މީސްމީޑިއާގައި ފާހިޝް ކަންކަން ފަތުރާއިރު އެކަމާމެދު ސުވާލުކުރެވޭނެކަން ނޭނގެނީ ހެއްޔެވެ؟

މީސްމީޑިއާގެ އެކިއެކި މަންސަތައް މެދުވެރިކޮށް ފާހިޝް ކަންކަން ފަތުރާއިރު، އެކަން ކުރާ މީހުންގެ ޢަމަލުތަކާމެދު ޤިޔާމަތްދުވަހުން ސުވާލު ކުރެވޭނެ ކަމަށާ އެކަން އެމީހުންނަށް ނޭނގެނީތޯ މިއަދުގެ ޚުތުބާގައި ސުވާލުކޮށްފިއެވެ.

ފާހިޝް ޢަމަލުތަކާ ދުރުހެލިވުމާ ގުޅޭ ގޮތުން މިއަދު އިއްވި ހުކުރު ޚުތުބާގައި ބުނީ، އެއީ الله އަހަރެމެންނަށް އަމުރުކުރައްވާފައިވާ ކަމެއް ކަމަށާ އެފަދަ ކަންކަމާ ކައިރި ވެސް ނުވުމަށް އަންގަވައި އަމުރުކުރައްވާފައިވާ ކަމަށެވެ.

އެކަލާނގެ ވަޙީކުރައްވައިފައިވާ ބަސްފުޅެއްގެ މާނާގައިވެއެވެ.

"އަދިفاحش ކަންތައްތަކާ ތިޔަބައިމީހުން ކައިރި ނުވާށެވެ! އޭގެތެރެއިން ފާޅުވެގެންވާކަންތަކާއި، ވަންހަނާ ވެގެންވާ ކަންތަކެވެ."

މިއައެކު ޚުތުބާގައި ބުނީ، އިސްލާމްދީންވަނީ ފާޙިޝްކަންތައްތަކާ ދުރުހެލިވުމުގެ އިތުރަށް އެ ފަދަ ކަންތައްތައް ފެތުރުމާއި އެ ފަދަ ކަންކަމަށް މަގުފަހިކޮށްދޭ ހުރިހައި ކަމެއްވެސް ޙަރާމްކުރައްވައިފައިވާ ކަމަށެވެ. އެގޮތުން، ޒިނޭގެ ހަޑިމުޑުދާރު ފާޙިޝް ޢަމަލު ޙަރާމްކަމުގެ ވާހަކަ ބަޔާންކުރުމުގެ ކުރީގައި އެ ކަމަށް މަގުފަހިކޮށްދޭ ޙަރާމް ބެލުންތަކުން ދުރިހެލިވުމަށް އަންގަވައިފައިވާކަން ފާހަގަކޮށްފައުވެއެވެ.

ޚުތުބާގައި އިތުރަށް ބުނީ ވަނީ ފާޙިޝްކަންތައްތަކާ ދުރުހެލިވުމުގެ އިތުރަށް، އެ ފަދަ ކަންތައްތަކަށް އަރައިނުގަތް ކަމުގައިވީ ނަމަވެސް، ފާޙިޝްކަންތައްތައް މުސްލިމުންގެ ތެރޭގައި ފެތުރުމަށް ލޯބިކުރާ މީހުންނަށް ދުނިޔެއާއިއާޚިރަތުގައި ވެސް ބޮޑުވެގެންވާ ޢަޛާބުހުރިކަން الله އަންގަވައިފައިވާ ކަމަށެވެ.

އެކަލާނގެ ވަޙީކުރައްވައިފައި ވެއެވެ. މާނައީ: "ހަމަކަށަވަރުން، إيمانވީ މީހުންގެ ތެރޭގައި ހުތުރުކަން ބޮޑު ފާފައިގެ ވާހަކައާއި، عمل، ފެތުރިގެންދިއުމަށް ލޯބިކުރާ މީހުން (ދަންނާށެވެ!) ދުނިޔެއާއި آخرةގައި ވޭންދެނިވި عذاب އެ މީހުންނަށް ހުށްޓެވެ. الله ދެނެވޮޑިގެންވެތެވެ. އަދި ތިޔަބައިމީހުންނަކަށް ނޭނގެތެވެ."

