ހުށަހެޅުމުގައި ސޮއި ކުރުމާއި އެއްބަސް ވުމުގައި ސޮއި ކުރުމުގެ ތަފާތަކީ ކޮބާ؟

މިއަދުގެ ސަރުކާރު ވެރިކަމަށް އައިސްފައިވަނީ ހަތަރު ލީޑަރުން ގުޅިގެންނެވެ. ވެރިކަމަށް އައިސް މާގިނަ ދުވަހެއްނުވެ ކޯލިޝަންގައި ރެނދުލާފައިވާ މަންޒަރު ފެންނަން ފަށައިފިއެވެ.

އެމައްސަލަ ޖެހުނީ މަޖިލިސް އިންތިޚާބަށް ފާޓީތަކަށް ގޮނޑިދޭނެ އުސޫލެއް ކަނޑަޅަން ދަތިވެގެންނެވެ. އެ މައްސަލަ އެންމެ ބޮޑަށް ޖެހުނީ ކޯލިޝަންގައި ހިމެނޭ އެންމެ ވަރުގަދަ ދެ ޕާޓީކަމަށްވާ އެމްޑީޕީއާއި ޖުމުހޫރީ ޕާޓީ އާއި ދެމެދުގައެވެ.

ޖުމްހޫރީ ޕާޓީގެ ލީޑަރު ބޭނުންވަނީ އެ ޕާޓީއަށް ގޮނޑި ގިނަވުމަށެވެ. އެމްޑީޕީގެ ރައީސް ނަޝީދު ބޭނުންވަނީ އެޕާޓީއަށް ގޮނޑި ގިނަވުމަށެވެ. ނަޝީދު ވިދާޅުވާ ގޮތުގައި ސަރުކާރުގެ ވައުދުތައް ފުއްދަން ފަސޭހަވާނީ މަޖިލީހުގެ މެޖޯރިޓީ އެމްޑީޕީއަށް ލިބިގެންނެވެ. ގާސިމް ވިދާޅުވީ ސަރުކާރުގެ ވައުދުތައް ފުއްދަން ވަކި ޕާޓީއަކަށް މަޖިލީހުގެ މެޖޯރިޓީ ލިބެން ނުޖެހޭ ކަމަށެވެ.

ކޮންމެއަކަސް އެމްޑީޕީގެ އިސްސަފުގައި ހަރަކާތްތެރިވާ މީހުންނާއި، ޖޭޕީގެ އިސްސަފުގައި ހަރަކާތްތެރިވާ މީހުންދަނީ އެއްބަޔަކު އަނެއްބަޔަކަށް ބަހުގެ ހަމަލާތައް ރައްދުކުރަމުންނެވެ.

އެއާއެކު އެންމެ ބޮޑަށް މިހާރު ދެކެވިގެން އަންނަ ވާހަކައަކީ ކޯލިޝަން އެއްބަސްވުމެއްގެ ވާހަކައެެވެ. ގާސިމްވެސް އަދި ކޯލިޝަންގައި ހިމެނޭ އެހެން ޕާޓީތަކުންވެސް ފުރަތަމަ ވިދާޅުވަމުން ގެންދިޔައީ ރިޔާސީ އިންތިޚާބަށް އެއްބަސްވުންތަކެއް ވިވާހަކައެވެ.

ނަމަވެސް "ރާއްޖެޓީވީ" ގެ ޕްރޮގްރާމްގައި ވާހަކަދައްކަވަމުން އެމްޑީޕީގެ ޗެއާޕާރސަން ހަސަން ލަތީފް ވިދާޅުވީ، ގުޅިފައިވާ ޕާޓީތަކުގެ ކޯލިޝަން އެއްބަސްވުމެއްގައި އެމްޑީޕީން ސޮއިކޮށްފައެއް ނޯންނާނެ ކަމަށެވެ. އަދި ސަރުކާރު ބަހާނެ ގޮތެއްވެސް، އެހެން ކަމެއް ކުރާނެ ގޮތެއް ވެސް އޮންނާނީ ހަމައެކަނި ވަކިވަކިން ޕާޓިތަކާ އެކީގައިކަމަށެވެ.

އޭގެ އިތުންވެސް ގުޅިފައިވާ ކޯލިޝަނުން އެއްބަސް ވުމެއްގައި ސޮއިކޮށްފައި ނޯންނާނެ ކަމަށާއި ސޮއި ކުރީ ބޭނުންވާ ގޮތް ހުށަހެޅި ހުށަހެޅުންތަކުގައި ކަމަށެވެ.

މިހާރު އޮޅުން އަރަނީ އެއްބަސް ވުމާއި ހުށަހެޅުންތަކާއި ހުރި ތަފާތާއި ގުޅޭގޮތުންނެވެ. ހުށަހެޅުންތަކެއް ހުށަހަޅައިގެން އެއާ އެއްބަސްވެ ސޮއި ކޮށްފިނަމަ އެ އެއްބަސް ވުމަކަމަށް ނުވާންވީ ސަބަބައެއް ނެތެެވެ. އޭގެ އިތުރުން ހުށަހެޅި ކަންތައްތަކަށް ނޫނެކޭ ބުނެފިނަމަ އެއީ ހުށަހެޅުންތަކާއި އެއްބަސް ނުވެވުނީއެވެ.

ކޯލިޝަނުގައި ހަމަނުޖެހުން ބޮޑުވެ އަމިއްލަ އެދުން ކޮންމެ ޕާޓީއަކުންވެސް އިސްކުރަމުން އަންނަ އިރު ކޯލިޝަން ރޫޅި ވިއްސި ވިހާލިވެގެންދާން މާގިނަ ދުވަހުން ނުނަގާނެ ކަމަށް ކޯލިޝަންގެ ތެރެއިންނާއި ބޭރުން ދަނީ ބުނަމުންނެވެ.