ޖާސޫސުކުރި މީހުން ފިލިޕީންސް އޮފިޝަލުންނަށް ރިޝްވަތު ދިން: ރިޕޯޓް

ފިލިޕީންސްގެ އަސްކަރީ މަރުކަޒުތައް ކައިރިން ޖާސޫސުކުރުމުގެ ތުހުމަތުގައި ހައްޔަރުކުރި ޗައިނާގެ 4 މީހުން، ފިލިޕީންސްގެ އޮފިޝަލުންނަށް އެކި ފަހަރު މަތިން ރިޝްވަތު ދީފައިވާކަމަށް ރިޕޯޓްތައް ބުނެފިއެވެ.

އެގޮތުން ފިލިޕީންސްއާއި އެމެރިކާގެ އަސްކަރީ ބޭސްތަކެއް ހުންނަ ޓާލަކް ސިޓީގެ އޮފިޝަލުންނަށް ރިޝްވަތުގެ ގޮތުގައި ފައިސާ ދީފައިވާއިރު، ފިލިޕީންސްގެ ފުލުހުންތަކަކަށް ސައިކަލުތަކެއްވެސް ގަނެދީފައިވާކަމަށް ރިޕޯޓްތައް ބުނެއެވެ. މިމީހުން ހައްޔަރުކޮށް ބެލިބެލުމުން، ދެކުނު ޗައިނާ ކަނޑުގައި ހަރަކާތްތެރިވާ ފިލިޕީންސްގެ އަސްކަރީ އުޅަނދުތަކުގެ ފޮޓޯތަކާއި ވީޑިއޯތައްވެސް އެމީހުންގެ އަތުގައި ހުއްޓެވެ. އަދި ފޮޓޯއާއި ވީޑިއޯ ނެގުމަށް ޑްރޯންވެސް އެމީހުން ބޭނުންކޮށްފައިވާކަން ތަހުގީގުން ފާހަގަވެފައިވާކަމަށް ފިލިޕީންސްގެ ނޭޝަނަލް ބިއުރޯ އޮފް އިންވެސްޓިގޭޝަންސްއިން ބުންޏެވެ.

ފިލިޕީންސްއިން ތުހުމަތުކުރާ ގޮތުގައި އެމީހުންނަކީ ޗައިނާގެ ކޮމިއުނިސްޓް ޕާޓީއިން ގައުމުން ބޭރަށް ނުފޫޒު ފޯރުވުމަށް ހަރަކާތްތެރިވާ ނެޓްވޯކްގައި ހިމެނޭ ބައެއް މަދަނީ ޖަމްއިއްޔާތަކުގެ ލީޑަރުންނެވެ. ފިލިޕީންސްއިން މިމައްސަލައިގައި ހައްޔަރުކުރި އެންމެންވެސް މެނީލާގައި ހުންނަ ޗައިނާގެ އަސްކަރީ އެޓާޝޭއާއި އެކި ފަހަރު މަތިން ބައްދަލުވެފައިވާކަމަށާއި، އެކަމާއި ގުޅޭ ފޮޓޯއާއި ވިޑީއޯ ފެނިފައިވާކަމަށް ރޮއިޓަރސްއިން ވަނީ ރިޕޯޓްވެސްކޮށްފައެވެ.

ފިލިޕީންސްގެ ތުހުމަތުތައް ޗައިނާއިން ދޮގުކުރެއެވެ. އަދި އެހެން ގައުމުތަކުގައި ތިބޭ ޗައިނާގެ ރައްޔިތުންވެސް އެގައުމުތަކުގެ ގާނޫނަށް ބޯލެނބުމަށް އަބަދުވެސް އެދެމުންދާނެކަމަށް ޗައިނާ ޚާރިޖިއްޔާއިން ބުންޏެވެ.