ވައިކަރަދޫ އެކްސިޑެންޓްގައި އަނިޔާވި ދެމީހުންނަށް އައިޖީއެމްއެޗްގައި ފަރުވާ ދޭންފަށައިފި

އިއްޔެ ހަވީރު 5:30 ހާއިރު ހދ. ވައިކަރަދޫގައި ހިނގި ނުރައްކާތެރި އެކްސިޑެންޓްގައި އަނިޔާވި ދެމީހުން އިތުރު ފަރުވާއަށް މާލެ ގެންގޮސް، އައިޖީއެމްގައި ފަރުވާ ދޭން ފަށައިފިއެވެ.

''ވޮއިސް'' އަށް މައުލޫމާތު ދެއްވަމުން އައިޖީއެމްއެޗްގެ މީޑިއާ އޮފިޝަލު ވިދާޅުވީ، ކުޅުދުއްފުށީ ހޮސްޕިޓަލުން މިއަދު މާލެ ގެނައި ދެމީހަކަށް އައިޖީއެމްއެޗުގައި ފަރުވާ ދެމުންދާކަމަށެވެ.

އޭނާ ވިދާޅުވީ ހާލުބޮޑު ދެ މީހަކު އައިޖީއެމްއެޗަށް ގެނައީ މިރޭ 6:45 ހާއިރު ކަމަށާއި ދެ މީހުންނަށްވެސް އެމަޖެންސީގައި ފަރުވާދެމުންދާކަމަށެވެ. ލިބިފައިވާ އަނިޔާގެ ތަފްސީލު ޑޮކްޓަރުން ހާމަނުކުރައްވާކަމަށް އޭނާ ވިދާޅުވިއެވެ.

''ޑޮކްޓަރުން މިހާރު ދަނީ ބަލަމުން. އަދި އިތުރު އެއްވެސް އެއްޗެއް ޑޮކްޓަރުން ވިދާޅެއް ނުވޭ.'' އޮފިޝަލު ވިދާޅުވިއެވެ.

ކުޅުދުއްފުށީ ރީޖަނަލް ހޮސްޕިޓަލު ހިންގުމާއި ހަވާލުވެ ހުންނެވި އަހުމަދު ދާއޫދު މިއަދު މެންދުރު ވިދާޅުވީ، އެކްސިޑެންޓްވި ދެމީހުންގެ ތެރެއިން އެކެއްގެ ހާލު ވަރަށް ސީރިއަސް ކަމަށެވެ. އޭނާއަށް އައިސީޔޫގައި ވެންޓިލޭޓަރުގައި ބާއްވައިގެން ފަރުވާ ދެމުންދާ ކަމަށް ވިދާޅުވިއެވެ.

އައިސީޔޫގައި ފަރުވާ ދެމުންދާ މީހާގެ ސީޓީ ސްކޭނެއް ހެދިއިރު، ސިކުނޑިއަށް ލޭ އެޅިފައިވާ ކަމަށްވެސް އަހުމަދު ވިދާޅުވިއެވެ.

އިއްޔެ ހަވީރު ހިނގި މިއެކްސިޑެންޓްގައި ބޮޑަށް އަނިޔާވެފައިވަނީ ހދ. ވައިކަރަދޫ ފެމޯރާ، 48 އަހަރުގެ މުހައްމަދު ޒާހިރަށެވެ. އެކްސިޑެންޓްވި ދެވަނަ މީހަކީ ހދ. ވައިކަރަދޫ 20 އަހަރުގެ ވިޔާމު ވަހީދެވެ.

މަންޒަރު ދުށް މީހަކު ''ވޮއިސް'' އަށް މައުލޫމާތު ދެމުން ބުނީ، މިއެކްސިޑެންޓް ހިނގާފައިވަނީ، ސުލައިމާނިއްޔާ ސުކޫލު ކުރިމަތީގަ ކަމަށެވެ. ބާރު ދުވެލީގައި ދުއްވާފައި ދިޔަ ސައިކަލު ޖެހި، ދެވަނަ ސައިކަލުގައި އިން ޒާހިރު ވިއްސައިގެން ގޮސް، ތެޅިގަލުން ރާނާ، ސިމެންތި ނުޖަހާ ހުރި ފާރެއްގައި ބޯޖެހިފައި ވެއެވެ. ބޮލުގައި ހުރި އިސްތަށިތައް ފާރުގައި ހުރި ކަމަށް މަންޒަރު ދުށް މީހުން ބުންޏެވެ. ކުޅުދުއްފުށީ ރީޖަނަލް ހޮސްޕިޓަލުގެ އައިސީޔޫގައި ޒާހިރުއަށް ފަރުވާ ދިނުމަށްފަހު އޭނާ މާލެ ގެނައި އިރު، އަދިވެސް އޭނާ ހޭނާރައެވެ.

ވައިކަރަދޫ ސިއްހީ މަރުކަޒު ހިންގުމާއި ހަވާލުވެ ހުންނެވި އަބްދުލްހަމީދު، ''ވޮއިސް'' އަށް ވިދާޅުވީ، އެކްސިޑެންޓުވުމާއެކު، ސިއްހީ މަރުކަޒަށް ގެނައި އިރުވެސް ހޭނެތިފައިވާކަމަށެވެ. އަދި އަނގަޔާއި ނޭފަތާއި ކަންފަތުން ލޭއައިސް، ބޯ ފަޅައިގެން ގޮސްފައިވާކަމަށް ހަމީދު ވިދާޅުވިއެވެ.

ފުލުހުން ބުނީ، ވައިކަރަދޫގައި ހިނގި އެކްސިޑެންޓުގެ މައްސަލަ ފުލުހުން ބަލަމުންދާކަމަށެވެ. ސައިކަލު ދުއްވި ދެމީހުންގެ އަތުގައިވެސް ލައިސަންސެއް ނޯވެއެވެ.