ފެއާތަކުގައި ރާއްޖެ ތަމްސީލު ކުރުމުގެ ފުރޞަތު ހަމައެކަނި ދިވެހި އޮޕަރޭޓަރުންނަށް ލިބޭގޮތަށް ހަދައިފި

ދިވެހިރާއްޖޭގެ ފަތުރުވެރިކަން ކުރިއަރުވާ، އިޝްތިހާރު ކުރުމަށް ބައިވެރިވާ ފެއާތަކުގައި ރާއްޖެ ތަމްސީލު ކުރުމުގެ ފުރުޞަތު ހަމައެކަނި ދިވެހި ޓުއަ އޮޕަރޭޓަރުންނަށާއި ޓްރެވަލް އެޖެންޓުންނަށް ލިބޭގޮތަށް އުސޫލަށް ބަދަލު ގެނެސްފިއެވެ.

މިކަން ހާމަކޮށްފައިވަނީ އެމްއެމްޕީއާރުސީގެ މެނޭޖިން ޑިރެކްޓަރު ފާތިމަތު ތައުފީގު މިއަދު 'އެކްސް'ގައި ކުރެއްވި ޕޯސްޓެއްގައެވެ.

ފާތިމަތު ތައުފީގު ގެ އެކްސް ޕޯސްޓުގައި ބުނެފައި ވަނީ މެމްބާރޝިޕް ޕޮލިސީ އިސްލާހުކޮށް ގެނައި ބަދަލާ އެކު އިސްކަން ދޭނީ ދިވެހި ޓުއަ އޮޕަރޭޓަރުންނާއި ޓްރެވަލް އެޖެންޓުންނަށް އަދި ރާއްޖޭގައި ރަޖިސްޓްރީކޮށްގެން ހިންގާ ދާއިރާއާ ގުޅުންހުރި ކުންފުނިތަކަށް ކަމަށެވެ.

އޭނަގެ ޕޯސްޓުގައި އިތުރަށް ބުނެފައިވަނީ އެ ބަދަލު ގެނައީ ބޭރުގެ ޓޫރިޒަމް ފެއާތަކުގައި ދިވެހިންގެ ބައިވެރިވުން އިތުރުކޮށް، ދިވެހި ޓޫރިޒަމް އިންޑަސްޓްރީ އިޝްތިހާރު ކުރުމުގައި ދިވެހިން ބައިވެރިކުރުމަށް ކަމަށެވެ.

އެމްއެމްޕީ އާރުސީ އިން މީގެ ކުރިންވެސް ބުނެފައިވަނީ ދިވެހިރާއްޖޭގެ ފަތުރުވެރިކަން ކުރިއަރުވާ، އިޝްތިހާރު ކުރުމަށް ބައިވެރިވާ ފެއާތަކުގައި ރާއްޖެ ތަމްސީލުކުރުމަށް ދިވެހި ޓުއަ އޮޕަރޭޓަރުންނަށާއި ޓްރެވަލް އެޖެންޓުންނަށް އެކަނި ފުރުޞަތު ދިނުމަށް ވިސްނަމުން ދާކަމަށެވެ.

އެކުންފުނިން އޭރު ބުނަމުން ދިޔައީ ބޭރު ޤައުމުތަކުގައި ބޭއްވޭ ތަފާތު ފެއާރތަކުގައި ދިވެހި ރާއްޖެ އިސްތިހާރުކޮށް ކުރިއެރުވުމަށް އެންމެ ރަނގަޅު ވާނީ ދިވެހިން ކަމަށާއި އެފަދަ ކަންތައްތައް ވަޠަނީ ލޯބީގައި ކުރެވޭނެ ގޮތްތަކެއް ހޯދުމަށް މަސައްކަތް ކުރަމުން އަންނަ ކަމަށެވެ.

ފަތުރުވެރިކަމާއި ބެހޭ ވުޒާރާއިން އެންމެ ފަހުން ޢާއްމުކޮށްފައިވާ ތަފާސް ހިސާބުތަކަށް ބަލާއިރު ވޭތުވެދިޔަ އަހަރުގެ ފުރަތަމަ ހަފްތާއަށް ވުރެ މިއަހަރުގެ ފުރަތަމަ ހަފްތާ ރާއްޖެ ޒިޔާރަތް ކުރި ފަތުރުވެރިންގެ އަދަދު ވަނީ 7 އިންސައްތަ ކުރިއަރާފައެވެ.