ޚުތުބާގައި ބުނެފައިވާގޮތުން ޤައުމެއްގައި ފާޙިޝް ކަންތައްތައް ފެތުރި ޢާންމުވުމަކީ އެތަނަކަށް اللهގެ ކޯފާ އަންނާނޭ ސަބަބެއްކަން ނަބިއްޔާ ﷺ ގެ ބަސްފުޅުން އެނގޭ ކަމަށެވެ.

މިއާއެކު ޚުތުބާގައި ވަނީ، އަދުގެ މުޖުތަމަޢުތަކުގައި ފާޙިޝް ކަންތައްތައް ފެތުރުމުގެ އެންމެ ބޮޑު ދައުރެއް އަދާކުރަނީ މީސްމީޑިއާގެ ވަސީލަތްތައްކަން ފާހަގަކޮށްފައެވެ.

އެގޮތުން އެއްވެސް ލަދެއްނެތި، ދުވާލެއް ރޭގަނޑެއް ބެލުމެއްނެތި، ހިތުހުރިހައި ވާހަކަތަކާއި، އޯޑިއޯތަކާއި ވީޑިޔޯތައް، އެ ވިއުގަތަކުގައި ފަތުރަނީ ކުޑަކުދިންނާއި، ޒުވާނުންނާއި، އެންމެހައި އަފުރާދުންނަށް އެއިންލިބިދާނޭ ގެއްލުމާއި ހަލާކަށް ވިސްނައިލުމެއް ފިކުރުކުރުމެއްނެތި ކަމަށް ބުނެފައިވެއެވެ. އަދި ޝަރުޢީ މިންގަޑުތަކަށް ބެލުމެއް ރިޢާޔަތްކުރުމެއްނެތިކަންވެސް ފާހަގަކޮށްފައިވެއެވެ.

މިފަދަ ވަސީލަތްތައް ހިންގާފަރާތްތަކާއި މި ވަސީލަތްތައް ބޭނުންކުރާ ޢާންމު ފަރުދުން މިކަންކަންކުރަނީ، ފަހެ، އެބައިމީހުންގެ މި ޢަމަލުތަކަށް الله ތަޢާލާ ފާރަވެރިވެ ބައްލަވައިވޮޑިގެންވާކަން ހަނދުމަނެތިހެއްޔެވެ؟ އެ ޢަމަލުތަކާ މެދު الله ތަޢާލާ ޤިޔާމަތްދުވަހު ސުވާލުކުރައްވާނޭކަން ނޭނގިހެއްޔެވެ؟

ޚުތުބާ

ޚުތުބާގައި ވަނީ އެފަދަ ކަންކަން ފެތުރުމާއި ޢާންމުކުރުމުން ދުރުހެލިވެ، ޝަރުޢީ ގޮތުން ހުއްދަނޫން މަންޒަރުތަކާއި އަޑުތައް ނުހިމެނޭ ގޮތަށް، ޝަރުޢީ އިމުގެތެރެއިން މީޑިޔާގެ ވަސީލަތްތައް ބޭނުންކުރުމަށް ނަސޭހަތްތެރިވެފައެވެ.

އަދި ފާޙިޝް ޢަމަލުތަކާ ދުރުހެލިވެ ރަނގަޅު ތައުބާއަކުން އަވަހަށް ތައުބާވެ، ފާޙިޝް ކަންތައްތަކުން މުޖުތަމަޢު ސަލާމަތްކުރަން މަސައްކަތްކުރާ ލަފާދާރު ޞާލިޙު މީހަކަށްވުމަށްވެސް ނަޞޭހަތްތެރިވެފައިވެއެވެ.