ސަރުކާރުގެ ޓެކްސީ ލައިނުން އެހެން ޓެކްސީތަކަށް ގެއްލުން ނުވާނެ ސަބަބުތައް އަމީން ހާމަކޮށްދެއްވައިފި
ލިޔުންތެރިޔާ
ޚަދީޖާ އަރުފާ
ސަރުކާރުން ޓެކްސީ ލައިނެއް ފެށި ނަމަވެސް ޓެކްސީގެ ގަވާއިދުތަކާ އެއްގޮތަށް ޓެކްސީ ކުރުމުގައި އެއްވެސް ހުރަހެއް ނޯންނާނެ ކަމަށާ، އެފަރާތްތަކަށް ގެއްލުން ނުވާނެ ކަމަށް ދަތުރުފަތުރާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ވަނީ، ސަރުކާރުން ޓެކްސީ ލައިނެއް ފެށުމުން ޓެކްސީ ދުއްވާ އެހެން ފަރާތްތަކަށް ގެއްލުން ނުވާންވީ ސަބަބުތައް ހާމަކޮށްދެއްވުމަށް ވަޒީރު އަރިހުން އެދިވަޑައިގެންފައެވެ.
އެކަން ސާފުކޮށްދެއްވަމުން ވަޒީރު އަމީން ވިދާޅުވީ އެ ސަބަބުތައް މީގެ ކުރިންވެސް އެތައް ފަހަރުމަތިން ހާމަކޮށްދެއްވާފައިވާ ކަމަށެވެ.
އެގޮތުން، ވަޒީރު ވިދާޅުވީ، މިހާރުވެސް ޓެކްސީގެ ޤަވާއިދުތަކާއި އެއްގޮތަށް ޓެކްސީ ކުރާ ފަރާތްތަކަށް އެމްޓީސީސީން ޓެކްސީ ލައިން ފެށުމުންވެސް އެއްވެސް ހުރަހެއްނެތި ޓެކްސީ ކުރެވޭނެ ކަމަށެވެ.
އަދި މީގެ އިތުރުން މިހާރުވެސް ޕާޓްޓައިމްކޮށް ޓެކްސީ ކުރާ ފަރާތްތަކަށް މި ޓެކްސީ ފްލީޓްގައި ޑްރައިވަރުންގެ ގޮތުގައި ނުވަތަ ފުލްޓައިމް، މަސައްކަތުގައިވެސް ބައިވެރިވުމުގެ ފުރުސަތު އޮންނާނެ، ޓެކްސީ ކޮށްގެން އާމްދަނީ ހޯދަން ބޭނުންވާ ފަރާތްތަކަށް.
ވަޒީރު މުޙައްމަދު އަމީން
މީގެ އިތުރުން އެމްޓީސީސީ ޓެކްސީ ލައިންގެ އޮޕަރޭޝަން ބައްޓަންކޮށްފައިވަނީ ދާއިމީ ކޮށް ޓެކްސީ ކުރަން ބޭނުންވާ ޑްރައިވަރުންގެ އިތުރުން ފްރީލާންސްކޮށްވެސް ޓެކްސީ ކުރެވޭ ގޮތަށްކަން ވަޒީރު ފާހަގަކުރެއްވިއެވެ. އެހެނީ މިހާރުވެސް ބައެއް ޓެކްސީ ޑްރައިވަރުންނަކީ ޕާޓްޓައިމްކޮށް އެ މަސައްކަތް ކުރާ މީހުންކަމަށް ވުމުން އެ ފުރުސަތު އެމްޓީސީސީ ޓެކްސީ ލައިނާ ގުޅޭ ފަރާތްތަކަށްވެސް އޮންނާނެ ކަމަށް ވަޒީރު ވިދާޅުވިއެވެ.
އެހެން ކަމުން ޓެކްސީ ކުރާ ފަރާތްތަކަށް އެމްޓީސީސީ ޓެކްސީ ލައިންގެ ސަބަބުން ވާނެ އެއްވެސް ގެއްލުމެއް ނޯންނާނެ ކަމަށް ވަޒީރު ވިދާޅުވިއެވެ.
ސަރުކާރު ޓެކްސީ ލައިން ޤާއިމްކުރުމަށް ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ،އެމްޓީސީސީއާ އެވެ.
އަދި އެ ކުންފުނިން އަންނަނީ މިއަހަރުގެ ޖުލައިމަހުގެ ތެރޭގައި ޓެކްސީ ލައިންގެ ޚިދުމަތް ފެށުމަށް ތައްޔާރުވަމުން ކަމަށް މީގެ ކުރިން ވަޒީރު ވަނީ ވިދާޅުވެފައެވެ.
އެގޮތުން، ޓެކްސީ ލައިނަށް ބޭނުންވާ ޓެކްސީ ފޯރުކޮށްދޭނެ ބަޔަކު ހޯދަން އެމްޓީސީސީން އިއުލާންކޮށް، އެޓެކްސީތައް ފޯރުކޮށްދޭނެ ބަޔަކު މިހާރު ހަމަޖެހިފައިވާ ކަން ފާހަގަކުރައްވަމުން ވަޒީރު ވިދާޅުވީ ޓެކްސީ ލައިނަށް ބޭނުންވާ އެޕްލިކޭޝަން ހެދުމުގެ މަސައްކަތާއި ޓެކްސީތައް ޗަރޖު ކުރާނެ ޗަރޖިން ސްޓޭޝަންތައް ހެދުމުގެ މަސައްކަތްވެސް އެ ކުންފުނިން ކުރަމުންދާ ކަމަށެވެ.
މި ޓެކްސީ ފްލީޓުގައި ހިމެނެނީ %100 ތިމާވެއްޓާ ރަށްޓެހި އިލެކްޓްރިކް އުޅަނދެވެ. މި ޚިދުމަތް ފަށާއިރު، ޖުމްލަ 100 އުޅަނދު ހިމެނޭއިރު، އިތުރު ފިޔަވަހި ތަކަށް ބަހާލައިގެން އުޅަނދުގެ އަދަދު އިތުރު ކުރެވޭނެ ކަމަށް އެމްޓީސީސީން ބުނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
