ވަކި ގައުމެއް ރުއްސަން، އެގައުމުން ދިން ކޮންމެ ލޯނެއްގައި، ހިފުމުގެ ނަތީޖާ މިއޮތީ ފެންނަން: ހަސަން

ފެންނަން މި އޮތީ ކުރީ ސަރުކާރުން، ވަކި ގައުމެއް ރުއްސަން ނެގުނު ލޯނުތަކުގެ ނަތީޖާ ކަމަށް ވިލުފުށީ ދާއިރާގެ މެންބަރު ހަސަން ވަޙީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ދައުލަތުގެ ފިސްކަލް ޒިންމާގެ ބިލަށް ވާހަކަފުޅު ދައްކަވަމުން، މެންބަރު ހަސަން ވަހީދު ވިދާޅުވެފައިވަނީ ކުރީގެ ސަރުކާރުތަކުން ދައުލަތުގެ ދަރަނި މެނޭޖްކުރުމަށް އެކަށީގެންވާ ސަމާލުކަމެއް ދީފައި ނުވުމުގެ ސަބަބުން ރައްޔިތުންގެ ބޮލުގައި އިންތިހާ ބޮޑު ދަރަނި އަޅާފައިވާ ކަމަށެވެ.

ހަސަން ވަހީދު ވިދާޅުވީ، ދައުލަތުން ރައްޔިތުންނަށް ކޮށްދޭންޖެހޭ ކަންކަން ކުރުމަށް ރައްޔިތުން ދަރަނިވެރި ނުވާނެ ގޮތަކަށް އެކަންކަން ކުރަން ސަރުކާރަށް އެނގެންޖެހޭ ކަމަށެވެ. އަދި އެމްޑީޕީ ސަރުކާރަށް އެކަން ނޭނގޭކަން ހާމަވެފައިވާ ކަމަށް ވެސް އޭނާ ވިދާޅުވިއެވެ.

ދަރަނި އިންތިހާއަށް ބޮޑު ވެގެން ދިޔަ އަނެއް ސަބަބަކީ އެއްވެސް ޓްރާންސްޕޭރެންސީ އެއް ނެތި ނިމިދިޔަ ސަރުކާރުން އެކަން ކުރުން. ވަކި ގައުމެއް ރުއްސަން އެގައުމުން "އާނ މިއޮތީ" އޭ ކިޔާފައި ދިން ކޮންމެ ލޯނެއްގައި ހިފުމުގެ ނަތީޖާ އެއޮތީ ފެންނަން.

މެންބަރު ހަސަން ވަޙީދު

ހަސަން ވަހީދު ވިދާޅުވީ، އެ ލޯނުތައް ނަގައިގެން ނިންމުނު މަސައްކަތެއް ނެތް ކަމަށާއި، ފެންނަން އޮތީ ކަރުދާހުން ފެންނަން އޮތް ދަރަންޏާއި، އެ ސަރުކާރުން ލޯނުތައް ނަގައިގެން ލޯނުތަކުގެ ފައިސާ ހަވާލުކުރި އިދާރާތަކާއި ކުންފުނިތަކުގެ ވެރިންގެ މުއްސަނދި ދިރިއުޅުން ކަމަށެވެ.

މަޖިލީހަށް ހުށަހެޅިފައިވާ ދައުލަތުގެ ފިސްކަލް ޒިންމާގެ ބިލަކީ ވަށާޖެހޭ ބިލެއް ކަމަށާއި، އަންނަން އޮތް ޖީލުތަކުގެ ރައްކާތެރިކަމަށް މުހިންމު ބިލެއް ކަމަށް ވެސް ހަސަން ވަހީދު ވިދާޅުވިއެވެ. އަދި ބިލު ހުށަހެޅުއްވި ކަމަށްޓަކައި އޭނާ ވަނީ ރައީސުލްޖުމްހޫރިއްޔާ ޑރ މުހައްމަދު މުޢިއްޒަށް ޝުކުރު އަދާކުރައްވާފައެވެ.