މަޖީދިއްޔާއަށް 92 އަހަރު ފުރުން ފާހަގަކޮށްފި

ލިޔުނީ: ހުސައިން އަރުބާން ފައްވާޒް

ރަންހާރުތަކެއް ފަދައިން ގަތާލެވިފައި މިވާ ރާއްޖޭގެ ކޮންމެ ހިސާބެއްގެ މީހަކަށްވެސް މަޖީދިއްޔާއޭ ބުނުމުން ނޭނގި ނުހުންނާނެކަމީ ޝައްކެއް އޮތް ކަމެއް ނޫނެވެ. މަޖީދިއްޔާއަކީ ރާއްޖޭގައި ބިނާކުރެވުނު އެންމެ ފުރަތަމަ މަދުރަސާ ކަމުގައި ވާއިރު މިމަހުގެ 19 ވަނަ ދުވަހަކީ މަޖީދިއްޔާގެ ފަލަ ސުރުހީ ތަކުގައި ފަވާލެވިގެންދާ އެއްދުވަހެވެ. އެއީ އެ މަދުރަސާގެ އަހަރީ ދުވަހެވެ. މަޖީދިއްޔާއަށް 92 އަހަރު ފުރުނު ދުވަހެވެ. ކަންދިމާކުރި ގޮތުން އަހަރީ ދުވަސް ދިމާވެފައި ވަނީ ސަރުކާރު ބަންދު ދުވަހަކަށެވެ. ވުމާއެކު ސްކޫލްގެ މެނޭޖްމެންޓްއަށް ވަނީ އެދުވަހު، ސްކޫލް އަހަރީ ދުވަސް ފާހަގަކުރެވޭގޮތް ނުވެފައެވެ.

މަޖީދިއްޔާގެ އަހަރީ ދުވަސް 21 އޭޕްރީލް 2019 ވާ އާދީއްތަ ދުވަހުގައި ވަނީކުލަ ގަދަކޮށް ފާހަގަ ކޮށްފައެވެ. ސްކޫލްތެރެ ޒީނަތްތެރި ކުރެވިފައިވާއިރު ސްކޫލްގެ ހޯލުތެރެވެސް ވަނީ ވަރަށް ފުރިހަމައަށް ތައްޔާރު ކުރެވިފައެވެ. ސްކޫލް ގެ ބާނީ، އަލްމަރްހޫމް މަޖީދު ރަންނަ ބަނޑޭރިފާނާއި، އަލްމަރްހޫމް އަމީން ދީދީ ގެ އިތުރުން މަޖީދިއްޔާގައި ކުރީގައި ޕްރިންސިޕަލް ކަން އަދާކުރި ގިނަ ބޭފުޅުންގެ ފޮޓޯތައްވެސް ވަނީ ޑިސްޕްލޭ ކުރެވިފައެވެ. ހަމަ އެއާއެކު ސްކޫލްއަށް ލިބިފައި ވާ ފޮނި ކާމިޔާބީތަކުގެ ޓްރޮފީތައްވެސް ވަނީ ހޯލް ތެރޭގައި އަތުރާލެވިފައެވެ.

މީގެ އިތުރުން މަޖީދިއްޔާއާއި ބެހޭގޮތުން ލިޔެވިފައިވާ އެކި އެކި ލިޔުންތަކާއި، މަޖައްލާތަކުގެ އިތުރުން ކެޕްސޫލްއިން ރިކަވަރ ކުރެވުނު ބައެއް ތަކެތި ވެސް ވަނީ ފެންނަ ގޮތަށް ހޯލުގައި ޑިސްޕްލޭ ކުރުވިފައެވެ.

މިއަދުގެ ހެނދުނު ދަންފަޅީގެ ޝެޝަން ފެށިގެން ދިޔައީ މާސް އެސެންބިލީ އަކުންނެވެ. މިއެސެންބްލީ ޝަރަފުވެރި ކޮށްދީފައި ވަނީ އެޑިޔުކޭޝަން މިނިސްޓަރ އައިޝަތު އަލީއެވެ. މި އެސެންބްލީގައި ސޫކްލް ގެ ޕްރިންސްޕަލާއި އިސްބޭފުޅުންގެ އިތުރުން ސްޓޭޓް މިނިސްޓަރ އަބްދުﷲ ރަޝީދުއާއި މިހާރުގެ އެޑިޔުކޭޝަންގެ ނައިބު އަދި ކުރީގެ މަޖީދިއްޔާ ސްކޫލް ގެ ލޮބުވެތި ދެޕިއުޓީ ޕްރިންސިޕަލް ޝަރުމާ މެޑަމް ވެސް ބައިވެރި ވެފައި ވެއެވެ.

