އިއްޔެގައި ބާކީވި ރޮށި އުކާނުލައި، މިކަހަލަ މީރު އެއްޗެއް ހަދާލަމާ؟

އެއްދުވަސް ވެފައި ހުންނަ ރޮށި އަނެއް ދުވަހު ކެޔޮމަކީ ގިނަ މީހުން ކުރާ ހިތްވާ ކަމެއް ނޫނެވެ. ބައެއް ފަހަރު އެ ރޮށި މުރަނަ ކޮށްލި ނަމަވެސް ގިނަ ފަހަރު، އުކާލަނީއެވެ. އެހެން ކަމުން މިފަހަރު ވޮއިސް ގެ ބަދިގެއިން މި ގެނެސްދެނީ ބާކީ ވެފައި ހުންނަ ރޮށި އުކާލުމުގެ ބަދަލުގައި އެއިން މީރު ފޮނި އެއްޗެއް ތައްޔާރު ކޮށްލާނެ ގޮތުގެ ރެސިޕީއެވެ.

ބޭނުންވާ ތަކެތި

5 ރޮށި

1/2 1 ޖޯޑު ހަކުރު (ފޮނި މަޑުކުރަން ބޭނުން ނަމަ 1 ޖޯޑު)

2 ޖޯޑު ފުލްކްރީމް މިލްކް

ތެޔޮ

1/3 ޖޯޑު ކަނަމަދު (ކުށިކޮށް ކޮށާފައި ނުވަތަ އެހާ ހިމުން ނޫންކޮށް މުގުރާފައި)

ތައްޔާރު ކުރާނެ ގޮތް

1) ތެޔޮ ފޮދުގެ ތެރޭގައި ރޮށި ކޮޅު ތެލުލައި ކުޑަކޮށް މުރަނަ ކޮށްލާށެވެ. ދެން ރޮށި ކުދި ކުދި ކޮށްލުމަށްފަހު މިކްސަރުން މުގުރާލާށެވެ.

2) ތެއްޔެއްގެ ތެރެއަށް ހަކުރު އެޅުމަށް މަޑު ގިނީގައި ހަކުރުކޮޅު ރަން މުށި ކުލަ އަރަންދެން ކެރަމަލައިޒް ކޮށްލާށެވެ.

3) ކެރަމަލައިޒް ވުމުން ކިރު ފޮދު އަޅާލައިގެން ރަނގަޅަށް ހަލުވަމުން ކައްކާލާށެވެ.

4) ހަކުރާއި ކިރާއި ކެކި، އޮލަވާން ފެށުމުން އެއަށް މުގުރާފައި ހުރި ރޮށި އަޅާލައި އެކުލަވާލާށެވެ. އަދި ކޮށާފައިހުރި ހުރި ކަނަމަދުވެސް އަޅާލާށެވެ. ކިރުފޮދު ހިކެންދެން މަޑު ގިނީގައި ކައްކާލުމަށްފަހު އުނދުން ނިންވާލާށެވެ.

5) ޓްރޭއެއްގައި ބޭކިންގ ޕޭޕަރ އެޅުމަށްފަހު، އޭގެ މަތީގައި ރޮށި މިކްސްޗަރ ރީތިކޮށް ފަތުރާލާށެވެ. އަދި މައްޗަށް ކަނަމަދު ކޮޅެއް އަޅާލުމަށްފަހު ޓޮފީ ގޮތަށް ކަފާލާފައި ހިހޫވަންދެން ބަހައްޓާށެވެ.