ދައުލަތުގެ ރިޒާވު ދަނީ މަޑުމަޑުން ކުރިއަރަމުން، މި ސަރުކާރުން ރިޒާވްގައި ހުރި ފައިސާ ނަހަމަގޮތުގައި ހޭދަކޮށެއް ނުހަދާ: މެމްބަރު އިބްރާހިމް

ދައުލަތުގެ ރިޒާވު ދަނީ މަޑުމަޑުން ކުރިއަރަމުން ކަމަށާއި، ކުރީ ސަރުކާރު ފަދައިން މި ސަރުކާރުން ބޭނުންނެތް ކަންކަމުގައި ރިޒާވްގައި ހުރި ފައިސާގައި އަތްލައި ނުހަދާކަމަށް މައްޗަންގޮޅި އުތުރު ދާއިރާގެ މެންބަރު އިބްރާޙީމް މުހައްމަދު (އިއްބެ ޖަނާބު) ވިދާޅުވެއްޖެއެވެ.

އިބްރާހިމް މިފަދައިން ވިދާޅުވީ، ބޭނުންކުރެވޭ ރިޒާވް ހުސްވެއްޖެ ކަމަށް ބައެއް މީޑިއާތަކުން ފަތުރަމުން ގެންދާ ހަބަރުތަކާ ގުޅިގެން އެކްސްގައި ކުރެއްވި ޕޯސްޓެއްގައެވެ.

މިގޮތުން އިބްރާހިމް ވިދާޅުވީ، ދޮގު ޚަބަރު ފަތުރާ ބައެއް ނޫސްތަކުން އެމީހުން ބޭނުންވާ ސިޔާސީ މަގުސަދު ހާސިލް ނުވާތީ، ރައްޔިތުން ބިރުގެންނެވުމާއި ފިތުނަ އުފައްދާތީ ސަމާލުވާން ޖެހޭ ކަމަށެވެ.

އިބްރާހިމް ގެ އިތުރުން އިކޮނޮމިކް މިނިސްޓަރު މުހައްމަދު ސައީދުވެސް ވަނީ އެއީ ދޮގު ހަބަރެއްކަން ކަށަވަރުކޮށްދެއްވާފައެވެ.

މިކަމާއި ގުޅިގެން ދިވެހިރާއްޖޭގެ މަރުކަޒީ ބޭންކް (އެމްއެމްއޭ) އިން ނޫސް ބަޔާނެއް ވެސް ވަނީ ނެރެފައެވެ.

މި ނޫސްބަޔާނުގައި އެމްއެމްއޭއިން ބުނީ، ޖުލައިމަހު ނިމުނުއިރު ހުރިވަރަށްވުރެ، މިހިނގާ އޮގަސްޓްމަހު ރާއްޖޭގެ ޔޫޒަބަލް ރިޒާވް އިތުރުވާނެ ކަމަށެވެ. އަދި ރާއްޖޭގެ ޑޮލަރު ރިޒާވް ހުސްނުވާކަމަށާއި، ތަފާސްހިސާބުތައް އެ ބޭންކުގެ ވެބްސައިޓް މެދުވެރިކޮށް ލިބެން ހުންނާނޭ ކަމަށް ވެސް އެމްއެމްއޭއިން ވަނީ ބުނެފައެވެ.

ރައްޔިތުންގެ ހިތްތަކުގައި ކަންބޮޑުވުން އުފެދޭގޮތަށް މިފަދަ ހަބަރުތައް ފަތުރަމުންދިއުމަކީ އެ ބޭންކުން ކަންބޮޑުވާ ކަމަށެއް ކަން އެމްއެމްއޭއިން ފާހަގަކުރިއެވެ.