މަކްތަބާ ސަލަފިއްޔާއާއި މުހައްމަދު ހަސަންގެ މައްޗަށް ބޮޑެތި ތުހުމަތުތަކެއް!

ދީނީ ނަސޭހަތްދިނުމުގެ ހުއްދަ ވަގުތީގޮތުން ބާތިލްކުރެވިފައިވާ އައްޝައިޚް މުހައްމަދު ހަސަނާއި އެބޭފުޅާ އިސްވެ އޮވެ ހިންގާ މަކްތަބާ ސަލަފިއްޔާގެ މައްޗަށް ހަރުކަށި ފިކުރަށް ބާރުލިބިދޭ ފަދަ ބޮޑެތި ތުހުމަތުތަކެއް ފާޅުވެއްޖެއެވެ.

އިސްލާމިކް މިިނިސްޓްރީގެ ފަރާތުން މުހައްމަދު ހަސަންގެ ހުއްދަ ވަގުތީގޮތުން ބާތިލްކޮށްފައިވަނީ އިސްލާމްދީނުގެ ދަންނަ ބޭކަލުންގެ މެދުގައި ޚިލާފު އުފެދިފައިވާ މައްސަލަތަކާއި ބެހޭގޮތުން މުޖުތަމައުގައި ބައިބައިވުން އުފެދޭނެހެން ވާހަކަދެއްކުމާއި، ދީނީ އިލްމުވެރިންނާއި މެދު ހަގީގަތާއި ޚިލާފު ވާހަކަތައް ފެތުރުމާއި، ދަންނަ ބޭކަލުންގެ އިޖްމާއުން އެނގެން ނެތް ކަންކަމުގައި ތިމާ އަމިއްލައަށް ދެކޭ ގޮތަކީ ދީނުގައި ހަމައެކަނި އޮތްގޮތްކަމަށް ހަދައި، އެގޮތަށް ބާރުއަޅައި ވާހަކަ ދައްކައި، ސޯޝަލް މީޑިޔާގައި މައުލޫމާތު ފަތުރަމުންދާތީ ކަމަށް ބުނެއެވެ.

ރާއްޖޭގެ އޮންލައިން މީޑިޔާއަށް މައުލޫމާތު ދެއްވަމުން އިސްލާމިކް މިނިސްޓްރީގެ މީޑިޔާ އޮފިޝަލް ވިދާޅުވީ މަކްތަބާ ސަލަފިއްޔާ މޯލްޑިވްސްއަކީ ރާއްޖޭގައި ރަޖިސްޓްރީ ނުކޮށް ގާނޫނާ ހިލާފަށް ހިންގަމުންދާ ޖަމާއަތެއް ކަމަށެވެ. އަދި މި ޖަމާއަތުން ދިވެހިރާއްޖޭގެ ތިން ސަރަހައްދެއްގައި ތިން ސްކޫލެއް ހުއްދައާއި ނުލައި ހިންގަމުންދާކަމަށްވެސް ވަނީ ފާހަގަކޮށްފައެވެ.

ވޮއިސްއިން ބެލި ބެލުމުން ހޯމް މިނިސްޓްރީން ގާއިމްކޮށްފައިވާ ޖަމްއިއްޔާތަކުގެ ޕޯޓަލްގައިވެސް މަކްތަބާ ސަލަފިއްޔާ ފެންނަން ނެތެވެ.

މީގެ އިތުރުން މުހައްމަދު ހަސަން ހަރުކަށި ފިކުރަށް ބާރު ލިބޭ ގޮތަށް ވާހަކަ ދައްކާފައި ހުރި ކަމަށް ބުނާ މައްސަލައެއްވެސް އިސްލާމިކް މިނިސްޓްރީން ދަނީ ބަލަމުންނެވެ.

މަކްތަބާ ސަލަފިއްޔާގެ ވެބްސައިޓްގައި އިއްދައާއި ބެހޭގޮތުން "ޢިއްދަ އަދި ޢިއްދައިގެ ޙުކުމްތައް" ނަމުގައި މުހައްމަދު ހަސަން ތަރުޖަމާކޮށް ލިޔެފައިވާާ ލިޔުމެއްގައިވާގޮތުގައި އިއްދައިގެ ތިންވަަނަ ބާވަތުގައި ހައިޟުނުވާ އުމުރުގެ ކުޑަކުދިންވެސް ހިމަނާފައިވެއެވެ.

"ވަރިކުރި އިރު ޙައިޟު ނުވާ އަންހެނުންނެވެ. މިފަދަ އަންހެނުން 2 ބަޔަކަށް ބެހިގެންދެއެވެ. ޢުމުރު ހަގުކަމުން ޙައިޟު ނުވާ އަންހެނުންނެވެ. އަދި ޢުމުރު ދޮށިވުމުގެ ސަބަބުން ޙައިޟު ހުއްޓިފައިވާ އަންހެނުންނެވެ. މި ދެ ބައިގެ އަންހެނުންގެ ޢިއްދަ ބަޔާންކޮށް ﷲ ވަޙީކުރައްވާފައިވެ އެވެ. ﴿ وَاللَّائِي يَئِسْنَ مِنَ الْمَحِيضِ مِن نِّسَائِكُمْ إِنِ ارْتَبْتُمْ فَعِدَّتُهُنَّ ثَلَاثَةُ أَشْهُرٍ وَاللَّائِي لَمْ يَحِضْنَ﴾ "އަދި ތިޔަބައިމީހުންގެ އަންހެނުންކުރެ ޙައިޟުން އުއްމީދު ކެނޑިފައިވާ މީހުންނާ މެދުގައި، ތިޔަބައިމީހުން ޝައްކުކުރާ ނަމަ، ފަހެ އެކަނބަލުންގެ ޢިއްދައަކީ އަދި ޙައިޟުނުވާ މީހުންގެ ޢިއްދައަކީ ވެސް 3 މަސް ދުވަހެވެ." މާނައީ : ދެބައިމީހުންގެ ޢިއްދައަކީ ވެސް އެފަދަ އެވެ"، މިފަދައިން ލިޔެވިފައިވެއެވެ.

ދާދި ފަހުން ހޮޓެލް ޖެންގައި ބޭއްވި ނޫސްވެރިންގެ ބައްދަލުވުުމުގައި ވާހަކަދައްކަވަމުން މުހައްމަދު ހަސަން ވިދާޅުވީ ދިވެހިރާއްޖޭގައި ދީނީގޮތުން ހަރުކަށި ފިކުރު ފެތުުރުމަށް މަސައްކަތްކުރާކަން ގަބޫލުކުރައްވާ ކަމަށެވެ. ނަމަވެސް އެއީ އެބޭފުޅާ އަދި މަކްތަބާ ސަލަފިއްޔާއަށް ނިސްބަތްވާ އިލްމުވެރިން ނޫންކަމަށް މުހައްމަދު ހަސަން ވިދާޅުވިއެވެ.

މުހައްމަދު ހަސަން ވިދާޅުވީ 2009ވަނަ އަހަރުން ފެށިގެން އެބޭފުޅާ ދަނީ ހަރުކަށި ފިކުރާއި ދެކޮޅަށް މަސައްކަތްކުރަމުން ކަމަށާއި، އެއީ އެބޭފުޅާއާއި މަކްތަބާ ސަލަފިއްޔާއިން "ދަންނަވެސް އެއްޗެއް ނޫން" ކަމަށެވެ