އިންޑިޔާގެ ޗީފް މިނިސްޓަރަކު މުސްލިމު އަންހެނެއްގެ މޫނު ބުރުގާ ބާލައިފި

އިންޑިއާގެ ބިހާރުގެ، ޗީފް މިނިސްޓަރު ނިތީޝް ކުމާރު، އަންހެން ޑޮކްޓަރެއްގެ މޫނު ބުރުގާ ބާލައިފި އެވެ.

މި ހާދިސާއާ ގުޅިގެން އޭނާއަށް ވަރަށް ބޮޑަށް ފާޑުކިޔުންތައް އަމާޒުވެފައިވާއިރު، އޭނާގެ ނަފްސާނީ ހާލަތާ މެދު ވަނީ ސުވާލު އުފައްދާފައެވެ.

ނިތީޝް އަންހެން ޑޮކްޓަރުގެ މޫނުބުރުގާ ނެގީ އިއްޔެ ބިހާރުގެ ވެރިރަށް ޕަޓްނާގައި ބޭއްވުނު ސަރުކާރުގެ ރަސްމިއްޔާތެއްގައި، އޭޔޫއެސްއެޗް (އަޔުރުވޭދާ، ޔޯގާ އެންޑް ނެޗުރޯޕެތީ، ޔޫނާނީ، ސިއްދާ، އަދި ހޯމިއޯޕެތީ) ޑޮކްޓަރުންނަށް ވަޒީފާގެ ސިޓީ ހަވާލުކުރުމުގެ ރަސްމިއްޔާތުގެ ތެރެއިންނެވެ.

މި ރަސްމިއްޔާތުގައި 1،200 އަށް ވުރެ ގިނަ ޑޮކްޓަރުން ވަޒީފާގެ ސިޓީ ހަވާލުކޮށްފައިވެއެވެ. އެގޮތުން ނިތީޝް ކުމާރު ވަޒީފާގެ ސިޓީ ހަވާލުކުރަމުން ދަނިކޮށް، މޫނުބުރުގާ އަޅައިގެން ހުރި އަންހެން ޑޮކްޓަރަކު ސިޓީއާ ހަވާލުވާން ދިޔުމުން އޭނާ އެންމެފުރަތަމަ އެންގީ އެ ޑޮކްޓަރުގެ މޫނުބުރުގާ ބޭލުމަށެވެ.

އެކަމަށް ’ރިއެކްޓ‘ ކުރާނެ ގޮތެއް ނޭނގިފައި ހުއްޓާ ނިތީޝް ކުމާރު އެ ޑޮކްޓަރުގެ މޫނުބުރުގާގައި ހިފައި، އެ ތިރިއަށް ދަމާލައި، އަންހެން ޑޮކްޓަރުގެ ބުރުގާ ބާލާލައެވެ. މި ހާދިސާގެ ވީޑިއޯއެއް މިހާރު ވަރަށް ބޮޑަށް އާންމުވެފައިވާއިރު، ހާދިސާ ހިނގިއިރު، ފަހަތުގައި ތިބި ބައެއް މީހުން ހެމުންދިޔަ ތަންވެސް ފެނެއެވެ. އަދި ކަންހިނގައިދިޔަ ގޮތާމެދު ކަންބޮޑުވެ ލަދުގަނެފައި އަންހެން ޑޮލްޓަރު ހުރިތަންވެސް ފެނެއެވެ.

މި ހާދިސާގެ ވީޑިއޯ އާންމުވުމާއެކު، އިންޑިއާގެ އެތައް ސިޔާސީ ފަރާތްތަކަކުން ވަނީ ނިތީޝް ކުމާރުގެ މި އަމަލު ކުށްވެރިކޮށްފައެވެ.

އެގޮތުން، ކޮންގްރެސް ޕާޓީން ބުނެފައި ވަނީ 75 އަހަރުގެ ކުމާރުގެ މި އަމަލަކީ "ލަދުވެތި" އަމަލެއް ކަމަށެވެ. އަދި އޭނާ ވަގުތުން ޗީފް މިނިސްޓަރު ކަމުގެ މަގާމުން އިސްތިއުފާ ދިނުމަށް ގޮވާލާފައިވެ އެވެ.

"ބިހާރުގެ އެންމެ މަތީ މަގާމުގައި ހުރި މީހަކު މިހާ ދަށު ދަރަޖައިގެ ކަމެއް ކުރަމުންދާ އިރު، އެ ތަނުގައި އަންހެނުންނަށް ރައްކާތެރިކަން ލިބޭނެ މިންވަރު އަންދާޒާ ކޮށްލާބަލަ. ނިތީޝް ކުމާރު ވަގުތުން އިސްތިއުފާ ދޭންޖެހޭ. މި އަމަލަކީ މާފުކުރެވޭނެ ކަމެއް ނޫން،" ކޮންގްރެސް ޕާޓީން ބުނެފައިވެ އެވެ.

އާރްޖޭޑީގެ ތަރުޖަމާނު އިޖާޒު އަޙްމަދު ވިދާޅުވެފައި ވަނީ، ނިތީޝް ގެ މި އަމަލުން އެނގެނީ ޖޭޑީޔޫ-ބީޖޭޕީ ކޯލިޝަނުން އަންހެނުންނާ މެދު ދެކޭ ގޮތް ކަމަށެވެ.

"ބުރުގާ އަޅާ މުސްލިމް އަންހެނެއްގެ ބުރުގާ ބޭލުމުން، ޖޭޑީޔޫ އާއި ބީޖޭޕީން އަންހެނުން ބާރުވެރިކުރުމުގެ ނަމުގައި ގެނގުޅެނީ ކޮންކަހަލަ ސިޔާސަތެއް ކަން ވަރަށް ސާފުކޮށް ހާމަވެއްޖެ. އަންހެނެއްގެ ބުރުގާ ބޭލުމަކީ، އެމީހެއްގެ ސަގާފަތާއި ދީނީ މިނިވަންކަމާ އެއްގޮތަށް ދިރިއުޅުމުގެ ޙައްގު އަތުލުން. އެ ޙައްގަކީ އިންޑިއާގެ ގާނޫނު އަސާސީން ކޮންމެ މީހަކަށް ވެސް ކަށަވަރުކޮށްދޭ ޙައްގެއް،" އަޙްމަދު ވިދާޅުވި އެވެ.