެއްގައި ބަދަހިކުރުމަށް މަގުފަހިވެފައިވާ ކަމަށް ބޮޑުވަޒީރު ވިދާޅުވިއެވެ.

ޗައިނާއާއެކު ގުޅުން ބަދަހިކުރަން ކެނެޑާއިން ބޭނުންވާ މައިގަނޑު އެއް ސަބަބަކީ، އެމެރިކާގެ ރައީސް ޑޮނަލްޑް ޓްރަމްޕް ކެނެޑާއަށް ޓެރިފްތަކެއް ކުރިމަތިކުރުވައި، ކެނެޑާއަކީ އެމެރިކާގެ 51 ވަނަ ސްޓޭޓަށް ވެދާނެ ކަމަށް ވިދާޅުވުމާ ގުޅިގެން، ކެނެޑާގެ އެކްސްޕޯޓް މާކެޓް އެކި ގައުމުތަކަށް ފުޅާކުރުމެވެ.

ޗައިނާގެ އެންމެ އިސް ޑިޕްލޮމެޓް ވަންގް ޔީ ވިދާޅުވި ގޮތުގައި، ކާނީގެ މި ދަތުރުފުޅަކީ ދެ ގައުމުގެ ގުޅުމަށް އައި "އިންގިލާބީ" ބަދަލެކެވެ. ކާނީގެ ވަފުދުގައި ހިމެނިވަޑައިގަންނަވާ ކެނެޑާގެ ޚާރިޖީ ވަޒީރު އަނީތާ އާނަންދު ވަނީ، މި ދަތުރުފުޅު ކާމިޔާބު ދަތުރަކަށް ހެދުމަށް ކުރެވުނު މަސައްކަތްތަކަށް ތައުރީފު ކުރައްވާފައެވެ.

ފާއިތުވި ދިހަވަރަކަށް އަހަރު ތެރޭގައި ޗައިނާއާއި ކެނެޑާގެ ގުޅުމަށް ބޮޑެތި ލޮޅުންތަކެއް އެރިއެވެ. ޚާއްޞަކޮށް 2024 ވަނަ އަހަރު ޓްރޫޑޯގެ ސަރުކާރުން ޗައިނާގެ އިލެކްޓްރިކް އުޅަނދުތަކުން ބޮޑު ޓެރިފެއް ނަގަން ފެށުމުން، ބަދަލުހިފުމުގެ ގޮތުން ޗައިނާއިން ވަނީ ކެނެޑާގެ ދަނޑުވެރިކަމުގެ އުފެއްދުންތަކުން 2.6 ބިލިއަން ޑޮލަރުގެ ޓެރިފް ނަގަން ފަށާފައެވެ.

ވިޔަފާރީގެ ދާއިރާގައި ތަޖުރިބާކާރު ބޭފުޅެއް ކަމަށްވާ ބޮޑުވަޒީރު ކާނީ، މި ދަތުރުފުޅުގައި ޗައިނާގެ ބޮޑެތި ކުންފުނިތައް ކަމަށްވާ ކެޓްލް (CATL)، އަލީބާބާ އަދި ސީ.އެން.ޕީ.ސީ ފަދަ ކުންފުނިތަކުގެ އިސްވެރިންނާ ބައްދަލުކުރައްވާފައިވެއެވެ.

ބޮޑުވަޒީރު ކާނީ ހުކުރު ދުވަހު ޗައިނާގެ ރައީސް ޝީ ޖިންޕިންގްއާ ބައްދަލުކުރެއްވުމަށް ވަނީ ހަމަޖެހިފައެވެ. މިއީ މިދިޔަ އޮކްޓޯބަރު މަހު ދެ ބޭފުޅުން ދެކުނު ކޮރެއާގައި ބައްދަލުކުރެއްވުމަށްފަހު ބާއްވާ ފުރަތަމަ ރަސްމީ ބައްދަލުވުމެވެ.