ކުރީގެ ޑިފެންސް މިނިސްޓަރ ތޮލްހަތު ވަގުތީގޮތުން މިނިވަންވެއްޖެ

ރައީސް ނަޝީދުގެ ސަރުކާރުގައި ޑިފެންސް މިނިސްޓަރ ކަމުގެ މަގާމު އަދާކުރެއްވި ތޮލްހަތު އިބްރާހީމް ކަލޭފާނުގެ މައްޗަށް ކޮށްފައިވާ ޖަލުހުކުމް ތަންފީޒުކުރުން ވަގުތީގޮތުން މަޑުޖައްސާލުމަށް ސުޕްރީމް ކޯޓުން އަމުރުކޮށްފިއެވެ.

މި އަމުރު ސުޕްރީމް ކޯޓުން ނެރެފައިވަނީ މިއަދުގެ ވަގުތެއްގައެވެ. ތޮލްހަތުގެ މައްޗަށް މީގެ ކުރިން އިއްވާފައިވަނީ  10 އަހަރުގެ ޓެރަރިޒަމްގެ ކުށުގެ ޖަލު ހުކުމެކެވެ. ތޮލްހަތުގެ ހުކުމް ތަންފީޒުކުރުން ފަސްކުރުމަށް އަންގާފައިވަނީ އެ މައްސަލަ ބަލައި ނިމެންދެންނެވެ.

ތޮލްހަތު 2016 ވަނަ އަހަރުން ފެށިގެން ހުންނެވީ ގޭ ބަންދުގައިކަން ފާހަގަކޮށްލެވެއެވެ.

މި މައްސަލަ އަލުން ބެލުމަށް ތޮލްހަތުގެ ފަރާތުން ހުށައެޅި މިއީ ދެވަނަ ފަހަރެވެ. ކުރިން ހުށައެޅި ފަހަރު ސުޕްރީމް ކޯޓުން އެ މައްސަލަ ބަލައި ނުގަތްކަން ފާހަގަކޮށްލެވެއެވެ.

ސުޕްރީމް ކޯޓުން ވަނީ މީގެ ކުރިން ކުރީގެ ޑިފެންސް މިނިސްޓަރ ކާނަލް ރިޓަޔަޑް މުހައްމަދު ނާޒިމް، ދިއްގަރު ދާއިރާާާގެ ކުރީގެ މެންބަރު އަހްމަދު ނާޒިމް، އަދާލަތު ޕާޓީގެ ރައީސް އައްޝައިހް އިމްރާން އަބްދުﷲ އަދި ކުރީގެ ރައީސް މުހައްމަދު ނަޝީދުގެ ހުކުމް ތަންފީޒުކުރުން ފަސްކުރުމަށް ވަގުތީ އަމުރު ނެރެފައެވެ.