ލޯނު އަދާކުރުމަށް 10 ބިލިއަނަށްވުރެ ގިނަ ރުފިޔާ ހޭދަކޮށްފި

ދައުލަތުގެ ބަޖެޓުން އަހަރުގެ މިހާތަނަށް ލޯނު އަދާކުރުމަށް ރެކޯޑް އަދަދެއް ހޭދަވެފައިވާކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ފިނޭންސުން އާއްމުކޮށްފައިވާ ތަފާސްހިސާބަށް ބަލާއިރު، މިހިނގާ އޮކްޓޯބަރުމަހުގެ ނިޔަލަށް ލޯނު އަދާކުރުމަށް ބަޖެޓުން ކުރި ހޭދައުޅެނީ 10.09 ބިލިއަން ރުފިޔާގައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 5.6 ބިލިއަން ރުފިޔާގެ އިތުރުވުމެކެވެ. މިދިޔަ އަހަރުގެ މި މުއްދަތުގެ ތެރޭގައި ލޯނު އަދާކުރުމަށް ކުރި ހޭދައުޅެނީ 4.5 ބިލިއަން ރުފިޔާގައެވެ.

އަދާކުރި ލޯނަށް ބަލާއިރު، އެންމެ ބޮޑު ހޭދައެއްކޮށްފައިވަނީ ތަރައްޤީގެ ކަންކަމަށް ނަގާފައި ހުރި ލޯނުތައް އަދާކުރުމަށެވެ. އެއީ 4.7 ބިލިއަން ރުފިޔާއެވެ.

މިއަހަރު ވެގެންގޮސްފައިވަނީ ރާއްޖެއިން ބޭރުން ނަގާފައިވާ ދަރަނިތައް ދެއްކުމަށް ބޮޑު ހޭދައެއްކުރި އަހަރަކަށެވެ. އެގޮތުން ކުރީ ސަރުކާރުތަކުން ނަގާފައިވާ ދަރަނިތަކުގެ ތެރެއިން މިއަހަރުގެ ތެރޭގައި އެންމެފަހުން ދައްކާފައިވަނީ އިންޑިއާގެ ސްޓޭޓް ބޭންކު މެދުވެރިކޮށް ނަގާފައި އޮތް 150 މިލިއަން ޑޮލަރުގެ ޓްރެޒަރީ ބިލް ފެސިލިޓީގެ އެންމެ ފަހު 50 މިލިއަން ޑޮލަރެވެ. އޭގެ ކުރިން އެޕްރީލް މަހުގެ ދެ ވަނަ ދުވަހު 524 މިލިޔަން ޑޮލަރުގެ ސުކޫކާއި 23 އެޕްރީލުގައި އިންޑިއާއަށް ދެއްކި 400 މިލިޔަން ޑޮލަރުގެ ކަރަންސީ ސްވޮޕް ފައިސާވެސް ހިމެނެއެވެ.

މާލީ ވުޒާރާއިން ބުނެފައިވަނީ ބޮޑެތި ދަރަނިތަކެއް ދައްކަމުން ދިޔަނަމަވެސް ތެލާއި ކާޑާއި ބޭހުގެ އިތުރުން ޒަރޫރީ އެހެނިހެން މުދާ އެތެރެކުރުމަށް ބޭރު ފައިސާ ހޯދުމުގައި އެއްވެސް ހުރަހެއް ކުރިމަތި ނުވާނޭކަމަށެވެ.