މެޑަމް ސާޖިދާ ސޮންގ ޗިންގލިންގ ސައިންސް އެންޑް ކަލްޗަރ ސެންޓަރ ފޯރ ޔަންގް ޕީޕަލް އަށް ޒިޔާރަތްކުރައްވައިފި
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އަނބިކަބަލުން މެޑަމް ސާޖިދާ މުޙައްމަދު ސޮންގ ޗިންގލިންގ ސައިންސް އެންޑް ކަލްޗަރ ސެންޓަރ ފޯރ ޔަންގް ޕީޕަލް އަށް ޒިޔާރަތްކުރައްވައިފިއެވެ.
އެކަމަނާގެ މި ޒިޔާރަތުގައި މި ސެންޓަރާއި ބެހޭ މައުލޫމާތު އެސެންޓަރުގެ ފަރާތުން އެކަމަނާއަށް ދެއްވާފައިވާއިރު، އެކަމަނާ ވަނީ މި ތަނުގެ އެކި ތަންތަން ބައްލަވާލައްވައި، އެ ތަންތަނާއި ބެހޭ މައުލޫމާތު އޮޅުންފިލުއްވާފައެވެ.
ޗައިނާގެ ބެއިޖިންގައި ހުންނަ ސޮންގ ޗިންގލިންގ ސައިންސް އެންޑް ކަލްޗަރ ސެންޓަރ ފޯރ ޔަންގް ޕީޕަލް ހިންގަމުން އަންނަނީ ޗައިނާގެ ކުރީގެ އޮނަރަރީ ރައީސް ސޮންގ ޗިންގލިންގ ގެ ހަނދާނުގައި ޤާއިމްކޮށްފައިވާ ސޮންގ ޗިންގލިންގ ފައުންޑޭޝަން ބެލެހެއްޓުމުގެ ދަށުންނެވެ. މި ފައުންޑޭޝަން އުފެދުނީ 1982 ވަނަ އަހަރުގެ މޭ މަހުއެވެ.
މިއީ ޒުވާނުންގެ މެދުގައި ބައިނަލްއަގްވާމީ އެކުވެރިކަމާއި އެކަކު އެނެކަކުގެ ސަގާފަތް ދަސްކޮށް އިހުތިރާމް ކުރުމުގެ އިތުރުން ޒުވާނުންގެ ދުޅަހެޔޮކަން އިތުރު ކުރުމަށާއި، ދުނިޔޭގެ ހުރިހާ ހިސާބެއްގެ މީހުންގެ މެދުގައިވެސް އެއްބަޔަކު އަނެއްބަޔަކަށް ވިސްނުންތެރި ކަމާއި އެކު ގާތްގުޅުންތައް ބަދަހި ކުރުމުގެ މަގްސަދުގައި އުފައްދާފައިވާ ސެންޓަރެކެވެ.
ރައީސުލްޖުމްހޫރިއްޔާގެ ދެކަނބަލުން މިހާރު ޗައިނާ އަށް ކުރައްވަމުން ގެންދަވާ ފުރަމާނަ ދަތުރުފުޅަކީ ޗައިނާގެ ރައީސް ޝީ ޖިންޕިން ގެ ދަޢުވަތަކަށް ކުރައްވާ ދަތުރުފުޅެކެވެ. މި ދެކަނބަލުންގެ އަރިހުގައި ސަރުކާރުގެ އިސްވެރިންގެ ވަފުދެއްވެސް ވަޑައިގެންނެވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
