ސަރުކާރުން ކޮށްފައިވާ ހަރަދުތައް ވަރަށް ބޮޑަށް ކުޑަކޮށްފި

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރުގައި، މިދިޔަ އަހަރުގެ މި މުއްދަތާއި އަޅާ ބަލާއިރު، މިއަހަރު ހަރަދުތައް ވަރަށް ބޮޑަށް ކުޑަކޮށްފައިވާކަން މާލީ ވުޒާރާގެ ތަފާސް ހިސާބުތަކުން ދައްކައިފިއެވެ.

ރާއްޖޭ ގެ މާލީ އަދި އިގްތިޞާދީ ހާލަތު ރަނގަޅުކުރުމަށް ސަރުކާރުން ގިނަ މަސައްކަތްތަކެއް ކުރަމުން އަންނައިރު، މާލީ ވުޒާރާއިން އާއްމު ކުރި ތަފާސް ހިސާބުތަކުން ދައްކާ ގޮތުގައި، ޖޫން މަހުގެ 20 ވަނަ ދުވަހުގެ ނިޔަލަށް ދައުލަތުން 17.8 މިލިއަން ރުފިޔާ ވަނީ ހަރަދުކޮށްފައެވެ. 2023 ވަނަ އަހަރުގެ މި މުއްދަތުގައި އޭރުގެ ސަރުކާރުން 22.22 ބިލިއަން ރުފިޔާ ހަރަދުކޮށްފައިވާއިރު, މިއީ މި އަހަރާއި އަޅާ ބަލާއިރު، 4.4 ބިލިއަން ރުފިޔާ އިތުރު އަދަދެކެވެ.

ޖުމްލަ ހަރަދުގެ ތެރެއިން މިއަހަރުގެ މިހާތަނަށް ހިންގުމުގެ ހަރަދުގެ ގޮތުގައި ސަރުކާރުން 14.2 ބިލިއަން ހޭދަކުރި އިރު، މިދިޔަ އަހަރު ސަރުކާރު ހިންގަން 15.2 ބިލިއަން ރުފިޔާ ހޭދަކޮށްފައިވެއެވެ. ހަމައެއާއިއެކު، ކެޕިޓަލްގެ ގޮތުގައި މިއަހަރު ތެރޭގައި 3.6 ބިލިއަން ރުފިޔާ ހަރަދު ކުރެވިފައިވާއިރު ފާއިތުވި އަހަރުގެ މި މުއްދަތުގައި ކެޕިޓަލް ހަރަދުގެ ގޮތުގައި 6.9 ބިލިއަން ރުފިޔާ ހަރަދު ކުރިކަމަށް ވެސް މާލީ ވުޒާރާއިން ހާމަކުރެއެވެ.

މިދިޔަ އަހަރުގެ މި މުއްދަތުގައި ބަޖެޓު ދަރަންޏަކީ 5.8 ބިލިއަން ރުފިޔާ އަށްވީ ނަމަވެސް، ރާއްޖޭގެ މާލީ ހާލަތު ރަނގަޅުކޮށް، އިގްތިޞާދު ކުރިއެރުވުމަށްޓަކައި ސަރުކާރުން އަޅަމުންދާ ހަރުދަނާ ފިޔަވަޅުތަކުގެ ސަބަބުން މި އަދަދު ވަނީ 2.3 ބިލިއަނަށް ކުޑަކުރެވިފައެވެ.

ކުރިއަށް އޮތް ދެ އަހަރުގެ ތެރޭގައި ދައުލަތުން ގާތް ގަނޑަކަށް 25 ބިލިއަން ރުފިޔާގެ ދަރަނި އަދާކުރަންޖެހޭއިރު، އެކަމަށްޓަކައި ސަރުކާރުން ވަނީ މިހާރުއްސުރެ މަސައްކަތްތައް ފަށާފައެވެ.