އިދިކޮޅުން މުޅި އެތި ރާވާފަ އޮތީ 90 ދުވަސް ތެރޭ ސަރުކާރު ބޭންކުރަޕްޓްކޮށް އާ ސަރުކާރެއް އުފައްދަން: ސަޢީދު

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ސަރުކާރުގެ ފުރަތަމަ 90 ދުވަސް ތެރޭގައި ސަރުކާރު ބަނގުރޫޓްކޮށް އައު ސަރުކާރެއް އުފައްދަން، އިދިކޮޅު ފަރާތްތަކުން ރޭވި ކަމުގެ ތުހުމަތު އިކޮނަމިކް މިނިސްޓަރު މުހައްމަދު ސަޢީދު ކުރައްވައިފިއެވެ.

ރައީސުލްޖުމްހޫރިއްޔާ އާއި ސަރުކާރުގެ އިސް ވަފުދެއް ހައްދުންމައްޗަށް މިއަދު ފެއްޓެވި ދަތުރުފުޅުގެ ތެރެއިން ލ. މާވަށަށް ވަޑައުގެން އެ ރަށު ރައްޔިތުންނާއި ބައްދަލު ކުރެއްވުމަށް ބޭއްވި ޖަލްސާގައި، 19 ވަނަ ރައްޔޮތުންގެ މަޖިލީހުގައި މާވަށު ދާއިރާވެސް ތަމްސީލް ކުރެއްވި ވަޒީރު ސަޢީދު ވިދާޅުވީ، ފާއިތުވި ހަތަރު މަސްދުވަހުގެ ތެރޭގައި ސަރުކާރަށް ބޮޑެތި ގޮންޖެހުންތަކަކާއި ކުރިމަތިލާން ޖެހުނު ކަމަށެވެ.

“މުޅި އެތި ރާވާފައި އޮތީ، ރައީސް ޑރ މުހައްމަދު މުޢިއްޒު ވެރިކަމަށް އަންނަތާ 90 ދުވަސްތެރޭގައި ސަރުކާރު ބޭންކް ރަޕްޓް ވާގޮތަށް. މިހަމަ ހަގީގަތް. މުޅި އެތި ޑިޒައިން ކޮށްފައި، ރާވާފައި، ސީލްކޮށްފައި އޮތީ ތިން މަސް ތެރޭގައި، 90 ދުވަސް ތަރޭގައި ދިވެހިރާއްޖެ ބަނގުރޫޓްވާނެ، ބަނގުރޫޓް ވީމަ، ކުރީގެ ބައެއް ރައީސުންނާއިއެކު އާ ސަރުކާރެއް ފޯމް ކުރާނީއޭ. ބައެއް ބޭފުޅުންގެ އެހީތެރިކަމާއިއެކު.”

އިކޮނަމިކް މިނިސްޓަރު މުހައްމަދު ސަޢީދު

ސަޢީދު ވިދާޅުވިގޮތުގައި އިދިކޮޅުގެ އެ ޑިޒައިން މަސައްކަތް ނުކުރީ އެކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ފުރުސަތު ނުދެއްވުމުން ކަމަށެވެ.  އަދި އެ ފުރުސަތު ނުދެއްވީ ވަރަށް މުހިންމު މަސައްކަތެއް ކުރައްވައި، ވަރަށް ބޮޑު “ރިސްކެއް” ނަންގަވައިގެން ކަމަށް ސަޢީދު ވިދާޅުވިއެވެ.

އެގޮތުން ނެންގެވި ރިސްކަކީ ފައިސާ ޗާޕްކުރުން ހުއްޓަވާލެއްވުން ކަމަށާ، އެކަން އިންޓަނޭޝަނަލް މަނިޓަރީ ފަންޑު، އައިއެމްއެފް، އާއި ވޯލްޑު ބޭންކުންވެސް ދެފަރަހަރެއްގެ މަތިން ފާހަގަކުރެއްވި ކަމަށް ސަޢީދު ވިދާޅުވިއެވެ.

އަޅުގަނޑު ހަނދާންވާގޮތުގައި، ތިންވަނަ ފަހަރު އައިއެމްއެފްގެ މެނޭޖިންގ ޑިރެކްޓަރުގެ ޚާއްސަކޯލެއް އެމަނިކުފާނު ދުބައިގައު ހުންނަވަނިކޮށް ވަޑައިގެން ވިދާޅުވީ، ރައީސް އޭ، ތިންމަސް ދުވަސް ތެރޭގައި މަޖިލިސް އިންތިހާބެއް އޮތް އިރު، އެއްވެސް ގައުމެއްގެ ރައީސުލްޖުމްހޫރިއްޔާ އަކު ކުރައްވާނެ ކަމެއް ނޫނޭ ތި ކުރެއްވީ. އެހާ ބޯލްޑް އެހާ ހިތްވަރުގަދަ ޑިސިޝަންއެކޭ ތި ނެންގެވީ ފައިސާ ޗާޕްނުކޮށް ރިފޯމްއަށް މަސައްކަތް ކުރައްވާނެ ވާހަކަ ވިދާޅުވުން. މިއީ ހަގީގަތް.

އިކޮނަމިކް މިނިސްޓަރު މުހައްމަދު ސަޢީދު

މީގެ އިތުރުން، ކަންބޮޑުވާ އެކިއެކި ކަންކަމާއި ރައީސް މުއިއްޒު ކުރިމަތިލައްވައި، ނިންމެވުންތައް ނިންމަވަނީ ވަރަށް މަޑުމައިތިރި ކަމާއިއެކު ވަރަށް ހަމަހިމޭން ކަމާއިއެކު ކަމަށް ސަޢީދު ވިދާޅުވިއެވެ.

އަދި މިސަރުކާރުގެ މިސްރާބު ހުރީ ގައުމު ބަނގުރޫޓް ވުމުން ސަލާމަތްކޮށް، ގައުމުގެ ދަރަންޏަށްވުރެ އަރަނި އިތުރު ކޮށް، ގައުމުގެ މިނިވަންކަން ހޮމާޔަތްކޮށް އިސްލާމްދީން ހިމާޔަތް ކުރުމަށް ކަމަށްވެސް އޭނާ ވިދާޅުވިއެވެ. އެއީ ރައްޔިތުން އެދޭ ރައްޔިތުން ބޭނުންވާ ގޮތް ކަމަށްވެސް ވަޒީރު ވިދާޅުވިއެވެ.