މި އެސެންބްލީގެ ޝަރަވެރި މެހެމާން އެޑިޔުކޭޝަން މިނިސްޓަރ އައިޝަތު އަލީ ވިދާޅުވެފައި ވަނީ "ފިނިފެންމަލުގެ ދާނުގައި އަޅުގަނޑުމެން އަރާމުކުރަން އޮށްވައި އަޅުގަނޑުމެންނަށް ފެންނާނީ އެހެން ސްކޫލްތައް ކުރިއަރައި ދާތަން ކަމުގައެވެ." އަދި އެޔާއެކު " މާޒީގެ ފަޙުރުވެރި މޮޅުކަން ވާންޖެހޭނީ މުސްތަގްބަލްގައި އެއަށްވުރެ މަތިވެރި ކާމިޔާބީއެއް ހާސިލްކުރުމަށް ހިއްވަރެއް ކަމުގައެވެ."

އެކަމަނާގެ ވާހަކަ ފުޅަށްފަހު ދެން ވާހަކަ ދެއްކެވީ ސްކޫލް ގެ ޕްރިންސްޕަލް އައިޝަތު ސޯލިހެވެ. ޕްރިސްޕަލްގެ ވާހަކާގައި މަޖީދިއްޔާ މަޖީދިއްޔާގެ ގޮތުގައި ދެމި އޮތުމަށް މަޖީދިއްޔާއިން ނަގައިފައިވާ ބައި ( ދަރުމަވަންތަ ބާފަޅި) އަބުރާ އަލުން މަޖީދިއްޔާ ލިބޭނޭ ގޮތް ހައްދަވާ ދިނުމަށް އެކަމަނާ އިއުތިމާސް ކުރައްވާފައި ވެއެވެ.

ހެދުނު ދަންފަޅިއެކޭ އެއްގޮތަށް މެންދުރު ދަންފަޅީގައި ވެސް ހާއްސަ ބޮޑު އެސެންބްލީއެއް ބޭއްވިގެން ދިޔައެވެ. މިއެސެންބްލީ ޝަރަފުވެރި ކޮށްދެއްވީ މިހާރުގެ އެޑިޔުކޭޝަންގެ ނައިބު އަދި ކުރީގެ މަޖީދިއްޔާ ސްކޫލް ގެ ލޮބުވެތި ދެޕިއުޓީ ޕްރިންސިޕަލް ޝަރުމާ މެޑަމްއެވެ. އެކަމަނާގެ ވާހަކަ ފުޅުގައި މިހާރުގެ މަޖީދިއްޔާގެ ޕްރިންސްޕަލްގެ ފަރާތުން ކުރީގައި މަޖީދިއްޔާގައި މަސައްކަތް ކުރައްވަމުން އައިރު އެތައް މުހިންމު ފިލާވަޅުތަކެއް ދަސްވެފައި ވާކަމާށާއި، އެކަމަނާގެ އުންމީދަކީ މި ޝަރަފުގެ ހިޔާ މުސްތަގްބަލް ގައި ވެސް ހަމަ އެފަދަ ޝަރަފުވެރި ރަން ވަނަތައް ހޯދާ މިއަދުގެ މުޖްތަމައުގައި ގަދަރާއި އިއްޒަތް ލިބިގެންވާ މޮޅު ކުދިންތަކެއް މުޖްތަމައުއަށް ނެރޭ ސްކޫލްއަކަށް ހެދުމަށް ގަދައަޅާ މަސައްކަތް ކުރުމަށް ވިދާޅު ވިއެވެ. އަދި ހަމަ އެބީދާގައި މަޖީދިއްޔާގެ ވިސަންގައި ވާ ގޮތުގެ މަތިން ދަރިވަރުން ގެއަހްލާގާއި ސްލޫގު ބައްޓަން ކުރުމަށް ގޮވާލިއެވެ.

މިއަދުގެ އެސެންބްލީގައި ސްކޫލްގެ ބޭންޑް ސްކޫލް ލަވަ އާއި ގައުމީ ސަލާމް ކުޅެފައިވެއެވެ. ހަމަ އެޔާއެކު ކެޑޭޓް ކުދިން ދިދަނެގުމުގެ ރަސްމީޔާތެއްވެސް ކުރިޔަށް ގޮސްފައި ވެއެވެ. މީގެ އިތުރުން ސްކޫލް ކުދިންގެ ފަރާތުން ހުށައެޅުމެއްވެސް ވަނީ ތަމްސީލް ކޮށްފައެވެ. އެސެންބްލީ ނިންމާލާފައި ވަނީ ސްކޫލްއަށް 92 އަހަރު ފުރުމުގެ އުފަލުގައި ކޭކެއް ފެޅުމާއިއެކުއެވެ.