ކުރަން ފަށާފައި ހުރި ހުރިހާ މަސައްކަތެއް މި ސަރުކާރުން ހުއްޓާލައިފި: ރައީސް ޞާލިހު
ލިޔުންތެރިޔާ
ޚަދީޖާ އަރުފާ
އެމަނިކުފާނުގެ ސަރުކާރުގައި ކުރަން ފެއްޓެވި ހުރިހާ މަސައްކަތްތަކެއް އަދުގެ ޕީޕީއެމް/ޕީއެންސީ ސަރުކާރުން ހުއްޓާލާފައިވާ ކަމަށް ކުރީގެ ރައީސް އަދި އެމްޑީޕީގެ އެޑްވައިޒަރ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
20 ވަނަ ރައްޔިތުންގެ މަޖިލީހުގައި އެމްޑީޕީގެ ޓިކެޓްގައި ނިލަންދޫ ދާއިރާއަށް ވާދަކުރައްވާ ކެންޑިޑޭޓް، ޢަލީ ރިޒާގެ ކެންޕެއިން ޖަލްސާގައި އިއްޔެ ވާހަކަ ދައްކަވަމުން ރައީސް ޞާލިހު ވިދާޅުވީ، މިސަރުކާރުގެ ފުރަތަމަ ތިން މަސްދުވަސް ނިމިގެންދިޔައިރުވެސް ރައްޔިތުން ބޭނުންވާ މިސްރާބަށް ކަންކަން ނުދާ ކަމަށެވެ.
ކުރަން ފަށްޓާފައިހުރި ގާތްގަނޑަކަށް ހުރިހާ މަސައްކަތްތަކެއް ހުއްޓާލައިފި. ވިދާޅުވަނީ ފައިސާ ނެތް ވާހަކަ. ކުންފުނިތަކެއް ނުހިނގާ. ވިދާޅުވަނީ، ކުންފުނި ތަކުގައި ނެތޭ ފައިސާއެއް.
ކުރީގެ ރައީސް އިބްރާހިމް މުހައްމަދު ޞާލިހު
މިއާއެކު ޞާލިހު ވިދާޅުވީ، ފައިސާ ނެތް ކަމަށް ސަރުކާރުން ބުނަމުން ދިޔަ ނަމަވެސް ފެންނަމުންދަނީ ދުވަހުން ދުވަހަށް ސިޔާސީ މަގާމުތައް އިތުރުކުރަމުންދާ މަންޒަރު ކަމަށާ، ސަރުކާރުން އަމާޒު ހިފާފައި ވަނީ 1500 ސިޔާސީ މަގާމް އުފެއްދުމަށް ކަމަށެވެ.
އަޅުގަނޑުމެންނަށް ލިބިފައިވާ މައުލޫމާތުތަކުން އެނގޭ ގޮތުގައި، (ސިޔާސީ މަގާމްތަކުގެ) މުސާރައަށް، މިދިޔަ ދެމަސް ދުވަހުގެ ތެރޭގައި، 2023 ވަނަ އަހަރާއީ އަޅާ ބަލާއިރު ގާތްގަނޑަކަށް 270 މިލިއަނާ، 300 މިލިއަން ރުފިޔާ އިތުރަށް ޚަރަދުކޮށްފި.
ކުރީގެ ރައީސް އިބްރާހިމް މުހައްމަދު ޞާލިހު
ރައީސް ޞާލިހު ވިދާޅުވިގޮތުގައި ދައުލަތުގެ ބަޖެޓުގައި ފައިސާ ނެތީ ސިޔާސީ މަގާމްތަކަށް ކުރަމުންދާ ޚަރަދުތަކުގެ ސަބަބުންނެވެ.
ރައީސް ޞާލިހް މިހެން ވިދާޅުވެފައި ވާއިރު، ރައީސް މުޢިއްޒު ރަށްރަށަށް ކުރައްވަމުންދާ ދަތުރުފުޅު ތަކުގެ ތެރެއިން އެމާނިކުފާނު ވަނީ ބައެއް މަޝްރޫޢުތައް ކުރިއަށް ނުގޮސް، ނޫނީ ލަހުން ކުރިއަށް ދަނީ، ބަޖެޓްގައި އެ މަސައްކަތް ތަކަށް ފައިސާ ކަނޑައަޅާފައި ނުވުމުން ކަމަށާ، ބައެއް މަޝްރޫޢުތައް ހަވާލު ކޮށްފައިވާ ކުންފުނި ތަކަށް ފައިސާ ދީފައި ނުވާތީވެސް މަޝްރޫއުތައް ހުއްޓިފައިވާ ކަމަށް ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
