ވަކިވުމާ ހަމައަށް ސީއީއޯ އަށް މުސާރަދިނިން: ޑިވެލޮޕްމަންޓް ބޭންކު
ލިޔުންތެރިޔާ
ޚަދީޖާ އަރުފާ
ޑިވެލޮޕްމަންޓް ބޭންކް އޮފް މޯލްޑިވްސްގެ ކުރީގެ ޗީފް އެގްޒެކެޓިވް އޮފިސަރ އަދި މެނޭޖިންގ ޑިރެކްޓަރ، ނޯއެލް ގްރެގަރ ޕެޓަރސަން-ޖޯންސް މަގާމުން ވަކިވުމާއި ހަމައަށް މުސާރަ ދީފައިވާނެ ކަމަށް އެ ބޭންކުން ބުނެފިއެވެ.
ނޯއެލް އިސްތިޢުފާ، ހުށަހެޅުއްވީ ޑިވެލޮޕްމަންޓް ބޭންކްއިން މުސާރަ ނުދިނުމުން ކަމަށާ، އެ މައްސަަލަ ޓްރައިބިޔުނަލްއަށްވެސް ހުށަހަޅާފައިވާ ކަމަށް ޚަބަރުތައް ފެތުރެމުންދާއިރު، އެކަމާއި ގުޅިގެން ޑިވެލޮޕްމަންޓް ބޭންކް އިން ނެރުނު ނޫސް ބަޔާނެއްގައި ބުނީ، ނޯއެލް އިސްތިޢުފާ ހުށަހެޅުއްވި ތާރީޚާ ހަމައަށް އޭނާއަށް ޙައްޤު މުސާރަ ފުރިހަމައަށް ދީފައިވާކަމަށެވެ.
އެހެންކަމުން، އޭނާ އިސްތިޢުފާ، ހުށަހަޅުއްވާފައިވަނީ އެ ބޭންކްއިން މުސާރަ ނުދީގެން ކަމަށް ނުދެކޭ ކަމަށްވެސް ބުންޏެވެ.
ޑިވެލޮޕްމަންޓް ބޭންކުން އިތުރަށް ބުނީ، ނޯއެލް 20 މާިޗު 2025 ވަނަ ދުވަހު ޕްރައިވަޓައިޒޭޝަން އެންޑް: ކޯޕަރަޓައިޒޭޝަން ބޯޑަށް ހުށަހެޅުއްވި އިސްތިޢުފާ، އެ ތާރީޚުން ފެށިގެން، ބަލައިގަނެ އެކަން، ޑިވެލޮޕްމަންޓް ބޭންކް އޮފް މޯލްޑިވްސްގެ ޑިރެކްޓަރުންގެ ބޯޑަށާއި ނޯއެލްއަށް 23 މާރިޗު 2025 ވަނަ ދުވަހު އަންގާފައިވާ ކަމަށެވެ.
އަދި ނޯއެލް ވަނީ މަގާމުން، އިސްތިޢުފާ، ދެއްވުމުގެ ދުވަސްކޮޅެއް، ކުރިން ދިވެހިރާއްޖެ ދޫކޮށް ވަޑައިގެންފައިކަމަށާއި، އިސްތިޢުފާ ހުށަހެޅުއްވުމަށްފަހު އެ ބޭންކުގެ ވަޒީފާގައި އެއްވެސް ދައުރެއް އޭނާ އަދާކޮށްފައިނުވާކަމަށް އެ ބޭންކުން ބުނެއެވެ.
މީގެ އިތުރުން، ނޯއެލް އިސްތިޢުފާ، ހުށަހެޅުއްވި ނޯޓިސްގެ މުއްދަތުގެ މުސާރައާ ބެހޭގޮތުން އޭނާ، ވަޒީފާއާބެހޭ، ޓްރައިބިއުނަލްއަށް ހުށަހަޅުއްވާފައިވާ މައްސަލައާ ބެހޭ މަޢުލޫމާތު އެ ބޭންކަށް ލިބިފައިވާ ކަމަށާ، އެ މައްސަލައާ ގުޅިގެން ކުރިއަށްގެންދާ އެންމެހާ މަސައްކަތްތައް ކުރަމުންދަނީ އެ ބޭންކުގެ ޤާނޫނީ ވަކީލުންގެ ޓީމަކުން ކަމުގައި ބުނެފައިވެއެވެ.
އަދި އެ މައްސަލަ ފައިސަލާކުރުމުގައި އެ ބޭންކްއިން ފުރިހަމަކުރަންޖެހޭ އެންމެހާ، ޤާނޫނީ އިޖުރާޢަތްތަކާ އެއްގޮތްވާ، ގޮތުގެ މަތިން ޢަމަލުކުރަމުންދާނެ ކަމުގައިވެސް ބުނެފައިވެއެވެ.
ހަމައެހެންމެ، ޑިވެލޮޕްަންޓް ބޭންކް އޮފް މޯލްޑިވްސްގެ މެންޑޭޓް އަދާކުރުމަށް ކުރަމުންދާ މަސައްކަތްތަކުގެ ތެރެއިން، ޕީސީބީގެ ބޯޑުގެ އެއްބާރުލުމާއެކު އެ ބޭންކަށް އައު ޗީފް އެގްޒެކެޓިވް އޮފިސަރ، އަދި މެނޭޖިންގ ޑިރެކްޓަރެއް ޢައްޔަންކުރުމުގެ މަސައްކަތްވެސް ކުރަމުންދާކަން ފާހަގަކޮށްފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
