ރާއްޖޭގެ އިންތިޚާބާމެދު ސުވާލު އުފައްދަނީ ކީއްވެތޯއެވެ.

ރާއްޖޭގައި މިއަދު ފެށިގެން ހިގަމުންދާ ރިޔާސީ އިންތިޚާބުގެ ވޯޓްލުމުގައި މަކަރުހަދައި އޮޅުވާލާނެކަމަށް ބޭރުގެ އެކިއެކި މީޑިއާތަކާއި ޖަމްއިއްޔާތަކުން ތުހުމަތުކޮށްފައިވީނަމަވެސް ވޯޓްލުން ނިމުމަކަށްދާއިރު މިހާތަނަށް ރާއްޖޭގެ އެއްވެސް ހިސާބަކުން ވޯޓްއޮޅުވާލުމުގެ މައްސަލަތަކެއް ރިޕޯޓްކޮށްފައި ނުވެއެވެ. އިންތިޚާބު އޮޅުވާލުމުގެ ވާހަކަތަކަކީ 2013 ވަނަ އަހަރުވެސް ބޭރުގެ ފަރާތްތަކުން އެންމެ ބޮޑަށް ދެއްކި ވާހަކަތަކެވެ. ތަޅާފޮޅުން ހިގާ އެފްރިކާގެ ގައުމުތަކުގައި އިންތިޚާބު އޮޅުވާލަފާނެކަމަށް އިންޒާރުދީ ނަހަދާ މިންވަރަށް ދިވެހި ރާއްޖެއަށް އިންޒާރުދިނެވެ. އެކަމަކު އެފަހަރުވެސް އިންތިޚާބު އިންސާފުވެރިކަމާއެކު ނިމިގެންދިޔައެވެ. އަމްދުން ޑިމޮކްރަސީކަމަށްބުނާ އަވަށްޓެރި ގައުމުގައި އިންތިޚާބުގެކަންކަން ނުގެންދެވޭހާ ފުރިހަމައަށް އެއްވެސް ދެކޮޅުވެރިކަމެއް ހަމަނުޖެހުމެއް ނެތި ނިމުނެވެ.

އޭގެފަސް އަހަރުފަހުން މިފަހަރު އިންތިޚާބާއިދިމާކޮށްވެސް އެއިންޒާރުތައް އޮތީ ދީފައެވެ. ޑިމޮކްރަސީގެ މަގަށް ރުޖޫއަވާން އެބައަންގައެވެ. ރާއްޖެއަކީ ޚުދުމުޚްތާރު ގައުމެއްކަމަށް ބުނެއެވެ. އަލްޖަޒީރާފަދަ ބާރުގަދަ މީޑިއާތަކުގެ ކަންބޮޑުވުންވެސް އިންތިހާއެވެ. އަލްޖަޒީރާ ނިސްބަތްވާ ގަތަރުގައި ޑިމޮކްރަސީއެއް ނުވާހިނދުއެވެ. އަވަށްޓެރި އިންޑިޔާގައި ވެރިކަމުގެ ޚުދުމުޚްތާރުކަން އެގައުމުގެ ނަސްލުމަދު ރައްޔިތުންނަށް ކުރިމަތިވަމުންދާކަމަށް އެގައުމުގެ މީޑިއާއިން ބުނާއިރުވެސް އަވަށްޓެރިންނަށް ބިރުދެއްކުމެވެ. ވޯޓްލާން ނުކުތް މީހުން ގިނަ ކަމުން ރާއްޖެއާއިބެހޭގޮތުން ގިނަގިނައިން ކަންބޮޑުވުން ފާޅުކުރައްވައި ޓްވީޓްކުރައްވާ އިގިރޭސި ހައިކޮމިޝަނަރ ހައިރާންވެވަޑައިގެން ޓްވީޓެއްކޮށްލެއްވިއެވެ.

ދިވެހި ރައްޔިތުން ތަސައްރަފް ފުދިފައިވާ މިންވަރު ދެކިބަލާށެވެ. ވޯޓްލުން އެއޮތް ނިމެނީއެވެ. އިންތިޚާބުގެ ކެމްޕެއިން ދެކެންޑިޑޭޓުން ބޭނުންވި ކޮންމެ ރަށަކަށް އަރައިފައިބައިވަޑައިގެންނެވިއިރު ދެޕާޓީއަށް ނިސްބަތްވާ ސަޕޯޓަރުންގެ މެދުގައިވެސް ހަމަނުޖެހުމެއް ނުހިގައެވެ. ރީތި ނޫންތޯއެވެ. ރައްޔިތުން އަމާންކަމާއި އޮމާންކަމާއެކު އެއްވެސް ނުފޫޒެއްނެތި ވޯޓްލައި އެއޮތް ނިންމަނީއެވެ. ދުނިޔޭގެ ކުރިމަތީގައެވެ. އެމީހަކު ބޭނުން ކެނޑިޑޭޓަކަށެވެ.

އިންތިޚާބު އޮޅުވާލުމުގެ ވާހަކަތައް ދައްކަނީ ހަގީގަތުގައި ރާއްޖެއަށް ބިރު ދެއްކުމަށެވެ. ބިރުދައްކާ ފަރާތްތަކުން ރާއްޖޭގައި ގާއިމުކުރަންބޭނުންވާ ސަރުކާރެއް ގެނައުމަށެވެ.