ސްކޫލުތަކުގެ އިތުރު ހަރަކާތްތައް ކުދިންގެ ކިޔެވުމަށް ބުރޫނާރާނެ ގޮތަށް އިންތިޒާމްކުރުމަށް އެދެފި

ކުދިންގެ ކިޔެވުމަށް ބުރޫނާރާނެ ގޮތަށް ސްކޫލުތަކުގެ އިތުރު ހަރަކާތްތައް އިންތިޒާމްކުރުމަށް ތައުލީމާއި ބެހޭ ވަޒީރު، ޑރ.އިސްމާއީލް ޝަފީއު އެދިވަޑައިގެންފިއެވެ.

އިތުރު ހަރަކާތްތައް އިންތިޒާމް ކުރާނެގޮތުގެ މަޝްވަރާ ބައްދަލުވުން ފެށުމުގެ ރަސްމިއްޔާތުގައި ވާހަކަފުޅުދައްކަވަމުން ވަޒީރު ޝަފީއު ވިދާޅުވީ، ބައެއް ސްކޫލްތަކާއި ރަށްރަށުގައި އިތުރު ހަރަކާތްތައް އިންތިޒާމްކުރަމުން އަންނަގޮތުން އޭގެ ނޭދެވޭ އަސަރު ދަރިވަރުންގެ ކިޔެވުމަށް ކުރަމުން އަންނަކަމަށެވެ.

މިކަމާއި ގުޅިގެން ވަޒީރު ޝަފީއު ވަނީ  ދަރިވަރުންގެ ކިޔެވުމަށް ބުރޫ ނާރާނެފަދަ ގޮތަކަށް އިތުރު ހަރަކާތްތައް ހިންގާ ރޭވޭނެ ގޮތްތަކާއި ގުޅޭގޮތުން މަޝްވަރާކޮށް ރަނގަޅު ހައްލެއް ގެނެވޭނެ ގޮތަކަށް އިންތިޒާމް ކުރުމަށް އެދިވަޑައިގެންފައެވެ.

"އަޅުގަނޑު ތިބޭފުޅުންގެ ޑިސްކަޝަނަށް ތިންހަތަރު ކަމެއް ހުށަހަޅާލަން ބޭނުން. ދަރިވަރުންގެ ލާނިންއަށް ފަހިވާންޖެހޭނެކަމަށް. ޓީޗަރުންނާއި ދަރިވަރުންގެ ވެލްބީންއަށް ކޮންސިޑަރ ކުރެވެންވާނެކަމަށް. ޕޭރަންޓް މޮނިއުނިޓީ ޕާރޓިސިޕޭޓްވާއިރުގައި އެ ޕާޓިސިޕޭޝަންއަކީވެސް އެބޭފުޅުންނަށް ވޭނަކަށް ނޯންނަ މިންވަރަކަށް މިކަން ވާންޖެހޭނެކަމަށް. އަދި ދިވެހިރާއްޖޭގެ މި ޖިއޮގްރަފިކަލް ޑިސްޕާޝަން ކޮންސިޑަރ ކުރަން ޖެހޭނެކަމަށް،"

ވަޒީރު ޝަފީއު ވިދާޅުވިއެވެ.

ކުޅިވަރުގެ ހަރަކާތްތައް ހިންގަންވާނެކަމަށާއި، މިކަންކަން ރާވާއިރު މުޅި ތައުލީމީ ދާއިރާއިން ކުރާ މައިގަނޑު މަސައްކަރަށް ބުރޫއަރައިގެން ނުވާނެކަމަށް ދެކެވަޑައިގަންނަވާކަން ފާހަގަކުރައްވަމުން ވަޒީރު ވަނީ ދަރިވަރުންނާއި ބެހޭގޮތުން ނިންމާ ކޮންމެ ކަމެއްގައި އެންމެ ބޮޑު އިސްކަމެއްދީ ވިސްނަންވާނީ ދަރިވަރުންނަށްކަމަށް ވިދާޅުވެފައެވެ.