އަވައްޓެރި ޤައުމުތަކުގެ ތެރެއިން ރާއްޖެއަކީ ވަރަށް ހާއްސަ ޤައުމެއް: ޖަޔަޝަންކަރު

ދިވެހިރާއްޖެ އާއި އިންޑިއާ ދެޤައުމުގެ ދެމެދު އޮތް ޒަމާންވީ ގުޅުމަށް ބަލާއިރު، ރާއްޖެއަކީ ވަރަށް ހާއްސަ ޤައުމެއްކަމަށް  އިންޑިއާގެ އެކްސްޓަރނަލް އެފެއާޒް މިނިސްޓަރު ޑރ. ސުބްރަމާނިއަމް ޖަޔަޝަންކަރު ވިދާޅުވެއްޖެއެވެ.

ޖަޔަޝަންކަރު ރާއްޖެއަށް މިހާރު ކުރައްވަމުން ގެންދަވާ ދަތުރުފުޅުގައި މިއަދު ދިވެހި ހާރިޖިއްޔާގެ އޮފީހުގައި ދެއްވި މީޑިއާ ބަޔާނުގައި ވިދާޅުވީ، އަވައްޓެރި ޤައުމުތަކުގެ ތެރެއިން ދިވެހިރާއްޖެއަކީ އިންޑިއާއިން ވަރަށް ހާއްސަ އިސްކަމެއްދެމުން އަންނަ ޤައުމެއް ކަމަށެވެ. އިންޑިއާ އާއި ރާއްޖެއާދެމެދު އޮތީ ވަރަށް ޒަމާންވީ ގުޅުމެއްކަން ފާހަގަކުރައްވަމުން ޖަޔަޝަންކަރު ވިދާޅުވީ، ކުރިއަށްއޮތް ތަނުގައިވެސް ދެ ޤައުމުގެ ދެމެދު ގުޅުންއޮތީ އެގޮތުގައި ކުރިއަށްކަމަށެވެ.

ބޮޑުވަޒީރު ނަރެންދްރަ މޯދީގެ ސިޔާސަތަށް ބަލާއިރު އަވައްޓެރިޤައުމުތަކަށް ހާއްސަ އިސްކަމެއްދެއްވާއިރު، އޭގެ ތެރެއިންވެސް ދިވެހިރާއްޖެއަކީ ވަރަށް ހާއްސަ ޤައުމެއް

ޖަޔަޝަންކަރު ވިދާޅުވިއެވެ.

ޖަޔަޝަންކަރުވިދާޅުވީ ގޮންޖެހުންތައް ކުރިމަތިވި ނަމަވެސް ރާއްޖެއާއެކު އޮތީ އިހުއޮތްފަދަ ގުޅުމެއް ކަމަށާއި، ދިމާވާ ކަންކަމާ ކުރިމަތިލައި އިންޑިއާ އޮންނާނީ ހުރިހާ ގޮތަކުންވެސް އެހީވެދޭ ޤައުމެއްގެ ގޮތުގައިކަމަށެވެ. މިގޮތުން މިވީހާތަނަށް އިގްތިސާދީގޮތުން ރާއްޖެއަށް ވެދެވުނު އެހީތެރިކަން ޖަޔަޝަންކަރުގެ ވާހަކަފުޅުގައި ވަނީ ފާހަގަކުރައްވާފައެވެ.

އޭގެ ތެރޭގައި ރާއްޖެއަށް ބޭނުންވާ އަސާސީ ތަކެތި އެތެރެކުރުމަށާއި، ބަޖެޓް ސަޕޯޓުގެ އިތުރުން މަޝްރޫޢުތަކަށް އެހީތެރިވެދީފައިވާކަމަށް ޖަޔަޝަންކަރުގެ ވާހަކަފުޅުގައި ވަނީ ވިދާޅުވެފައެވެ.

ޖަޔަޝަންކަރު ވިދާޅުވީ ރާއްޖެއަށް ވަޑައިގަތުމުން އޭނާއަށް ހޫނު މަރުހަބާއެއް ކިޔާފައިވާކަމަށާއި، މިއީ ރާއްޖޭގެ ރައީސުލްޖުމްހޫރިއްޔާ ކަމުގެ މަޤާމަށް ޑރ.މުހައްމަދު މުއިއްޒު ހަވާލުވެ ވަޑައިގެންނެވުމަށްފަހު ރާއްޖެއަށް ކުރި ފުރަތަމަ ދަތުރުކަމަށެވެ.

ޖަޔަޝަންކަރުގެ މި ދަތުރުފުޅުގައި މާދަމާ އިކޮނޮމިކް މިނިސްޓަރާއި، ފިނޭންސް މިނިސްޓަރުގެ އިތުރުން ޑިފެންސް މިނިސްޓަރާ ބައްދަލުކުރެއްވުމަށް ވަނީ ހަމަޖެހިފައެވެ.