ފަހުވަގުތުގައި ރައީސް މުޢިއްޒަށް ލިޔުއްވި ސިޓީގައި، ބޭނުންވާ ކަންކަން ނުވާނެ ވަގުތު އަންނާނެ ކަމަށް ދެންނެވިން: ރައީސް ޞާލިޙް

ވެރިކަން ނިންމަވާލައްވައި، ގެއަށް ވަޑައިގެންނެވުމުގެ ކުރިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ސިޓީފުޅެއް ލިޔުއްވި ކަމަށާ، އެސިޓީފުޅުގައި، އެމަނިކުފާނަށް ގިނަ ނަޞޭޙަތްތަކެއް ދެއްވާފައިވާނެ ކަމަށް ކުރީގެ ރައީސް އިބްރާޙީމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަދައްކަވަމުންނެވެ.

އެގޮތުން ރައީސް ޞާލިޙް ވިދާޅުވީ، އެމަނިކުފާނުގެ ވެރިކަމުގައި ކުރެވުނު ތަޖުރިބާއާއި، ވެރިކަން ކުރެއްވި އިރު ކުރިމަތިވި ދަތިތަކާއި، ވެރިކަން ކުރަންޖެހޭގޮތް، އެމަނިކުފާނުގެ ތަޖުރިބާގެ އަލީގައި، ދެން އަންނަ ބޭފުޅަކަށް ހިއްސާ ކޮށްލުމަށް، ނޯޓް ކޮށްލަންޖެހޭނެ ކަމަށް ދެކެވަޑައިގެން ރައީސް މުޢިއްޒަށް ސިޓީފުޅެއް ލިޔުއްވި ކަމަށެވެ.

އަދި އެ ސިޓީފުޅު ރައީސް މުޢިއްޒަށް ލިބޭނެކަން ޔަގީންކުރެއްވި ކަމަށެވެ.

ރައްޔިތުންގެ މަސްލަޙަތު އިސްކުރަންޖެހޭނެ ކަމާއި، މަޝްވަރާ ކުރަންޖެހޭނެ ކަމާއި، އިސްލާމީ އުސޫލުތަށް ނަގަހައްޓަން ޖެހޭނެ ކަމާއި، އިސްކުރަންޖެހޭނީ ގައުމީ މަސްލަހަތު ކަމާ، ދަތި އުނދަގޫ ދަނޑިވަޅު އަންނާނެ ވާހަކައާއި، ތިމާ ބޭނުންވާ ގޮތަށް ކަންކަން ނުކުރެވޭނެ ދަނޑިވަޅު އަންނާނެ ކަމާއި، އަދި ބޭނުންވާ ގޮތް ނޫން އެހެން ގޮތަކަށް ކަންކަން ނިންމަންޖެހޭނެ ކަމާ، އެހުރިހާ ވާހަކައެއް އަޅުގަނޑު، (ލިޔުނިން)

ކުރީގެ ރައީސް ޞާލިޙް

ރައީސް ޞާލިޙް ވިދާޅުވި ގޮތުގައި، އެ ސިޓީފުޅުން ކޮންމެވެސް ވަރެއްގެ އިބްރަތެއް ލިބިވަޑައިގަންނަވާނެ ކަމަށް އުއްމީދު ކުރެއްވި ކަމަށެވެ.

މިއަދުގެ ޕްރޮގްރާމްގައި ވާހަކަދައްކަވަމުން ރައީސް ޞާލިޙް ވަނީ އަދުގެ ސަރުކާރުގެ ސިޔާސަތު ތަކަށް ވަރަށް ބޮޑަށް ފާޑުވިދާޅުވެފައެވެ.